Elçin Əfəndi: “Hər hansı universitetin yoxlama zamanı göstərdiyi nəticə maksimum balın 85-100 faizini əhatə edərsə…”
Təhsil müəssisələrinin akkreditasiyası qaydası dəyişib, akkreditasiya üçün toplanılan bal həddi aşağı endirilib. Nazirlər Kabineti bununla bağlı “Təhsil müəssisələrinin akkreditasiyası Qaydaları”nda dəyişiklik edib.
Dəyişikliyə əsasən, Akkreditasiya Meyarları üçün maksimum bal ölçüsü hər bir meyar üzrə indikatorların sayından və hər bir indikator üzrə müəyyən edilən maksimum baldan asılı olaraq hesablanacaq. Təhsil müəssisəsi və ya təhsil proqramı üçün maksimum bal ölçüsü Akkreditasiya Meyarları üzrə hesablanmış maksimum balların toplanmasından ibarət olacaq. Təhsil müəssisəsi və ya təhsil proqramı üçün müəyyən olunmuş maksimum bal ölçüsünün akkreditasiya zamanı toplanılan bal üzrə qiymətləndirilməsi aşağıdakı qaydada müəyyənləşdiriləcək:
- maksimum balın 85-100 faizi - “uyğundur”;
- maksimum balın 70-84 faizi - “əsasən uyğundur”;
- maksimum balın 55-69 faizi - “qismən uyğundur”;
- maksimum balın 54 və daha aşağı faizi - “uyğun deyil”.
Maraqlıdır, təhsil müəssisələrinin akkreditasiyası barədə yeni qərar nələri dəyişəcək?
“Qaydalarda dəyişiklik təhsil müəssisələrinin ümumi inkişafına, təhsil proqramlarının daha da təkmilləşdirilməsinə xidmət edəcək”
Təhsil eksperti Elçin Əfəndi “Bakı-Xəbər”ə şərhində bildirdi ki, qaydalarda dəyişiklik təhsil müəssisələrinin ümumi inkişafına, təhsil proqramlarının daha da təkmilləşdirilməsinə xidmət edəcək: “Dəyişikliklər müvafiq olaraq təhsil müəssisələrinin nüfuzunun artmasına gətirib çıxaracaq. Akkreditasiyanın keçirilməsi ali təhsilin və ya orta ixtisas təhsilinin inkişafına təkan verəcək”.
Həmsöhbətimiz onu da əlavə etdi ki, hər hansı universitetin yoxlama zamanı göstərdiyi nəticə maksimum balın 85-100 faizini əhatə edərsə, həmin universitet akkreditasiya verilməsinə uyğun olacaq: “70-84 faiz nəticə göstərənlər, yəni “əsasən uyğundur” olan təhsil müəssisələri də akkreditasiyadan keçmiş hesab ediləcək. 55-69 faiz nəticə “qismən uyğundur” hesab edilir. 54 faiz və daha aşağı olanlar isə “uyğun deyil” kimi qiymətləndiriləcək. Təhsil müəssisələrində nəticə 70 faiz və yuxarıdırsa, bu zaman həmin təhsil müəssisəsi 5 il üçün tam akkreditasiyadan keçmiş hesab ediləcək. Nəticə aşağıdırsa həmin universitet mövcud çatışmazlıqları aradan qaldırmaq şərti ilə iki ildən sonra təkrar akkreditasiyadan keçiriləcək”.
Günel CƏLİLOVA
