Bəhruz Quliyev: “...Dövlət xidmətlərinin daha şəffaf, operativ və əlçatan olmasına xidmət edəcək”
Azərbaycan dövlət xidmətlərinin elektronlaşdırılması, innovativ sahibkarlığın dəstəklənməsi, süni intellekt (Sİ) əsaslı idarəetməyə keçid və məlumat suverenliyinin təmin edilməsi məqsədilə 2026–2028-ci illəri əhatə edən Azərbaycan Respublikasında rəqəmsal inkişafın sürətləndirilməsinə dair Fəaliyyət Planı həyata keçirilir. Həyata keçirilən kompleks islahatlar idarəetmə və strateji inkişafı əhatə edir.
Birinci vitse-prezident Mehriban Əliyevanın rəhbərliyi ilə Rəqəmsal İnkişaf Şurası yaradılıb. 29 iyun 2026-cı il tarixində İclasa Azərbaycan Respublikasının Birinci vitse-prezidenti Mehriban Əliyeva sədrliyi ilə Rəqəmsal İnkişaf Şurasının ilk iclasının keçirilib və iclasda bu yöndə məsələlər müzakirə edilib. Onu da qeyd edək ki, rəqəmsallaşma, süni intellekt və kibertəhlükəsizlik sahəsində 58 mühüm təşəbbüsü özündə birləşdirən yol xəritələri icra olunur.
Bu ilin fevralında Prezident İlham Əliyevin sədrliyi ilə keçirilən müşavirədə bu istiqamətdə qəbul edilən qərarlar və Azərbaycan Respublikasının Rəqəmsal İnkişaf Şurasının yaradılması bu sahədə dövlət siyasətinin vahid və əlaqələndirilmiş şəkildə həyata keçirilməsinin, dövlət qurumları arasında koordinasiyanın gücləndirilməsinin və innovasiya əsaslı iqtisadi modelə keçidin sürətləndirilməsinin əsasıdır.
Fəaliyyət Planının əsas hədəfləri - dövlət idarəetməsinin optimallaşdırılması, beynəlxalq reytinqlərdə Azərbaycanın mövqeyinin yüksəldilməsi və iqtisadiyyatın rəqəmsal sektorunun ÜDM-də payının artırılması.
Fəaliyyət Planı İnformasiya Təhlükəsizliyi və Kibertəhlükəsizlik üzrə Strategiya, Rəqəmsal İnkişaf Konsepsiyası və Süni İntellekt Strategiyası ilə uzlaşdırılıb və bu sənədlərdə müəyyən edilmiş məqsədlərin icrasını təmin edən konkret tədbirləri özündə birləşdirir.
Bununla da, rəqəmsal inkişaf sahəsində strateji baxış, prioritetlər və icra mexanizmləri vahid idarəetmə modeli çərçivəsində əlaqələndirilir.
Fəaliyyət Planı rəqəmsallaşma, süni intellekt, innovasiya ekosisteminin inkişafı və kibertəhlükəsizlik olmaqla dörd əsas istiqamət üzrə qurulub. Sənədin icrasını dəstəkləyən əsas amillər kimi infrastruktur, tənzimləmə, insan kapitalı və idarəetmə istiqamətləri müəyyən edilib.
Eyni zamanda, ölkə başçısının müvafiq tapşırığına əsasən, dövlət qurumlarında rəqəmsallaşma təşəbbüslərinin icrasına rəhbər müavini səviyyəsində cavabdeh şəxslər təyin edilmişdir.
Dövlət xidmətlərinin rəqəmsallaşdırılması sahəsində son vaxtlar görülən işləri necə qiymətləndirirsiniz? Burada söhbət hüquqi müstəvidə dövlət sənədlərinin qəbulundan, Rəqəmsal İnkişaf Şurasının yaradılnəmasından, Mehriban Əliyevanın sədrliyi ilə Şuranın ilk iclasında müzakirə edilən məsələlərdən, 2026–2028-ci illəri əhatə edən Azərbaycan Respublikasında rəqəmsal inkişafın sürətləndirilməsinə dair Fəaliyyət Planın qəbulundan gedir.
İlk iclasda Şuranın sədri Mehriban Əliyeva bildirib ki, "Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı"nın icrası Şuranın əsas fəaliyyət istiqamətidir. O qeyd edib ki, Şuranın prioritetləri dövlət idarəçiliyində rəqəmsallaşmanın, süni intellektin, kibertəhlükəsizliyin və innovasiya ekosisteminin inkişafı, eləcə də investisiyaların və startapların dəstəklənməsidir. Mehriban Əliyeva süni intellektin strateji əhəmiyyətini vurğulayaraq, bütün qərarların Azərbaycanın milli maraqlarına uyğun qəbul edilməsinin vacibliyini bildirib.
