Noyabrın 16-da Mingəçevir Dövlət Universiteti (MDU), Gənclər və İdman Nazirliyinin təşkilatçılığı və Azərbaycan Velosiped İdmanı Federasiyasının (AzVİF) tərəfdaşlığı ilə reallaşdırılan “Velopark – sağlam gənclik, yaşıl kampus” layihəsinin təntənəli açılış mərasimi keçirilib.
MDU-nun yeni “2030 İnkişaf Strategiyası” və “Yaşıl kampus” konsepsiyası çərçivəsində gənclərin fiziki aktivliyinin artırılması və ekoloji məsuliyyətin təşviqini hədəfləyən layihənin təqdimat mərasimində gənclər və idman naziri Fərid Qayıbov, AzVİF-in vitse-prezidenti Fikrət Hacıyev, MDU-nun rektoru Anar Eminov, Mərkəzi Aran Regional Gənclər və İdman İdarəsi və Mingəçevir şəhər Təhsil Sektorunun rəhbər şəxsləri və nümayəndələri eləcə də, MDU-nun akademik-inzibati heyəti, tələbə və magistrantlar, şəhərin ümumtəhsil məktəblərinin direktorları, ictimaiyyət və media nümayəndələri iştirak ediblər. Tədbir rəmzi veloyürüşlə başlayıb. 70 fəal tələbə qızlardan ibarət qrup MDU-nun əsas tədris binasının qarşısından start götürərək Kür Olimpiya Tədris-İdman Mərkəzinin (OTİM) qarşısında finiş edib. Tədbirdə Ümummilli Lider Heydər Əliyevin, Vətən uğrunda şəhid olmuş qəhrəmanlarımızın və 11 noyabr tarixində təyyarə qəzasında həlak olan türkiyəli hərbçilərin əziz xatirəsi bir dəqiqəlik sükutla yad edilib və Azərbaycan Respublikasının Dövlət Himni səsləndirilib. MDU-nun rektoru Anar Eminov çıxışında layihənin ölkəmizdə sağlam həyat tərzinin təşviqi və gənclərin idmana cəlb olunması istiqamətində həyata keçirilən dövlət siyasətinə uyğun olduğunu qeyd edib. O, layihənin MDU-nun strateji hədəfləri ilə uzlaşdığını, xüsusilə regionlardan olan qız tələbələrin sosial fəallığının və fiziki aktivliyinin artırılmasına mühüm töhfə verəcəyini vurğulayıb. Mingəçevir Təhsil sektorunun müdiri Sevinc Həsənova layihənin təhsiln tərkib hissəsi kimi Mingəçevirdə gənclərin fiziki aktivliyinin, sosial inteqrasiyasının və sağlam həyat tərzi vərdişlərinin gücləndirilməsinə mühüm töhfə verəcəyini qeyd edib. O, belə təşəbbüslərin davamlı olmasının şəhərdə gənclərin inkişaf mühitini daha da zənginləşdirəcəyini vurğulayaraq layihənin bütün tərəfdaşlarına təşəkkürünü bildirib. Layihə çərçivəsində velosipedlərin universitetə təqdim olunmasını simvolizə edən lentkəsmə mərasimi keçirilib. Daha sonra layihənin təşkilati işlərində fəallığı ilə seçilən şəxslərə təşəkkürnamələr təqdim olunub, layihəyə seçilən 70 qız tələbəyə isə iştiraklarına görə sertifikatlar verilib.
Layihə cari ilin 10 sentyabrında elan edilib və 400-dən çox tələbə qız müraciət edib. Seçim mərhələlərini uğurla başa vuran iştirakçılar maarifləndirici təlimlərdə, velosürüş kurslarında və şəhər turlarında iştirak edərək öz bilik və bacarıqlarını təkmilləşdiriblər.
Bu fəaliyyətlər yalnız idman vərdişlərinin artırılmasına deyil, həm də komanda ruhu, liderlik, təhlükəsizlik mədəniyyəti və ekoloji məsuliyyət kimi dəyərlərin formalaşdırılmasına xidmət edib. Layihənin sonunda formalaşan yeni velosipedçi qızlar qrupu MDU-nun “Yaşıl kampus” hərəkatının fəal simalarından birinə çevrilib. Məlumata görə, “Velopark – sağlam gənclik, yaşıl kampus” layihəsi Mingəçevir Dövlət Universitetində təkcə yeni idman məkanının istifadəyə verilməsi deyil, həm də sağlamlıq, ekoloji düşüncə və tələbə həmrəyliyi kimi dəyərlərin möhkəmlənməsi baxımından mühüm addımdır. Layihənin növbəti mərhələlərdə daha geniş tələbə auditoriyasını əhatə edəcək və MDU-nun yaşıl, sağlam və müasir kampus modelinə doğru inkişafını sürətləndirəcəkdir.
