Aslan Əsədov: “Bakı və Sumqayıtdakı maşın bazarlarının Ağdama köçürülməsi şəhərdə tıxacın azalmasına müəyyən qədər təsir edə bilər”
İşğaldan azad edilmiş ərazilərdə aparılan genişmiqyaslı quruculuq və bərpa işləri davam edir. Görülən işlər ölkənin iqtisadi, sosial və strateji inkişaf xəritəsində yeni mərhələnin əsasını qoyub.
Mediada yayılan məlumata görə, ölkənin ən böyük avtomobil bazarının Ağdama köçürülməsi planlaşdırılır. Plan Ağdamın regional ticarət və logistika mərkəzinə çevrilməsi, işğaldan azad edilmiş bölgələrə yeni iqtisadi axının yaradılması, nəqliyyat infrastrukturunun gücləndirilməsi və yeni sahibkarlıq fəaliyyəti və məşğulluq imkanlarının artırılmasına xidmət edir. Ağdamda salınacaq avtomobil bazarı və logistika infrastrukturu şəhəri ölkənin ən dinamik iqtisadi zonalarından birinə çevirəcək.
O da bəllidir ki, Bakı və Sumqayıtda da maşın bazarı mövcuddur. Həmin avtomobil bazarları gələcəkdə Ağdama köçürülə bilərmi?
“Maşın bazarının Ağdama köçürülməsi, yeni bazar modelinin formalaşması rəqabəti artıraraq uzunmüddətli perspektivdə qiymətlərin stabilləşməsinə səbəb ola bilər”
Nəqliyyat eksperti Aslan Əsədov “Bakı-Xəbər”ə şərhində bildirdi ki, maşın bazarının yeni yerlərdə formalaşdırılması məsələsi son dövrlərdə aktual mövzulardan birinə çevrilib: “Maşın bazarının Ağdama köçürülməsi təklifi müsbət qiymətləndirilməlidir. Bu, təkcə iqtisadi deyil, həm də strateji və ideoloji baxımdan önəmli qərardır. Yeni bazar yalnız bir ərazi dəyişikliyi ilə məhdudlaşmamalı, tam funksional və infrastruktur baxımından əsaslandırılmış şəkildə qurulmalıdır”.
Ekspert hesab edir ki, Bakı və Sumqayıtdakı maşın bazarlarının Ağdama köçürülməsi şəhərdə tıxacın azalmasına müəyyən qədər təsir edə bilər. Çünki bazarın yerləşdiyi ərazi günün müəyyən saatlarında uzun-uzadı tıxaca səbəb olur: “Bazar köçürüldükdə həmin axın azalacaq və yol qovşaqlarında sıxlıq yüngülləşəcək. Onu da deyim ki, paytaxtdakı maşın bazarı Ağdama köçürülsə belə onlayn satışlar mövcud olacaq. Ola bilər ki, bazar orada yerləşsin, amma seçim şəxsin istəyinə görə Bakıdan və ya digər bölgələrdən qiyabi qaydada aparılsın”.
Həmsöhbətimiz onu da əlavə etdi ki, Azərbaycanın nəqliyyat infrastrukturunun genişləndirilməsi, bölgələrdə bazarların formalaşdırılması və insanların rentabelliyinin artırılması xüsusi əhəmiyyət daşıyır: “Avtomobil bazarının Ağdama köçürülməsi Qarabağ iqtisadi zonasının da çiçəklənməsinə təkan verə bilər. Avtomobil bazarının Ağdama yerləşdirilməsi həmin regionun alıcılıq imkanına uyğun ticarətin formalaşmasına, həmçinin xaricdən gətirilən avtomobillərin satışının orada təmin olunmasına şərait yaradacaq. Maşın bazarının Ağdama köçürülməsi, yeni bazar modelinin formalaşması rəqabəti artıraraq uzunmüddətli perspektivdə qiymətlərin stabilləşməsinə səbəb ola bilər”.
Günel CƏLİLOVA
