Nadim Əliyev: “Əksər yenitikili binalarda əsasən bir provayder olur, başqa bir provayderə icazə olmur”
“Çoxmənzilli binalarda ən azı 3 fərqli provayderin xidmət göstərməsi abonentlərin seçim hüququnun təmin edilməsi və rəqabətin formalaşması baxımından zəruri hesab olunur”.
Bu barədə Rəqəmsal İnkişaf və Nəqliyyat Nazirliyinin (RİNN) tabeliyində İnformasiya və Kommunikasiya Texnologiyaları Agentliyində (İKTA) çoxmənzilli yaşayış komplekslərində (MTK) internet xidmətlərinin göstərilməsi və rəqabət mühitinin gücləndirilməsi mövzusunda telekommunikasiya operatoru və provayderləri ilə növbəti görüşündə bildirilib. Qeyd edilib ki, bəzi MTK-lar internet xidmətlərinin göstərilməsinə maneə törədir.
Qeyd edək ki, bəzi MTK-lar binaya başqa bir provayderin daxil olmasına qarşı çıxır. Sanki "bir bina bir provayderindir" prinsipi ilə işləyirlər”. Bu da internetin zəif olması ilə yanaşı bazarda seçim imkanını zəiflədir.
“Tikinti şirkətləri bina tikərkən maksimum qənaət etmək istəyirlər, o səbəbdən də daha aşağı keyfiyyətli kabellər quraşdırırlar”
İKT eksperti Nadim Əliyev “Bakı-Xəbər”ə şərhində bildirdi ki, sakinlərin internetlə bağlı narazılığı həm MTK, həm də provayderlərin günahı üzündəndir: “MTK-ların provayderlərə fərqli yanaşmaları var. Belə ki, MTK-lar daha çox şəxsi münasibətlərə üstünlük verir və bundan əziyyət çəkən sakinlər olur. Yaxşı olar ki, MTK-lar binada internet təchizatını bir neçə provayderə həvalə etsin və sakinin büdcəsinə uyğun seçim imkanı olsun. Məlumdur ki, bu gün əksər yenitikili binalarda əsasən bir provayder olur, başqa bir provayderə icazə olmur. Sakin internetin sürətindən narazı olduğu üçün başqa bir provayderə qoşulmaq istəyəndə ona “olmaz” cavabı verilir. Səbəb kimi binada yalnız bir provayderin olduğu deyilir. Bu isə düzgün deyil”.
Ekspert hesab edir ki, MTK-larla bağlı qayda dəyişməlidir: “Tikinti şirkəti ancaq bina tikməlidir. Bu fəaliyyət normaldır, çünki ölkədə həm ev problemini həll edirlər, həm də köhnə binaları yeniləyirlər. Bu, dövlətə bir dayaqdır. Amma satış mexanizmi onlardan alınmalıdır. İşi hansısa rəsmi dövlət qurumu aparmalıdır ki, həm satılan ümumi sahə, kvadratmetrlər düz olsun, həm də mənzilə aid kommunal problem olmasın, internet kimi. Ümumiyyətlə, MTK-lar haqqında qanuna görə, tikinti bitdikdən sonra onların fəaliyyəti dayanmalıdır. Sakinlər özləri xidmət göstərən şirkət yaratmalıdırlar. Bu halda provayderlərini də özləri seçirlər. Amma əksər hallarda MTK-lar tikintidən sonra da fəaliyyətlərini davam etdirirlər. Onların da çox az hissəsi tenderlə ən güclü provayderi seçir. Əksəriyyəti maraqları olan şirkətlərlə işləyir. Həmçinin, tikinti şirkətləri bina tikərkən maksimum qənaət etmək istəyirlər. O səbəbdən də daha aşağı keyfiyyətli kabellər quraşdırırlar. Bu hal qanunvericilik və tikinti normalarında əksini tapmadıqca, həll edilməyəcək”.
N.Əliyevin sözlərinə görə, MTK-lar vətəndaşların hüquqlarını pozur: “İstehlakçının xidmətləri könüllü seçmək imkanı olmalıdır. Belə olan halda rəqabətli mühit yaranır. Rəqabətli mühitin yaranması vətəndaşların hüquqlarının qorunması, o cümlədən keyfiyyətli xidmətlərə şərait yaradır”.
Günel CƏLİLOVA
