İdman, bütövlükdə idman hərəkatı, idman yarışları, yerli və beynəlxalq idman oyunları gənclərin həm mənəvi, həm də fiziki inkişafını şərtləndirən amillərdən biri kimi daim aktualdır.
Azərbaycanda uşaq, yeniyetmə və gənclərin idmana çox böyük marağı var, deyərdik ki, bu proses ölkəmizdə kütləvi xarakter daşıyır. İdmanın bütün növləri gəncləri daim mənəvi və fiziki baxımdan güclü, özünə inamlı, nizam-intizamlı edən, pis vərdişlərdən, məsuliyyətsizlikdən uzaqlaşdıran bir vasitədir.
Bilirik ki, Azərbaycan idman ölkəsi kimi özünü çoxdan təsdiqləyib, Olimpiya hərəkatının öncüllərindən biri kimi daim diqqət mərkəzində olub. Habelə ölkəmizdə idmanın inkişafına xüsusi əhəmiyyət verilir və bu sahə bütövlükdə dövlət qayğısı ilə əhatə olunub. Azərbaycan idmançılarının yerli və regional əhəmiyyətli, o cümlədən də Olimpiya, Avropa, dünya çempionatlarında, yarışlarda iştirakı və qazandıqları uğurlar da uşaq və gənclərə bir örnəkdir. Heç şübhəsiz, onların uğurları uşaq və gənclərimizin kütləvi olaraq idmana cəlb olunmasında mühüm rol oynayır.
Bundan başqa, ölkəmizdə keçirilən beynəlxalq idman yarışlarının da bu istiqamətdə töhfələri az deyil. Uzun illərdir ki, Azərbaycan beynəlxalq yarışlara böyük uğurla ev sahibliyi etmək təcrübəsi əldə edib. İlk Avropa Oyunları, IV İslam Həmrəyliyi Oyunları, Formula1 Azərbaycan Qran Prisi paytaxt Bakının ev sahibliyi etdiyi ən mötəbər idman tədbirlərindəndir ki, bütün dünya o tədbirlərin yüksək səviyyədə təşkil edilməsini nümunə göstərir. Yeri gəlmişkən, bir neçə gün əvvəl paytaxt Bakıda Formula-1 Azərbaycan Qran-prisi keçirildi. İki gün davam edən idman tədbirini uşaq və gənclərimiz də böyük maraqla izlədilər.
İndi də Azərbaycan III MDB Oyunlarına ev sahibliyi etməyə hazırlaşır. III MDB Oyunları "Müstəqil Dövlətlər Birliyinin idman paytaxtı" elan edilən Gəncə şəhərində və ölkənin daha 6 şəhərində keçiriləcək. Açılış və bağlanış mərasimi və 8 idman növü üzrə yarışlar Gəncədə baş tutacaq. Yarışın 2025-ci ilin sentyabrin 28-dən oktyabrın 8-ə qədər keçiriləcəyi bildirilir. 8 ölkədən 1846 idmançının iştirakı təsdiqlənib. Yarışlar 23 idman növünü əhatə edəcək. Gəncədə 8, Mingəçevirdə 4, Qəbələdə 4, Şəkidə 3, Göygöldə 2, Yevlaxda 1 və Xankəndidə 1 idman növü üzrə yarışlar təşkil ediləcək. Oyunlarda MDB ölkələrinin idman heyətləri ilə yanaşı, Azərbaycan Hökumətinin dəvəti əsasında bir sıra digər ölkələrin idmançılarının da iştirakı gözlənilir.
III MDB Oyunlarının maskotları və şüarı bəlli olub- maskotlar "Bəbir" və "Leyla"dır, yarış isə "Hər qəlbdə bir qələbə" şüarı altında keçiriləcək.
Bildirək ki, III MDB Oyunlarına ciddi hazırlıq işləri həyata keçirilir. 2024-cü ilin aprel ayında Gəncə İdman Sarayının açılışı olub.
Onu da qeyd edək ki, Azərbaycan Baş nazirin müavini Samir Şərifov III MDB Oyunlarının Təşkilat Komitəsinin sədri, gənclər və idman naziri Fərid Qayıbov isə sədr müavini təyin olunub.
