Azər Həsrət: “Onlar cəmiyyəti yanıltmaq, ictimai rəyi çaşdırmaq üçün bunu edirlər, bu kimi əməllər xırda xuliqanlıq sayılmamalıdır”
Azərbaycanda “xırda xuliqanlıq” anlayışı genişləndirilir. Milli Məclisin müvafiq komitələrinin birgə iclasında İnzibati Xətalar Məcəlləsinə və “İnformasiya haqqında” Qanuna dəyişikliklər müzakirə olunub.
Yeni dəyişikliklərə görə, cəmiyyətə açıqca hörmətsizlik göstərən hərəkətlər də xırda xuliqanlıq sayılacaq.
Bu cür hallara görə 50–100 manat cərimə və zərurət olduqda 15 günədək inzibati həbs tətbiq edilə bilər. Əgər bu hərəkətlər internetdə kütləvi şəkildə nümayiş olunursa (məsələn, əxlaqsız ifadələr, qeyri-etik jestlər, bədən hissələrinin əxlaqa zidd göstərilməsi), cərimə 500–1000 manat olacaq. Zərurət yaranarsa, 30 günədək inzibati həbs nəzərdə tutulur. Bu qaydalar yalnız cinayət məsuliyyəti yaratmayan hallara şamil olunacaq.
Yeni qaydalara əsasən, sosial şəbəkələrdə təhqir, kimisə alçatma məqsədilə istifadə edilən sözlər "xırda xuliqanlıq" hesab ediləcək.
“Bir qisim insanlar sosial media üzərindən davranış zamanı məsuliyyət hissini tamamilə itirir, bu da nəticə etibarı ilə sosial media istifadəçilərinə gərgin anlar yaşadır”
Media eksperti Azər Həsrət “Bakı-Xəbər”ə şərhində bildirdi ki, bir qisim insanlar sosial media üzərindən davranış zamanı məsuliyyət hissini tamamilə itirir. Bu da nəticə etibarı ilə sosial media istifadəçilərinə gərgin anlar yaşadır, onları cəmiyyət içində gözdən salır: “Ümumiyyətlə, bu kimi hallar insanların sosial mediadan istifadəsinə mənfi təsir edir. Vətəndaşların konstitusion hüquqları bu yolla əngəllənmiş olur. Belə bir davranış sərgiləyən şəxslərə sırda xuliqan demək olmaz. Onlar konstitusion hüquqların icrasının qarşısını alacaq qədər addımlar atırsa, bu çox böyük cinayət əməli sayılır. Konstitusion hüquqlara zərbə vuran şəxslərə daha ağır cəza növü tətbiq olunmalıdır. Biz uzun müddətdir ki, onlayn müstəvidə davranış qaydaları haqqında danışırıq və həmişə də deyirik sosial şəbəkə məsuliyyət müstəvisidir. Ancaq bəziləri bizim dediklərimizi görməzdən gəlirdi. Ancaq heç kim sanmasın ki, burda – sosial şəbəkədə onu görmürlər və nə istəsə yaza bilər. Onu da deyim ki, bu fəaliyyətlə məşğul olanlar bu işləri məqsədli şəkildə edirlər, başqalarını gözdən salmaq üçün. Onlar cəmiyyəti yanıltmaq, ictimai rəyi çaşdırmaq üçün bunu edirlər. Bu kimi əməllər xırda xuliqanlıq sayılmamalıdır”.
Günel CƏLİLOVA
