Məlum olduğu kimi, sentyabrın 15-dən etibarən Bakı Dövlət Universitetində bəzi ixtisaslarda dərslər həftədə 4 gün keçirilir. Həmçinin, bu qərar Azərbaycan Memarlıq və İnşaat Universitetinin ( AZMİU) bəzi ixtisaslarında tətbiq olunur.
Maraqlıdır, ali təhsildə 4 günlük dərs həftəsi nə vəd edir?
Ilqar Orucov: “Dörd günlük dərs zamanı tələbələrin asudə vaxtı çox qalır və onların praktiki fəaliyyətlərə, layihə əsaslı öyrənməyə və tədqiqat işlərinə yönəlməsinə imkan yaradır”
Azərbaycan Gənc Alim, Doktorant və Magistrlər Cəmiyyətinin sədri, təhsil eksperti İlqar Orucov “Bakı-Xəbər”ə şərhində bildirdi ki, dörd günlük dərs qrafikinə keçid hazırda Avropa və ABŞ-ın bir sıra universitetlərində uğurla həyata keçirilir: “Bu sistem ilk olaraq BDU-da bəzi ixtisaslar üzrə tətbiq olunmağa başlayıb və geniş şəkildə tətbiq olunur. Ənənəvi beş günlük sistemdə gündə orta hesabla dörd saat dərs keçirilirdisə, dörd günlük sistemdə bu müddət beş-altı saata qədər artırılır. Ümumi dərs yükü eyni qalır, sadəcə olaraq dərslər daha intensiv şəkildə keçirilir”.
Həmsöhbətimiz onu da əlavə etdi ki, yeni sistemin bir sıra üstünlükləri var: “Dörd günlük dərs zamanı tələbələrin asudə vaxtı çox qalır və onların praktiki fəaliyyətlərə, layihə əsaslı öyrənməyə və tədqiqat işlərinə yönəlməsinə imkan yaradır. Tələbələr daha çox vaxtı təcrübə keçməyə, əlavə kurslara, startap layihələrinə və ya iş fəaliyyətinə sərf edə biləcəklər. Belə olan halda universitetlərin elmi potensialı da arta bilər və bu da olduqca əhəmiyyətlidir”.
Ekspert hesab edir ki, yeni qayda gələcəkdə digər universitetlərdə də tətbiq oluna bilər: “Bakı Dövlət Universitetinin bu təşəbbüsü strateji baxımdan əhəmiyyətli və nümunəvi bir addımdır. Universitet özünü yalnız ənənəvi metodlarla məhdudlaşdırmır, müasir təhsil tendensiyalarını tətbiq etməklə çevik idarəetmə nümunəsi göstərir. Bu, həm tələbələrin, həm də müəllimlərin inkişafı üçün geniş imkanlar açır və gələcəkdə digər ali məktəblər üçün də nümunə ola bilər”.
Rizvan Fikrətoğlu: “Dərs günləri azalırsa, qalan 4 gün dərs saatları çoxala bilər, bu isə tələbələrin 1 gündə çox yorulmasına və dərslərin səmərəsiz keçməsinə səbəb ola bilər”
Təhsil eksperti Rizvan Fikrətoğlu hesab edir ki, Bakı Dövlət Universitetində dərslərin 4 günə endirilməsinin həm müsbət, həm də mənfi cəhətləri var: “Müsbət tərəflərindən danışsaq, ümumiyyətlə 4 günlük dərs tələbələrə 1 gün əlavə vaxt qazandırır. Bunu da onlar əlavə kurslara, iş təcrübəsinə, araşdırmalara, şəxsi inkişaflarına sərf edə bilərlər. Burda nəqliyyat və xərclərin azalması məsələsi də var. Tələbələr şəhərdaxili yol xərclərinə, vaxt itkisinə və gündəlik yorğunluğa daha az məruz qalırlar. Bir çox tələbələr oxumaqla yanaşı, həm də işləyirlər. Əlavə boş gün onlara iş və dərsi daha yaxşı balanslaşdırmaq imkanı yarada bilər. Həmçinin dərslərin daha yığcam təkrar olması bəzi hallarda tələbənin diqqət toplamasına və dərs prosesinin daha planlı aparmasına şərait yarada bilər. Mənfi tərəfləri odur ki, dərs günləri azalırsa, qalan 4 gün dərs saatları çoxala bilər. Bu isə tələbələrin 1 gündə çox yorulmasına və dərslərin səmərəsiz keçməsinə səbəb ola bilər. Həmçinin mövzuların mənimsənilməsində tələbə çətinlik çəkə bilər. Gündə 6-7 saat mühazirə və seminar tələbənin diqqətini zəiflədə, öyrənmə keyfiyyətinə mənfi göstərə bilər. Bəzi ixtisaslar praktiki dərslərin saatını azalda bilər və dərs saatlarının sıxlaşdırılması keyfiyyətə zərər verə bilər. 5 və 6 günlük dərs rejiminə öyrəşmiş tələbələr üçün yeni cədvələ uyğunlaşmaq çətin ola bilər”.
Günel CƏLİLOVA
