Adil Qeybulla: “Yüksək şəraitə uyğunlaşan həkimlərin əksəriyyəti ölkəyə qayıtmaq istəmir”
“Nə olur-olsun, təyinatı alan həkim təyinat yerinə getməlidir. Əks təqdirdə onlara diplom verilməli deyil”. Bunu deputat Səyyad Aran Milli Məclisin ötən iclasında büdcə müzakirəsi zamanı deyib.
O əlavə edib ki, Tibb Universitetində yaxşı dərs keçilir: “Çünki bizim həkimləri Şərqi, Qərbi Avropa, Türkiyə və başqaları məmuniyyətlə qəbul edir”.
Məlumdur ki, bu gün ölkədə həkim çatışmazlığı yaşanır. Ali məktəbi bitirən gənc həkimlər xaricdə çalışmağa üstünlük verir və fəaliyyətini orda davam etdirir. Bu gün çoxlu sayda məşhur gənc azərbaycanlı həkimlərimiz xaricdə tanınır, çalışır.
Bu səbəbdən deputatın məlum təklifi ekspertlər tərəfindən müsbət qarşılanır. Maraqlıdır, təyinatı alan həkim təyinat yerinə getsə, xaricə getməsə bu hal məlum problemi həll edərmi?
“Həkimlərin xaricə axınının qarşısını almaq üçün təklif yox, düzgün işlər görülməlidir, ilk olaraq, Azərbaycanda da həkimlər üçün stabil maaş modeli tətbiq edilməlidir”
Tibb elmləri doktoru, professor Adil Qeybulla “Bakı-Xəbər”ə şərhində bildirdi ki, Azərbaycandan xaricə həkim axınının bir neçə əsas səbəbi var: “Birincisi, tələbələr daha yaxşı tibbi təhsil üçün xaricə üz tuturlar. Digər əsas səbəb isə əməkhaqqı və qiymətləndirmə sistemidir. Həkimlər düşünür ki, ölkədə özlərini tam reallaşdıra bilmirlər. Əsas istiqamətlər Türkiyə və Almaniyadır, həmçinin Fransa, Danimarka, İngiltərə, ABŞ və digər Avropa ölkələrində də azərbaycanlı həkimlər çalışır. Xaricdə həkimlər icbari tibbi sığorta çərçivəsində işləyir və fiksə olunmuş, stabil və yüksək maaş alırlar. Almaniya bu gün daha əlçatan ölkədir, inteqrasiya etmək və orada təcrübə keçmək digər ölkələrə nisbətən rahatdır. Həkimlərin xaricə axınının qarşısını almaq üçün təklif yox, düzgün işlər görülməlidir. Ilk olaraq, Azərbaycanda da həkimlər üçün stabil maaş modeli tətbiq edilməlidir. Bu, icbari tibbi sığortanın əsas istiqamətlərindən biri olmalıdır. Problemin həlli üçün fiks maaş mexanizminin qurulması vacibdir. Yüksək şəraitə uyğunlaşan həkimlərin əksəriyyəti ölkəyə qayıtmaq istəmir. Xaricdə təhsil alan tələbələr oradakı səviyyəyə alışdıqdan sonra dönmək istəmirlər. Bununla yanaşı, gələcəkdə təcrübəli həkimlərin axınının qarşısını almaq üçün hansısa formada onların stimulyasiyası lazımdır. Həkimlərə tətbiq olunan sertifikasiya imtahanı ümumiyyətlə biabırçılıqdır. Dünyanın heç bir yerində belə şey yoxdur. Bu ləğv olunmalıdır”.
Həmsöhbətimiz onu da əlavə etdi ki, xaricdə oxuyub, geri qayıdıb özəl sektorda çalışan mütəxəssislər də az deyil: “Hazırda Analoji Elmi Mərkəzdə xeyli sayda xaricdə təhsil almış həkim çalışır və ürək əməliyyatları, mürəkkəb neyro-cərrahi müdaxilələr məhz onların sayəsində icra olunur”.
Günel CƏLİLOVA
