Sədaqət Tağıyeva: “Naxçıvan şəhər İnzibati Məhkəməsinin çıxaracağı qərarın xeyrimə olacağına, təhsilimi Şərurda davam etdirəcəyimə inanıram”
Türkiyənin İstanbul şəhərində fəaliyyət göstərən Hüseyn Cavid adına məktəbdə 8 il təhsil alan, 9-cu sinfi Azərbaycanda - Bakı şəhəri Suraxanı rayonundakı 89 saylı tam orta məktəbdə bitirən və Bakıda 9 illik təhsilini başa vuraraq attestatını götürüb doğma yurdu Şərura qayıdaraq 10-11-ci sinifləri orada təhsil almaq istəyi ilə Naxçıvan Muxtar Respublikanın Təhsil Nazirliyinə müraciət edən, lakin müsbət cavab almayan Tağıyeva Sədaqət İntiqam qızının üzləşdiyi problem barədə yazmışdıq.
Onu da qeyd etmişdik ki, Naxçıvan MR təhsil naziri Elxan Nəcəfov Tağıyeva Sədaqət İntiqam qızının 18 yaşında olduğuna görə məktəbə qəbulunun qeyri-mümkün olduğunu, Bakıda verilən attestatın isə saxta olduğu bildirib.
Sədaqət Tağıyevanın Şərur rayonunda 10-11-ci siniflərdə oxuması təmin olunmasa da, o, hazırda Sabunçu rayonun Kürdəxanı qəsəbəsindəki məktəblərdən birində 10-cu sinifdə oxuyur. Amma onun arzusu təhsilini doğma rayonunda davam etdirməkdir.
“Bütün aidiyyəti qurumlardan hüquqlarımın bərpa olunmasına dəstək göstərmələrini xahiş edirəm”
Sədaqət Tağıyeva “Bakı-Xəbər”ə müsahibəsində bildirdi ki, əslən Şərur şəhərindəndir, valideynləri işləmək məqsədilə qardaş Türkiyəyə gedib, o da 2006-cı ildə İstanbul şəhərində doğulub. Ailəsinin sosial vəziyyətinin pis olduğunu deyən Sədaqətin sözlərinə görə, birinci sinfə gec getməsinin də kökündə ailəsinin durumu, sənəd problemi və sair durur: “Valideynlərim sosial şəraitlərinin pis olması, imkansızlıq səbəbindən Türkiyəyə köçüblər, mən də orda doğulub böyümüşəm. Şəxsiyyətimi təsdiq edən sənədim olmadığı üçün Türkiyədə məktəblərə gedə bilmədim. İstanbulda Hüseyn Cavid adına məktəb açılanda 1-ci sinfə getdim. 1-ci sinfə 11 yaşımda getmişəm. 11 yaşımda 1-ci sinfə getmək mənim günahım deyil ki... Kaş ki, mən də başqa uşaqlar kimi 6 yaşımda məktəbə gedəydim.
8-ci sinfi İstanbulda Hüseyn Cavid adına məktəbdə bitirdikdən sonra Naxçıvana qayıtdım. Təhsilimi davam etdirməyim üçün Şərur rayon təhsil şöbəsinə müraciət etdim. Ordan da mənə şifahi şəkildə dedilər ki, sənin 18 yaşın tamam olub, icbari məktəb yaşını davam etdirə, əyani şəkildə təhsil ala bilməzsən. Sonra şöbəyə yazılı müraciət edib bildirdim ki, heç vaxt təhsildən yayınmamışam, ardıcıl şəkildə məktəbə getmişəm. Şərur rayon təhsil şöbəsindən “yox” cavabı aldıqdan sonra Bakıya gəlməyə məcbur oldum. Ailəmiz çox imkansızdır, aztəminatlıdır. Bakıya gəlməklə onları da maddi cəhətdən çətin vəziyyətdə qoydum. Bakı Şəhər Təhsil İdarəsinə ərizə ilə müraciət etdim, ərizəmi qəbul etdilər, bilik səviyyəmi müəyyən etmək məqsədilə 258 saylı məktəbdə imtahan verdim, nəticələrim çox yaxşı oldu, komissiyadan keçdim. Suraxanı rayonundakı 89 saylı məktəbdə 9-cu sinfi oxudum və təhsilimi bitirib attestatımı aldım. Sonra yenə də Naxçıvana qayıtdım. Yenə də Şərur rayon təhsil şöbəsinə müraciət etdim ki, 10-11-ci sinifləri öz rayonumda davam etdirməyimə şərait yaratsınlar. Şöbə ərizəmi götürsə də, sonra mənə bildirildi ki, Naxçıvanın Təhsil Nazirliyindən imtina verilib. Dedilər ki, səbəbini nazirliyin özündən öyrənin. Nazirliyə getdik, nazirin özünün də qəbulunda olduq, nazir mənə attestatımın “etibarsız” olduğunu bildirdi, saxta olduğunu dedi. Mənə orda qeyri-rəsmi qurumda təhsil aldığım və buna görə də 9-cu sinfi Bakıda oxumamalı olduğum bildirildi. Nazirliyin mənfi cavabından sonra yenə Bakıya gəldim, hazırda Kürdəxanı qəsəbəsində 113 nömrəli məktəbdə 10-cu sinifdə oxuyuram”.
