Şəmsəddin Əliyev: “Konstitusiyanın 12-ci maddəsində vətəndaşların hüquq və azadlıqları və onların layiqli həyat səviyyəsinə istinad edib, o cərimələri ləğv etmək olar”
Xəbər verildiyi kimi, yeni dövlət qeydiyyat nişanlarında defis işarəsi tətbiq olunmayacaq. Bu barədə Baş DYP İdarəsinin yaydığı məlumatda bildirilib. Qeyd edilib ki, yeni qəbul edilmiş dövlət standartına əsasən, bundan sonra nəqliyyat vasitələrinə veriləcək dövlət qeydiyyat nişanlarında rəqəm və hərflər arasında istifadə olunan defis işarəsi tətbiq edilməyəcək:
“Bu dəyişiklik yalnız yeni hazırlanan nömrə nişanlarına aiddir. Hazırda vətəndaşların istifadə etdiyi, üzərində defis olan bütün dövlət qeydiyyat nişanları tam etibarlıdır, onların dəyişdirilməsinə və yenisi ilə əvəz olunmasına heç bir ehtiyac yoxdur. Mövcud nömrələr qüvvədə qalır, vətəndaşlardan əlavə müraciət və ya nömrə dəyişikliyi tələb olunmur. Yeni standart sadəcə bundan sonra hazırlanacaq nömrə nişanlarının dizaynına şamil edilir və köhnə nömrələrin hüquqi statusuna təsir göstərmir”.
Qeyd edək ki, əvvəllər nəqliyyat vasitəsinin dövlət qeydiyyat nişanlarında rəqəm və hərflər arasında istifadə olunan defis işarəsi olmasa həmin sürücü cərimələnirdi. İndisə həmin defis işarəsi ləğv olunur. Maraqlıdır, vaxtilə məlum elementə görə cərimələnənlərin cəriməsi geri qaytarıla bilərmi?
“Qanun nə zamandan qüvvəyə minirsə icraat həmin müddətdən sonrakı dövrə şamil olunur, geriyə aiddiyyəti olmur”
Hüquqşunas Şəmsəddin Əliyev “Bakı-Xəbər”ə şərhində bildirdi ki, “Normativ hüquqi aktlar haqqında” qanunda qeyd edilib ki, qanunun geriyə qüvvəsi olmur: “Qanunvericiliyə edilən dəyişiklikdə hər bir detal xırdalıqla qeyd edilib. Belə ki, əvvəl alınan nömrələrə hər hansı bir məhdudiyyət yoxdur. Cərimələrin bağışlanması məsələsi mümkün olmayan bir variantdır. Çünki bu, qanunda göstərilməyib. Ancaq onu da deyim ki, cari il konstitusiya ilidir. Konstitusiyanın 12-ci maddəsində vətəndaşların hüquq və azadlıqlarının və onların layiqli həyat səviyyəsinin təmin olunması dövlətin ali məqsədi kimi təsbit edilib. Məhz bu maddənin dövlətin ali məqsədinə istinad edib, o cərimələri ləğv etmək olar”.
Həmsöhbətimiz onu da əlavə etdi ki, qanun nə zamandan qüvvəyə minirsə, icraat həmin müddətdən sonrakı dövrə şamil olunur, geriyə aidiyyəti olmur.
Günel CƏLİLOVA
