Elxan Əliyev: “Əsasən texniki nasazlıqlar və şəbəkə uyğunsuzluğu sayğacın dəyişilməsinə səbəb olur”
Son illər əhalinin smart tipli qaz sayğaclarından istifadəsinin müsbət tendensiya kimi təqdim olunmasına çox rast gəlinirdi. Amma zamanla məsələyə münasibət dəyişdi. Smart tipli sayğaclar kütləvi şəkildə mexaniki sayğaclarla əvəz olunmağa başlayıb.
Sosial şəbəkədə yayılan məlumata əsasən, son günlər bir çox mənzildə smart-kart tipli sayğaclar mexaniki sayğaclarla əvəz edilir. Sakinlər bildirirlər ki, bu dəyişiklik bəzən onların icazəsi olmadan, hətta evdə olmadıqları zaman belə həyata keçirilir. Bu vəziyyət isə əhali arasında narazılığa səbəb olur.
Məlumat üçün bildirək ki, Azərbaycanda Smart-kart tipli sayğacların quraşdırılmasına 2012-ci ildən start verilib. Smart-kart sayğaclarının texniki göstəricilərində qeyd edilir ki, onun istismar müddəti 27 ildir. Ölkədə ilk quraşdırılan Smart-kart sayğacları cəmi 13 il xidmət göstərib, onların hələ 14 il qanuni istismar müddəti var.
Maraqlıdır, tətbiq edilən yeniliklər niyə sonuna qədər davam etdirilmir?
"Smart kart tipli sayğaclar 5 ildən bir yoxlamadan keçirilməlidir, bu sayğaclara çox adam qaz yükləyə bilmir, ona görə də…”
Sosial sahə üzrə ekspert Elxan Əliyev “Bakı-Xəbər”ə şərhində bildirdi ki, smart-kart tipli sayğacların mexaniki sayğaclarla əvəzlənməsinin müəyyən səbəbləri var: “Əsasən texniki nasazlıqlar və şəbəkə uyğunsuzluğu sayğacın dəyişilməsinə səbəb olur. Ancaq onu da deyim ki, smart sayğacların minimum istismar müddəti 20 ildən artıqdır. Azərbaycanda tətbiq olunan smart sayğaclar isə ən mükəmməlləridir. Dəyişilən smart sayğacların eləsi var ki, heç 5 il işləməyib və öz istismar müddətinin üçdə birini belə başa vurmayıb. Hazırda bu sayğaclar da mexaniki sayğacla dəyişdirilir.
Mexaniki sayğac belədir ki, nə qədər işlədirsən, o qədər də ödəyirsən. Smart-kart tipli sayğacda problem budur ki, gərək əvvəlcədən ödəniş edəsən. Ümumiyyətlə, smart kart tipli sayğaclar 5 ildən bir yoxlamadan keçirilməlidir. Bu sayğaclara çox adam qaz yükləyə bilmir. Bununla bağlı çoxlu şikayətlər, narazılıqlar olur. Ona görə həmin sayğaclar yoxlanılmalıdır. Amma mexaniki sayğacla məsələ asandır”.
Günel CƏLİLOVA
