Ramin Qafarov: “Azərbaycanın quru sərhədlərinin bağlı olması Avropadan gələn turistlərin sayının az olmasına öz təsirini göstərib”
Gəlmə turizmi bütün dünyada turizm sektorunun prioritet sahələrindən biridir. İqtisadiyyatın ən perspektivli və dinamik inkişaf edən sahəsi olmaqla yanaşı, ölkələrin tanınması istiqamətində də mühüm rol oynayır.
Azərbaycan da təbii sərvətlərin müxtəlifliyi və mədəni-tarixi irs obyektlərinin olması baxımından müxtəlif turizm növlərini inkişaf etdirmək üçün unikal imkanlara malikdir. Zəngin tarixə və infrastrukturun yüksək inkişaf tempinə malik ölkələrə isə əcnəbilərin marağı həmişə böyük olur. Azərbaycan hər zaman xarici turistlərin marağında olub. Bunu açıqlanan statistik rəqəmlər də təsdiq edir. Ancaq son zamanlar ölkəmizə gələn turistlərin sayı azalıb. Bu ilin yanvar-sentyabr aylarında Azərbaycana Avropa ölkələrindən 167 740 turist səfər edib. Bu, ötən ilin eyni dövrü ilə müqayisədə 21,7 % azdır. O cümlədən, hesabat dövründə Şərqi Avropa ölkələrindən Azərbaycana 84 258 turist gəlib. Bu da 1 il əvvələ nisbətən 21,5 % azdır. Şərqi Avropa ölkələri arasında ən çox turist Ukraynadan gəlib - 27 908 nəfər. Bu, illik müqayisədə 22,8 % azdır.
Bundan əlavə, Belarusdan 20 937 nəfər (-20,4 %), Polşadan 8 266 nəfər (-19,6 %), Moldovadan 3 581 nəfər (−26,7 %), Macarıstandan 3 508 nəfər (-10,1 %), Rumıniyadan 2 841 nəfər (−18,9 %), Çexiyadan 2 801 nəfər (+4,6 %), Litvadan 2 174 nəfər (−39,7 %), Bolqarıstandan 2 003 nəfər (-25,9 %) Latviyadan 1 861 nəfər (−32,3 %), Serbiyadan 1 590 nəfər (-25,2 %), Slovakiyadan 1 440 nəfər (−32,5 %) Estoniyadan 1 426 nəfər (−20,6) Xorvatiyadan 1 284 nəfər (-4,5 %), , %), Sloveniyadan 664 nəfər (-1,6 %) Kiprdən 571 nəfər (+6 %), Monteneqrodan 413 nəfər (+7,6 %), Bosniya və Hersoqovinadan 390 nəfər (-25,7 %), Şimali Makedoniyadan 314 nəfər (-10,5 %), Albaniyadan isə 286 nəfər (−38,1 %) turist gəlib. 9 ay ərzində Qərbi Avropa ölkələrindən isə Azərbaycana 83 482 nəfər turist gəlib. Bu da ötən ilin eyni dövrünə nisbətən 21,8 % azdır.
Maraqlıdır, Avropa ölkələrindən gələn turistlərin sayı niyə azalıb?
“Avropalı turistlər adətən büdcə turizminə üstünlük verir, yəni onlar bir ölkəyə gəlirsə, ardınca ona qonşu ölkələrə də...”
Turizm eksperti Ramin Qafarov “Bakı-Xəbər”ə şərhində bildirdi ki, Azərbaycana gələn əcnəbi turistlərin sayının azalmasının müəyyən səbəbləri var: “Azərbaycana turistlərin böyük hissəsi yay mövsümündə gəlir. Ölkəmizdə quru sərhədlərin bağlı qalması ölkəyə gələn turistlərin sayına təsir göstərir. Avropalı turistlər adətən büdcə turizminə üstünlük verir. Yəni onlar bir ölkəyə gəlirsə, ardınca ona qonşu ölkələrə də səfər etməyi xoşlayır. Məsələn, Azərbaycana gələn turist quru yolla Gürcüstana, ordan Türkiyəyə keçməyi planlaşdırır. Bu mənada Azərbaycanın quru sərhədlərinin bağlı olması Avropadan gələn turistlərin sayının az olmasına öz təsirini göstərib”.
Günel CƏLİLOVA
