Elxan Əliyev: “Bu gün bədbəxt hadisələr ən çox tikinti sektorunda baş verir”
Tikinti sektorunda təhlükəsizlik qaydalarına hələ də tam şəkildə əməl olunmaması burada hələ də bədbəxt hadisələrin yaşanması ilə müşayiət olunur.
Son 20 ildə – 2005-2024-cü illərdə istehsalatda baş verən bədbəxt hadisələr nəticəsində əmək qabiliyyətini itirənlərin və ölənlərin sayı 4 dəfə artıb. Məlumat üçün bildirək ki, istehsalatda əmək qabiliyyətini itirənlərin və ölənlərin sayı 2005-ci ildə 189 nəfər olduğu halda, 2024-cü ildə 747 nəfərə yüksəlib.
Ötən il isə bədbəxt hadisə nəticəsində ölənlərin sayı 88 nəfər olub. Ölüm halları ən çox tikintidə qeydə alınıb. İl ərzində baş verən ölümlərin 28,4%-i, yəni 25 nəfəri tikinti sahəsində baş verən bədbəxt hadisələr zamanı qeydə alınıb.
Bunlardan başqa, il ərzində nəqliyyat və anbar təsərrüfatında 20, emal sənayesində 6, elektrik enerjisi, qaz və buxar istehsalı, bölüşdürülməsi və təchizatı sahəsində 8, mədənçıxarma sənayesində 2, su təchizatı, tullantıların təmizlənməsi və emalı sahəsində 1, informasiya və rabitə sektorunda 1, digər iqtisadi fəaliyyət növlərində isə 22 nəfər bədbəxt hadisə nəticəsində ölüb.
İş yerində xəsarət alanların sayının artması təhlükəsizliyin təmin edilməmasi ilə bağlıdır, yoxsa başqa səbəblər var?
“Təhlükəsizlik qaydalarına riayət eləməyəndə, məsuliyyətsizlik və işə biganə yanaşanda bədbəxt hadisələrin olma risqi artır”
Sosial məsələlər üzrə Elxan Əliyev “Bakı-Xəbər”ə şərhində bildirdi ki, bu gün bədbəxt hadisələr ən çox tikinti sektorunda baş verir: “Bunu statistik rəqəmlərdə təsdiq edir. Çünki tikinti sektoruna çox zaman qeyri-peşəkar insanlar gəlir. Bu işdə birinci növbədə sahibkarların günahı var. Əksəriyyətində təhlükəsizlik qaydaları ilə bağlı müasir avadanlıqlar ümumiyyətlə yoxdur. Həmçinin, bu gün yerlərdə tikinti obyektlərinə fəhlə işləmək üçün üz tutanların sayı az deyil. Əksəriyyəti də ixtisassız insanlar olur. Onlar texniki təhlükəsizlik qaydaları haqda biliksiz olurlar. Eyni zamanda onları işə götürərkən də təhlükəsizlik qaydaları ilə bağlı kiçik təlimatlar həyata keçirilmir. Tikintidə hər bir iş görülərkən onun təhlükəsiz yerinə yetəcəyinə əmin olduqdan sonra işə başlanmalıdır. Yükü qaldıranda, hündürlükdə işləyəndə, betonqarışdıran maşını işə salanda, qaynaq və elektrik mişar işi görəndə ehtiyatlı olmaq lazımdır. Heç kim bədbəxt hadisələrdən sığortalanmayıb. Təhlükəsizlik qaydalarına riayət eləməyəndə, məsuliyyətsizlik və işə biganə yanaşanda bədbəxt hadisələrin olma risqi artır”.
Günel CƏLİLOVA