Sədaqət deyir ki, bir məsələni heç cür anlaya bilmir - Azərbaycanın bir tərəfində ona təhsilinin davam etdirilməsi üçün heç bir maneə törədilmir, əksinə, imkanlar açılır, amma Azərbaycanın başqa bir tərəfində onun orta məktəbi başa vurmasına süni əngəllər törədilir. “Mənə müəmmalı qalan budur ki, Bakıda heç bir problemlə qarşılaşmadan təhsilimi davam etdirə bilirəm, amma Naxçıvanda etdirə bilmirəm. Bura da Azərbaycandır, ora da. Amma bu fərq niyə var? Anlaya bilmirəm”. Hüseyn Cavid adına məktəbdə oxuyub sonra Azərbaycana köçən başqa şagirdlərin də Naxçıvanda analoji münasibətlə üzləşdiyini deyən S.Tağıyeva qeyd etdi ki, Hüseyn Cavid adına məktəbdə çox yüksək səviyyədə dərs keçilir, şagirdlərin heç biri hazırlığa getmir. S.Tağıyevanın sözlərinə görə, o şagirdlər də vaxtilə imkansızlıq üzündən onun kimi məktəbə gec gedənlərdir və indi Naxçıvanda onlara da deyilir ki, məktəbdə oxuya bilməzsiniz, yalnız eksternat imtahanlar yolu ilə 11 illik attestat ala bilərsiniz. “Onlar da mənim kimi məktəbə gec gediblər. Naxçıvan Təhsil Nazirliyinin bu mənfi münasibəti bizim üçün həm də bir psixoloji basqı oldu. Mənə psixoloji basqılar göstərildi. Ümumiyyətlə, bu münasibətlə razılaşmıram və sona qədər hüquqlarımın bərpası uğrunda mübarizə aparacağam.
Noyabrın 13-də Bakı Şəhər Təhsil İdarəsində oldum. Mən Naxçıvanda orta təhsilimi davam etdirməklə bağlı pozulmuş hüquqlarımın bərpasına nail olmaq üçün oktyabr ayında Naxçıvan şəhər İnzibati Məhkəməsinə iddia ərizəsi ilə müraciət etmişəm. Məhkəmədən də Bakı Şəhər Təhsil İdarəsinə sorğu göndərilib. Naxçıvan Təhsil Nazirliyi ilə yanaşı Bakı Şəhər Təhsil İdarəsi də məhkəmənin sorğusuna cavab verməlidir. Naxçıvanın İnzibati Məhkəməsinə gedəcək rəyin-cavabın bir nüsxəsini biz götürməliyik. Ona görə ora getmişdim. Ümidim var ki, Bakı Şəhər Təhsil İdarəsi mənimlə bağlı müsbət rəy verəcək.
Naxçıvan şəhər İnzibati Məhkəməsinin çıxaracağı qərarın xeyrimə olacağına, təhsilimi Şərurda davam etdirəcəyimə inanıram. Məqsədim odur ki, Şərurda oxuyum. Burda bizim evimiz yoxdur, sağ olsun, bibimlə birgə Şərqiyyə müəllimənin evində qalırıq, o bizə böyük dəstək göstərir. Amma Şərurda evimiz var, ora qayıtmaq, orda oxumaq istəyirəm. Biz maddi imkanı məhdud ailəyik. Əgər qalacaq yerimiz olmasaydı biz burada kirayədə yaşamağa məcbur olardıq. Bu isə valideynlərimin yükünü daha da ağırlaşdırardı”.
S.Tağıyevanın eksternat imtahan vermək istəməməsinə gəlincə, o bildirdi ki, bu tip imtahan təhsildən kənar qalmış, təhsilinə ara vermiş şəxslərə aiddir, onun isə təhsili davamlı olub. “Mən təhsilimə fasilə verməmişəm, davamlı olaraq oxumuşam, məktəbə 11 yaşımda getsəm də, 9 il oxumuşam, indi də 10-cu sinifdə oxuyuram. Hüseyn Cavid adına məktəbdə verilən təhsilə söz yoxdur. Dərslər çox ciddi keçirilir.
Təhsilimi davam etdirmək, oxumaq mənim hüququmdur. Bütün aidiyyəti qurumlardan hüquqlarımın bərpa olunmasına dəstək göstərmələrini, təhsilimin Naxçıvanda-Şərurda davam etdirməyimə kömək etmələrini xahiş edirəm. Hər kəsin oxumaq haqqı var, o şəxslərdən biri də mənəm. Lomonosov 19 yaşında 1-ci sinfə gedib və 4 ilə məktəbi bitirib. Mən də 19 yaşımda 10-cu sinifdə oxuyuram. Bu yaşda 10-cu sinifdə oxumaq mənim günahım deyil. Mən təhsilin yaşı olduğuna inanmıram, hər bir şəxs təhsil almalıdır, xüsusən də gələcəyin anaları olan qız uşaqları. Onu da deyim ki, Şərur rayon Təhsil Şöbəsindən bizə bildirilib ki, sizin burada təhsilinizi davam etdirməyinizə razıyıq, amma nazir sizin sənədə qırmızı işarə qoyub.
Biz Naxçıvanda olduğumuz müddətdə bütün dövlət qurumlarına, Ali Məclisə, Nazirlər Kabinetinə, Ombudsman Aparatına və sairə həm yazılı, həm də şifahi şəkildə müraciət etmişik. Ali Məclis müraciətimizə müsbət rəy bildirmədi. Çünki Naxçıvanın təhsil nazirinin onlara qulaq asmadığını dedilər”-deyə S.Tağıyeva bildirdi.
S.Tağıyevanın ailəsinin sosial durumu ağır olduğu üçün onun burada yaşaması sıxıntlar yaradır və Naxçıvana qayıdıb 10-cu sinfi orada davam etdirməsi ailəsinin artıq xərcdən xilas olması üçün yaxşı olardı.
Biz də ümid edirik ki, S.Tağıyevin üzləşdiyi problem tezliklə aradan qaldırılacaq və o, Şərur rayon məktəblərindən birində təhsilini davam etdirəcək.
İradə SARIYEVA
