Elçin Əfəndi: “Zamanla təhsil müəssisələrinin bir neçəsi bağlanacaq”
Son günlər universitetlərdə pedaqoji fakültələrin sayının azaldılması ictimaiyyətdə geniş müzakirələrə səbəb olub. Qeyd edək ki, bu məsələ həm gələcək müəllim kadrlarının hazırlanması, həm də ümumi təhsil sisteminin keyfiyyəti baxımından ciddi önəm daşıyır.
Məlumdur ki, hazırda ölkədə müəllim sayı çoxdur. Uzun illər universitetlərimizdə müəllimlərin buraxılış sayı həddindən çox olub və bu, cəmiyyətdə işsizliyə təsir edib. Bu səbəbdən də bəzi universitetlərdə qəbul sayının azaldılması gözlənilir.
Onu da bildirək ki, son illərdə pedaqoji ixtisaslara marağın artması, lakin məzunların böyük bir qisminin müəllim kimi işlə təmin olunmaması, eləcə də müəllim yüklərinin bölgələr üzrə qeyri-bərabər paylanması bu sahədə kəmiyyətə deyil, daha çox keyfiyyətə üstünlük verilməsini gündəmə gətirib.
“Əmək bazarında pedaqoji kadr ehtiyatının kifayət qədər çox olması işə qəbul meyarlarına da təsir edəcək”
Universitetlərdə pedaqoji ixtisasların sayının azalması barədə fikir bildirən təhsil eksperti Elçin Əfəndi “Bakı-Xəbər”ə şərhində bildirdi ki, 5-6 il sonra I sinfə gedəcək şagird sayı 100000 nəfərə yaxın olacaq ki, bu da pedaqoji ixtisaslarda plan yerlərinin qarşıdakı illərdə azalması qərarının alınması deməkdir: “Bu il artıq bəzi ixtisaslarda bunu müşahidə etdik. Təbii artımın azalması təhsil sferasında bir neçə dəyişikliyə səbəb olacaq. Bir müddət əvvəl də dediyim kimi, ilk növbədə məktəbəqədər təhsildə pedaqoji heyətdə ixtisarlar başlanacaq. Ardınca ibtidai sinif müəllimliyinə təsir göstərəcək. Ondan sonrakı mərhələdə digər fənn müəllimlərinə təsir göstərəcək. Əmək bazarında pedaqoji kadr ehtiyatının kifayət qədər çox olması işə qəbul meyarlarına da təsir edəcək. Ehtimalım odur ki, məktəbəqədər təhsil istiqamətində bir neçə il sonra yalnız ali təhsilli şəxslər, ibtidai və yuxarı siniflərdə isə yalnız ali təhsil və təkcə bakalavr deyil, magistr təhsili də tələb kimi qoyulacaq”.
Ekspert hesab edir ki, zamanla təhsil müəssisələrinin bir neçəsi bağlanacaq (artıq optimallaşdırma və rasionallaşdırma prosesi ilə buna başlanılıb). 2030-cu və sonrakı illərdə bunları daha aydın görəcəyik.
Günel CƏLİLOVA