Rəqəmsal inkişaf və nəqliyyat naziri Rəşad Nəbiyev Fəaliyyət Planının icrası çərçivəsində rəqəmsallaşma, süni intellekt və kibertəhlükəsizlik istiqamətlərində görülən işlər barədə məlumat verib. O bildirib ki, dövlət qurumları üzrə Yol xəritələrinin hazırlanması, Milli Məlumat Hövzəsinin yaradılması, dövlət informasiya sistemlərinin hökumət buluduna miqrasiyası, "mygov" platformasının genişləndirilməsi, süni intellekt həllərinin tətbiqi və milli kibertəhlükəsizlik infrastrukturunun formalaşdırılması istiqamətində işlər davam etdirilir.
Prezidentin köməkçisi Şahmar Mövsümov Rəqəmsal İnkişaf Şurasının prioritetlərinə uyğun olaraq rəqəmsal inkişaf sahəsində genişmiqyaslı qanunvericilik islahatlarının hazırlandığını bildirib. O qeyd edib ki, islahatlar innovasiya və rəqəmsal iqtisadiyyatın inkişafını dəstəkləyən hüquqi mühitin təkmilləşdirilməsini əhatə edir və qabaqcıl beynəlxalq təcrübə əsasında hazırlanır.
Elm və təhsil naziri Emin Əmrullayev təhsil sisteminin rəqəmsallaşdırılması, "Rəqəmsal məktəb" layihəsinin icrası, elektron təhsil xidmətlərinin genişləndirilməsi və tədris prosesinin rəqəmsal transformasiyası istiqamətində görülən işlər barədə məlumat verib. O, həmçinin "Rəqəmsal bacarıqlar" və "STEAM Azərbaycan" layihələri vasitəsilə şagirdlərin rəqəmsal bacarıqlarının inkişafının və insan kapitalının gücləndirilməsinin prioritet olduğunu bildirib.
“Səs” qəzetinin baş redaktoru, siyasi ekspert Bəhruz Quliyev baki-xeber.com-a bildirdi ki, son dövlər bu istiqamətdə həyata keçirilən layihələr, atılan addımlar dövlət qurumları arasında koordinasiyanı formalaşdırıb. “Azərbaycanda dövlət xidmətlərinin rəqəmsallaşdırılması istiqamətində son dövrdə atılan addımlar göstərir ki, bu sahə artıq ayrı-ayrı layihələr səviyyəsindən çıxaraq dövlət idarəçiliyinin strateji istiqamətlərindən birinə çevrilib. Hüquqi müstəvidə elektron və rəqəmsal sənədlərin qəbulunun genişləndirilməsi, Rəqəmsal İnkişaf Şurasının yaradılması, 2026–2028-ci illəri əhatə edən Fəaliyyət Planının təsdiqlənməsi və Şuranın ilk iclasının keçirilməsi bu prosesin sistemli şəkildə həyata keçirildiyini göstərir”.
Ekspert qeyd etdi ki, Azərbaycanın Birinci vitse-prezidenti Mehriban Əliyevanın sədrliyi ilə Rəqəmsal İnkişaf Şurasının ilk iclasının keçirilməsi bu məsələyə dövlət rəhbərliyi səviyyəsində verilən yüksək önəmin bariz göstəricisidir. “Bu, rəqəmsal transformasiyanın təkcə texnologiya deyil, həm də idarəetmə, iqtisadiyyat və vətəndaş məmnunluğu baxımından prioritet istiqamət kimi müəyyənləşdirildiyini təsdiqləyir.
Düşünürəm ki, 2026–2028-ci illər üçün qəbul edilmiş Fəaliyyət Planı dövlət xidmətlərinin daha şəffaf, operativ və əlçatan olmasına xidmət edəcək. Süni intellekt, böyük verilənlər və vahid rəqəmsal platformaların tətbiqi dövlət-vətəndaş münasibətlərini yeni mərhələyə çıxaracaq, bürokratik maneələri minimuma endirəcək və korrupsiya risklərini əhəmiyyətli dərəcədə azaldacaq.
Rəqəmsal dövlət modelinə keçid həm də Azərbaycanın beynəlxalq rəqabət qabiliyyətini artıracaq, investisiya mühitini yaxşılaşdıracaq və iqtisadiyyatın rəqəmsal inkişafını sürətləndirəcək. Bu baxımdan, həyata keçirilən islahatlar təkcə bu günün deyil, gələcək onilliklərin inkişaf modelini formalaşdıran strateji qərarlardır.
Ümumilikdə hesab edirəm ki, rəqəmsallaşma istiqamətində atılan son addımlar Azərbaycanın müasir, çevik və vətəndaşyönümlü dövlət idarəçiliyinin qurulması yolunda mühüm mərhələdir. Qarşıdakı dövrdə əsas məsələ qəbul edilən qərarların vaxtında və səmərəli icrasını təmin etmək, rəqəmsal xidmətlərin keyfiyyətini davamlı olaraq yüksəltmək və bütün vətəndaşların bu imkanlardan bərabər şəkildə faydalanmasına nail olmaqdır."-deyə, B.Quliyev əlavə etdi.
İradə SARIYEVA
