Əli Əlirzayev: “Yalnız Nehrəm kəndində Kapital Bankın bankomatı var”
Bu ilin oktyabr ayının əvvəlinə olan məlumata görə, Naxçıvan Muxtar Respublikasında 98 ədəd bankomat olub. Qeyd edək ki, bankomatların 56,2%-i – 55 ədədi “Kapital Bank” ASC-yə məxsus olub. Bankomatların 35 ədədi və ya 35,7%-i “Azərbaycan Beynəlxalq Bankı” ASC-nin olub.
Ümumiyyətlə, Naxçıvandakı bankomatlar cəmi 7 banka məxsusdur. “Kapital Bank” və “Beynəlxalq Bank”dan sonra ən çox bankomat “Azər-Türk-Bank” ASC-yə məxsus olub. Bu bankın Naxçıvanda 4 bankomatı var. Digər bankların – “Rabitəbank” ASC, “Bank Respublika” ASC, “Ziraat Bank” ASC və “AccessBank” QSC-nin isə hər birinin Muxtar Respublikada 1 bankomatı mövcud olub.
Burada diqqəti çəkən məqam odur ki, Naxçıvandakı bankomatların 92%-i 2 banka məxsusdur. Bir sıra aparıcı bankların Naxçıvanda heç bankomatı belə yoxdur. O üzdən, Naxçıvanda bankların sayının artırılmasına ehtiyac var. O cümlədən, bankomatların sayının artırılmasına ciddi zərurət var. Ona görə ki, şəhərdən 15-20 kilometr uzaqda yerləşən kəndlər var, orada bankomat yoxdur. Kəndlərdə bankomat olmadığı üçün əhali şəhərə getmək məcburiyyətində olur. Məsələn, Şahbuz rayonunda 50-yə yaxın kənd var, amma təkcə rayon mərkəzində bankomat mövcuddur. Nə çətin işdir ki, nisbətən böyük kəndlərdə bankomat quraşdırılsın? Göründüyü kimi, Naxçıvanda hətta əhaliyə bank-maliyyə xidmətinin bankomatlar vasitəsilə göstərilməsi belə yarıtmaz vəziyyətdədir.
“Böyük banklar əhalinin sosial maraqlarını nəzərə alaraq nisbətən böyük kəndlərdə bankomat aça bilər”
Sözügedən məsələyə aydınlıq gətirən iqtisadçı-ekspert Əli Əlirzayev “Bakı-Xəbər”ə açıqlamasında Naxçıvanda bankomatların sayının az olmasını bir sıra amillərlə əlaqələndirdi: “Səbəblər müxtəlifdir. Bir səbəb onunla bağlıdır ki, banklar öz dövriyyəsini güdür, onun marağında olanda orada bankomat açır. Gərək hansısa zavod, fabrik olsun və orada işləyənlər maaş alsınlar ki, bu zaman hansısa bankomata ehtiyac olsun. Digər problem odur ki, bir sıra kəndlərdə az əhali yaşayır. Qeydiyyatı olsa da özü Bakıda yaşayır. Bu səbəbdən orada bankomat açmağı sərfəli hesab etmirlər. Naxçıvan şəhərində, rayon mərkəzlərində bankomat olsa da, kəndlərdə yoxdur. Yalnız bəzi böyük kəndlərdə bankomat var. Başqa bir tərəfdən, Naxçıvanda hər banka etibar etmirlər. Əhalinin əsas etibar etdiyi bank Kapital Bankdır. Əhali əsasən bu bankdan pensiya alır. Bir də müəllim və həkimlər bu bankdan maaş alır. Hesab edirəm ki, böyük banklar əhalinin sosial maraqlarını nəzərə alaraq nisbətən böyük kəndlərdə bankomat aça bilərlər. Yalnız Nehrəm kəndində Kapital Bankın bankomatı var, Beynəlxalq Bankın yoxdur. Digər kəndlərdə ümumiyyətlə bankomatlar mövcud deyil. Bankomatlardan istifadə edən ya pensiyaçılardır, ya da əmək haqqı alanlar. Biznes, iqtisadi fəallıq olsa, digər banklar bankomatlarını açmaqda maraqlı ola bilərlər”.
Vidadi ORDAHALLI
