Mətləb Salahov: “Göstəriş sahibini qoyub çarəsiz fəhləni 2 min manat cərimələmək hansı məntiqin “məhsuludur”?
Gəncə Dövlət Universitetinin nəzdində fəaliyyət göstərən Regional Kollecin həyətində ağacın kəsilməsi ilə bağlı cərimə tətbiq edilib. Belə ki, Ekologiya və Təbii Sərvətlər Nazirliyinin 10 saylı Regional Ekologiya və Təbii Sərvətlər İdarəsi tərəfindən aparılan yoxlama zamanı kollecin həyətində bir ədəd aylant ağacının kəsildiyi müəyyən edilib.
Ağacın kəsilməsinə görə kollecdə fəhlə işləyən şəxsə 2 min manat məbləğində cərimə yazılıb. Lakin cərimələnən şəxs və kollecin rəhbərliyi qərarla razılaşmayaraq bildiriblər ki, ağac quruduğu üçün kəsilib.
Maraqlı məqam ondan ibarətdir ki, rəhbərlik bir kənarda qalıb, fəhlə cərimələnib. Məlumdur ki, işin icrası tapşırığını rəhbərlik işçiyə tapşırır. Fəhlə də kiminsə göstərişini icra edib. Amma nəticədə rəhbərlik əvəzinə fəhlə cərimələnib. Onu da nəzərə almaq lazımdır ki, kəsilən ağac Gəncə Dövlət Universitetinin nəzdində fəaliyyət göstərən Regional Kollecə məxsusdur. Belə olan halda cərimələnməli şəxs rəhbərlik olmalıdır.
“Ola bilər ki, müəssisə rəhbərliyi daha böyük məbləğdə cərimədən yayınmaq üçün fəhləni “qurban” seçib”
Jurnalist-ekspert Mətləb Salahov “Bakı-Xəbər”ə şərhində bildirdi ki, son illər ölkəmizdə yaşıllıqların salınması, ekoloji təhlükəsizliyin qorunması üçün görülən işlər həqiqətən diqqət və qiymətə layiqdir. Bu proses Bakı kimi kütləvi insan axınına məruz qalan şəhər üçün olduqca vacib məsələdir: “Nəzərə alsaq ki, hündürmərtəbəli binaların durmadan artdığı bu şəhərdə adambaşına düşən oksigen ehtiyacı da artır, o zaman yaşıllıqların insan həyatındakı yerini daha aydın şəkildə dərk etmək mümkündür. Bu sözlər digər şəhər və rayonlarımız üçün də keçərlidir. Xüsusilə qanunsuz ağac kəsiminə qarşı bölgələrdə aparılan mübarizə olduqca təqdirəlayiq işdir. Lakin elə hallar olur ki, bəzən kəsilən cərimələr ədalətdən kənar olur, bir çox hallarda isə həqiqəti əks etdirmir. Bir neçə gün öncə Gəncə Dövlət Universitetinin nəzdində fəaliyyət göstərən Regional Kollecin həyətində ağacın kəsilməsinə görə əsl göstəriş sahiblərinin deyil, məhz fəhlənin 2 min manat cərimələnməsi dediklərimə tam sübutdur.
Regional Ekologiya və Təbii Sərvətlər İdarəsi tərəfindən aparılan yoxlama zamanı bir ədəd ağac kəsimi qeydə alınıb və ənənəvi asan “cəza üsulu” kimi göstəriş icra edən fəhlə hədəfə alınıb. Ən təəccüblüsü odur ki, fəhlə məhkəməyə müraciət etsə də, iddiası rədd edilib. Maraqlıdır: nədən məhkəmə ağac kəsiminə göstəriş verənləri deyil, bu işin çarəsiz icraçısı olan fəhləni cəzalandırır? Bəs hüququn aliliyi, əsaslı araşdırma və təhqiqat harda qaldı? Nədən Ekologiya və Təbii Sərvətlər Nazirliyi işin əslini araşdırmadan tez-tələsik belə qərar verir?
Nədən Kollecin həyətindəki ağacı kəsən fəhlənin bu addımı kimin göstərişi ilə atdığı araşdırılmayıb? Ola bilər ki, müəssisə rəhbərliyi daha böyük məbləğdə cərimədən yayınmaq üçün fəhləni “qurban” seçib. Axı bu cür qərarlar artıq ictimai rəydə ətraf mühiti, ekologiyanı qorumalı olan quruma qarşı haqlı etirazlar yaradır. Eyni zamanda, bu cür məhkəmə qərarları insanların ədalətə olan inamını da sarsıdır.
Ətraf mühitin və ekoloji təhlükəsizliyin daima diqqət mərkəzində olduğu bir dövrdə Ekologiya və Təbii Sərvətlər Nazirliyinin addımları daha çox cəmiyyət üçün nümunəvi xarakter daşımalıdır. Unutmayaq ki, cəza kəsmək çox asandır, əsl günahkarları cəzalandırmaq isə ədalətin və hüququn qələbəsidir”.
Leyla QARAXANLI
