İlqar Hüseynli: “Onkoloji xəstəliklərin daşıyıcısı olan insanlarımıza bu istiqamətdə dəstəyin nümayiş edirilməsi baxımından bu təklif, təbii ki, müsbət dəyərləndirilməlidir”
Azərbaycanda onkoloji xəstələrin sayının çoxalması, müalicənin həddən artıq baha başa gəlməsi, dərmanların qiymətinin çox olması bu xəstəlikdən əziyyət çəkənləri də, onların yaxınlarını da ciddi narahat edir. Onkoloji xəstəliklərin ödənişsiz müalicəsi hazırda mümkünsüz bir məsələdir, onların müalicəsi ailə büdcəsi hesabına başa gəlir.
Milli Məclisin səhiyyə komitəsinin sədri, akdemik Əhliman Əmiraslanov parlamentdəki çıxışlarında dəfələrlə təklif edib ki, onkoloji xəstəliklərin müalicəsi icbari tibbi sığorta zərfinə daxil edilsin.
O, parlamentin bir neçə komitəsinin ortaq iclasında “Azərbaycan Respublikasının 2026-cı il dövlət büdcəsi haqqında” qanun layihəsinin müzakirəsi zamanı yenidən bu məsələni gündəmə gətirib. “Təəssüf ki, icbari tibbi sığorta ilə əhatə olunan dövlət proqramlarının tərkibində onkoloji xidmət yoxdur. Büdcədən ayrılan vəsait də bu xəstələrin adekvat müalicəsi üçün yetərli deyil”-deyə Ə.Əmiraslanov bildirib.
Komitə sədri vurğulayıb ki, bu xəstələri müasir səviyyədə effektli müalicə etmək üçün target və immunterapiya dərman vasitələrinə ehtiyac duyulur: “Bu dərman vasitələrinin qiyməti isə kifayət qədər yüksəkdir. Ayrılan vəsait bu dərmanların alınıb Azərbaycana gətirilməsinə kifayət etmir. İmkan daxilində belə preparatların alınıb Azərbaycana gətirilməsinə əlavə vəsaitin ayrılması da nəzərdən keçirilməlidir. Çünki bu preparatlar olmadan onkoloji xəstələrin adekvat müalicəsi mümkün deyil. Bütövlükdə onkologiyanın problemi bu dövlət proqramının icbari dövlət sığortası ilə əhatə olunması ilə həll ediləcək”.
Belə görünür ki Onkoloji xidmətlər bu il də icbari tibbi sığorta proqramına daxil edilməyəcək. Üstəlik, çox bahalı dərmanların alınması üçün vəsait azdır. Bu baxımdan Əhliman Əmiraslanov çox yaxşı təklif verib.
“Bu olduqca vacib və əhəmiyyətlidir”
Sosial-iqtisadi sahə üzrə ekspert İlqar Hüseynli bildirdi ki, Ə.Əmiraslanovun qaldırdığı məsələ olduqca aktualdır: “Əhliman Əmiraslanovun bu təklifi ilə tanışam. Çox haqlı və vaxtında verilmiş təklifdir, bunun həyata keçirilməsi çox vacibdir. Səhiyyə və xəstəliklərin statistik məlumatına baxsaq0, Azərbaycanda ən çox əziyyət çəkilən və ölümlə nəticələnən iki xəstəlik daha öndə dayanır. Bunlardan biri ürək-damar xəstəlikləridir. Kardioloji sahədə çox irəliləyişlər var, amma təəssüf ki, vətəndaşlarımız müayinə və müalicə proseslərində bir o qədər diqqətli olmaması səbəbindən ürəkdən qəfil ölənlərin sayı kifayət qədərdir. Eyni zamanda ölümlə nəticələnən xəstəliklər sırasında onkoloji xəstəliklər də üstünlük təşkil edir. Onkoloji xəstəliklərin müalicəsi kifayət qədər bahalı dərman preparatları, bahalı əməliyyatlar tələb edir. Bununla da bağlı hesab edirəm ki, Azərbaycanda onkoloji xəstəliklərin müalicəsi ilə bağlı immunoloji dərman perepartlarının təchizatında dövlət büdcəsindən əlavə vəsaitin ayrılması və onkoloji xəstəliklərin daşıyıcısı olan insanlarımıza bu istiqamətdə maddi dəstəyin nümayiş edirilməsi baxımından bu təklif, təbii ki, müsbət dəyərləndirilməlidir. Hesab edirəm ki, bu olduqca vacib və əhəmiyyətlidir”-deyə İ.Hüseynli qeyd etdi.
İradə SARIYEVA
