Eyyub Hüseynov: “Dabaqdan ölmüş heyvanların əti müxtəlif yollarla satışa çıxarılır”
Məlum olduğu kimi, dabaq xəstəliyi ilə əlaqədar ölkədə ət qıtlığı yaranıb. Oktyabrın 25-dən etibarən heyvan bazarları fəaliyyətini dayandırıb. Azərbaycan Qida Təhlükəsizliyi Agentliyi (AQTA) həmin gündən ölkə üzrə bütün heyvan bazarlarının müvəqqəti bağlandığını rəsmən açıqlayıb.
Qurumun yaydığı məlumatda bildirilir ki, müxtəlif ölkələrdə xüsusi təhlükəli yoluxucu xəstəliklərin yayılması müşahidə olunur və bu hal region ölkələri, o cümlədən Azərbaycan üçün real risq yaradır. Qərara əsasən, heyvan bazarlarında dezinfeksiya, dezinseksiya və deratizasiya işləri aparılır. Tədbirlər tamamlandıqdan sonra bazarların fəaliyyəti mərhələli şəkildə bərpa ediləcək.
İaşə obyektlərində və şadlıq saraylarında ətlə hazırlanan təamlar müştərilərə təqdim edilir. Təqdim edilən ət yeməklərinin keyfiyyəti isə sahibkarların vicdanına qalıb. Hətta bu günlərdə AQTA şadlıq saraylarında mənşəyi məlum olmayan ətlər aşkarlayıb. Qurum lictimai iaşə obyektlərində və şadlıq saraylarında nəzarət tədbirlərini gücləndirib.
“İstehlakçı ət və ət məhsullarını təsadüfi kəsim yerlərindən deyil, iri marketlərdən almalıdır”
Mövzu ilə bağlı fikir bildirən Azad İstehlakçılar Birliyinin sədri Eyyub Hüseynov "Bakı-Xəbər"ə şərhində bildirdi ki, insanlar diqqətli olmalı, dövlət orqanları fəal iş aparmalıdırlar, xüsusən də fərdi təsərrüfatlarda daha ciddi işlər görülməlidir: "İnsanlar ət alan zaman onu evdə çoxlu qaynatsınlar. Dabaqdan ölmüş heyvanın əti tam bişməlidir, kabab şəklində yemək olmaz. Çünki onun içərisində törədicilər qala bilər. Rayonlarda insanlar pendirdən və sudan ehtiyatla istifadə etsinlər. Çünki yoluxmuş heyvanın südü də o virusu daşıyır. Süd yaxşı qaynadılıb istehlak edilməlidir. Dabaqdan ölmüş heyvanların əti müxtəlif yollarla satışa çıxarılır. Əlbəttə, ciddi mağazalar şəbəkəsində bunlar yoxdur. Lakin bəzi yerlərin bu ətlərdən istifadəsi gözləniləndir. Ona görə də əhali ehtiyatlı olsun”.
Həmsöhbətimiz onu da əlavə etdi ki, istehlakçı ət və ət məhsullarını təsadüfi kəsim yerlərindən deyil, iri marketlərdən almalıdır: “Nəzərə almaq lazımdır ki, iri ticarət mərkəzlərinə daxil olan məhsullara AQTA tərəfindən ciddi nəzarət edilir. Həmin məhsullar rəsmi satış icazəsi olmadan marketlərə daxil ola bilməz. Təsadüfi kəsim yerlərində isə nəzarət zəifdir. İstehlakçı bu cür kəsim məntəqələrindən ət almaqla sağlamlığını təhlükəyə atır".
Günel CƏLİLOVA