Ekspertlər bildirir ki, Azərbaycan dövləti bədən tərbiyəsi və idmanı inkişaf etdirməklə böyüməkdə olan gənc nəslin daha sağlam, fiziki cəhətdən güclü, mənən kamil, Vətənini və xalqını sevən gənclər kimi yetişməsinə nail olur. Bu gün dövlət uşaq və gənclərin hərtərəfli inkişafına diqqət və qayğı göstərməklə gələcək inkişaf perspektivlərinə xüsusilə diqqət yetirir. Hazırda uşaq, yeniyetmə və gənclərin mənəvi və fiziki inkişafında mühüm rol oynayan bədən tərbiyəsi və idmanın maddi-texniki bazasının yaradılması üçün böyük işlər görülüb. Bu proses hazırda da davam edir.
Azərbaycan Prezidenti İlham Əliyev uşaq və gənclərə daha yüksək səviyyədə dövlət qayğısını təmin etmək, onların fiziki və mənəvi cəhətdən inkişafına nail olmaq məqsədilə, ardıcıl olaraq bu istiqamətdə mühüm tədbirlər həyata keçirir. Prezident bədən tərbiyəsi və idmanın uşaq və gənclərin fiziki və mənəvi inkişafında mühüm rolunu önə çəkərək deyib: “Əlbəttə, bizə qələbələr, çempionlar lazımdır və bu bizdə var. Amma eyni zamanda, bizə sağlam gənclər, sağlam millət lazımdır. İdmanla məşğul olan uşaq, yeniyetmə fiziki cəhətdən sağlam olur. Eyni zamanda, yüksək mənəvi keyfiyyətlərə də malik olur”.
Azərbaycan dövlətinin uşaq və gənclərin fiziki və mənəvi cəhətdən sağlam tərbiyə olunmasına göstərdiyi diqqət və qayğınını hər birimiz hiss edirik. Bu gün təsadüfi deyil ki, təkcə paytaxtda deyil, respublikamızın bütün şəhər və rayonlarında idman kompleksləri, idman məktəbləri, məşq zalları və sair fəaliyyət göstərir. Ucqar kəndlərdə belə uşaqların idmanla məşğuliyyətinə şərait yaradılıb.
Ölkənin bütün regionlarında idmanın inkişafının, idman infrastrukturunun yüksək səviyyədə qurulmasının nəticəsidir ki, bölgələrimizdə də mötəbər idman oyunları keçirilir.
Qeyd edildiyi kimi, III MDB Oyunları məhz Azərbaycanın bölgələrində keçiriləcək. Beynəlxalq idman yarışlarının regionlarda baş tutması eyni zamanda orda yaşayan uşaq və gənclərə də müsbət təsir göstərəcək. Bütün hallarda, Azərbaycan gəncliyi onu fiziki və mənəvi anlamda inkişaf etdirən idmana ciddi şəkildə meyl göstərir.
Dediyimiz kimi, Azərbaycanın regionlarında beynəlxalq idman yarışlarının təşkili çox böyük əhəmiyyətə malikdir. Bu yarışların sırasına Şuşada şahmat, Suqovuşanda avarçəkmə və Zəngilanın Ağalı kəndi ətrafında triatlon yarışları, həmçinin Azərbaycanın azad edilmiş ərazilərində keçirilən beynəlxalq tədbirlər daxildir. Məlumata görə, bu cür tədbirlər ölkədə idmanın inkişafına, həmçinin beynəlxalq idman əlaqələrinin güclənməsinə töhfə verir. Bunların əhəmiyyəti haqqında ekspertlər bildirir ki, bu cür beynəlxalq tədbirlər regionlarda idmanın inkişafına, yeni idman obyektlərinin yaradılmasına və gənclərin idmana cəlb edilməsinə xidmət edir. Yarışların keçirilməsi, ölkənin idman potensialını nümayiş etdirir və beynəlxalq idman ictimaiyyətində maraq yaradır. Azad edilmiş ərazilərdə keçirilən yarışlar xüsusi rəmzi əhəmiyyətə malikdir, çünki bu, regionların yenidən həyatla doldurulmasının və inkişafının simvoludur. Bu barədə ekspertlər bildirir.
Gördüyünüz kimi, yerli, regional və beynəlxalq səviyyəli idman yarışlarının, idman oyunlarının ölkəmizin paytaxtında və bölgələrində keçirilməsi əsasən də gənclərin həyatında, fiziki və mənəvi həyatında mühüm rol oynayır.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
