Elçin Bayramlı: “Dövlət xəstəxanalarında stomatoloji xidmətlə bağlı keyfiyyət yaxşı deyil”
“Ölkədə vətəndaşların inanmadığı yetərincə stomatoloq var. Bu da onların fəaliyyətinin və iş keyfiyyətinin aşağı olduğunu göstərir. Stomatoloqlara yayda ciddi xəbərdarlıq etmişdik. İlin əvvəlindən stomatoloqların xidməti haqqında əlimizdə faktlar var”.
Bunu TƏBİB-in icraçı direktoru Vüqar Qurbanov brifinqdə jurnalistlərin suallarını cavablandırarkən deyib.
O qeyd edib ki, ölkə üzrə elə tibb müəssisələrimiz var, bir vətəndaş müraciəti yoxdur: “Bölgələrdə bəzi tibb müəssisələrində stomatoloq ştatının ləğv olunması ilə bağlı xəbərdarlıq edilib. Bu proseslər qanunvericiliyə uyğun aparılır".
TƏBİB-in icraçı direktoru qeyd edib ki, bölgələrdə dövlət tibb müəssisələrində stomatoloqlara müraciət olunmur. Maraqlıdır, niyə bölgələrdə dövlət xəstəxanalarında çalışan diş həkimlərinə müraciə edilmir? Ancaq onu da bildirək ki, stomatoloqlar günün birinci yarısı dövlət xəstəxanalarında, ikinci yarısını isə özəllərdə çalışır. Maraqlı məqam ondan ibarətdir ki, özəllərdə çalışan həmin stomatoloqların qəbuluna çoxlu sayda xəstə gedir. Bu halın yaranmasının səbəbi nədir? Dövlət xəstəxanalarında stomatoloji xidmətin keyfiyyəti ilə bağlı problem var, yoxsa başqa səbəblər?
Sosioloq Elçin Bayramlı “Bakı-Xəbər”ə şərhində bildirdi ki, dövlət xəstəxanalarında stomatoloji xidmətlə bağlı keyfiyyət yaxşı deyil: “Müasir standartlara cavab verən aparatlar yoxdur. Olanlar isə gigiyenik cəhətdən elə də təmiz deyil. Stomatoloji xidmət sahəsində mükəmməl durum, yüksək keyfiyyət özəl klinikalarda müşahidə olunur. Ümumiyyətlə, Azərbaycanda stomatologiya üzrə xidmət əksər ölkələrdən üstündür. Bura iş keyfiyyəti, texniki vəziyyət daxildir. Xarici ölkələrdən stomatoloji xidmətlə bağlı ölkəmizə müraciət edənlər az deyil. Ancaq bu hal özəl klinikalarda, fərdi fəaliyyətlə məşğul olan stomatoloji kabinetlərdə müşahidə olunur. Dövlət xəstəxanalarında formal olaraq həkimlər olur, adi prosedurlar icra olunur. Burda diş çəkilmə, dişə baxılma kimi işlər görülür. Bu səbəbdən də dövlət xəstəxanalarına az sayda müraciət olunur. İnsanlar yaxşı keyfiyyət əldə etmək üçün özəl klinikalarda çalışan diş həkimlərinə müraciət edir”.
Həmsöhbətimiz qeyd etdi ki, stomatologiya Azərbaycanda tibbin ən inkişaf etmiş sahələrindən biridir: “Yaxşı olar ki, dövlət xəstəxanalarının stomatoloji kabinetləri müasir avadanlıqlarla təmin olunsun. Xidmət keyfiyyətinin artırılması üçün müəyyən işlər görülməlidir”.
Sosioloq onu da əlavə etdi ki, stomatoloji xidmət sığorta paketinə daxil olunmalıdır. Bu elə bir sahədir ki, insanların daim ehtiyacı olur, aztəminatlı ailələr bu xidmətdən rahat şəkildə istifadə edə bilsin.
Günel CƏLİLOVA
