“Sanki kimlərsə seçki ərəfəsində əhalini bilərəkdən narazı salmaq istəyir”
Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) Seçki Qərargahının rəhbəri Məhərrəm Zülfüqarlı “Bakı-Xəbər”ə etdiyi şikayətində bildirdi ki, yaşadığı Corat qəsəbəsində və Sumqayıt şəhərinin bəzi yerlərində qaz sayğaclarının dəyişdirilməsi müəyyən problemlərə səbəb olub.
Onun sözlərinə görə, nədənsə, kommunal xidmətlərlə bağlı problemlər seçki ərəfəsində qabardılır: “Seçkilərlə məşğul olan birbaşa ekspert kimi dəfələrlə bunu müşahidə etmişəm. Kimin borcu varsa, düşürlər onun üstünə. Sanki əhalini bilərəkdən narazı salmaq istəyirlər. Çox təəssüflər olsun ki, belə bir proses builki bələdiyyə seçkiləri ərəfəsində də müşahidə edilir. Məsələn, bir həftə əvvəl Sumqayıtda insanların normal işləyən sayğaclarını onlara xəbərdarlıq etmədən götürüblər. Yerinə təzə smart sayğaclar quraşdırıblar. Bu da əhalinin böyük narazılığına səbəb olub. Narazılığın yaranmasının səbəbləri var. Birincisi, sözügedən sayğacların idarə edilməsini insanlar bilmirlər. Mənzil sahiblərini dəvət edirlər ki, gəlin kart alın, sayğaca tanıdın və sonra pul yükləyin. Sumqayıt sakinləri gedib həmin kartları alıb, ancaq ona pul yükləmək problemdir. Qışın günündə abonentlər əllərində yeni smartkart ola-ola qazdan istifadə edə bilmirlər. Hesab edirəm ki, bunda kiminsə marağı var. Yəni üçüncü qüvvənin bunda marağı var. Ola bilsin ki, həmin sayğacları gətirməklə külli miqdarda pul qazanırlar. Bu minvalla seçki ərəfəsində əhalini hakimiyyətdən narazı salmaq istəyirlər. Ona görə də bununla ciddi məşğul olmaq lazımdır”.
M. Zülfüqarlı onu da qeyd etdi ki, bir abonent olaraq şəxsən özü də bu problemlə üzləşib: “Corat qəsəbəsində yaşayıram. Bilavasitə bu problemlə üzləşdiyimə görə qəzetinizə müraciət etmək qərarına gəldim. Problem ondadır ki, indiyə qədər qazı sayğaca yükləyə bilməmişəm. Əvvəlki sayğacda mənim 40 manatlıq pul vəsaitim var ki, onu da ödəmək imkanı yoxdur. Çünki problem ondadır ki, qaz sayğaclarını dəyişənlər şənbə və bazar günləri işləmirlər. Vətəndaşların çoxu, o cümlədən, mən özüm 5 günlük iş müddətində idarəyə müraciət edə bilmirəm. Çünki insanlar işi yarımçıq qoyub bununla bağlı müraciət edə bilmirlər. Getsələr, o zaman işi yarımçıq qoymalıdırlar. Bu da mümkün deyil. Şəxsən mən özüm işlərimi yarımçıq qoyub bununla məşğul olmağa vaxt tapa bilmirəm. Şənbə və bazar belə bir imkan olsa da, həmin günlər sayğacları quraşdıran qurum işləmir. Yeni sayğacları quraşdırıb insanları taleyin ümidinə buraxıblar. Hava da soyuduğu üçün evi qızdıra bilmirik. Olmazdı ki, qaz sayğacları yay fəslində dəyişdirilsin? Hansı ki, bunun üçün ən münasib vaxt yay fəslidir. Həmin vaxt qazdan az istifadə edildiyi üçün sayğacların dəyişdirilməsi daha münasibdir. Ancaq buna qışda başlayıb əhalini narazı salırlar. Hansı ki, dekabrın 23-də ölkədə bələdiyyə seçkiləri keçiriləcək”.
Yaranmış problemlə əlaqədar bir neçə dəfə “Azəriqaz” İstehsalat Birliyi ilə əlaqə saxlasaq da, buna aydınlıq gətirən olmadı.
Vidadi ORDAHALLI
