İlqar Hüseynli: “Elektron sistem tam qaydasında olmadığı üçün bilet satışı ilə məşğul olan kassaları bağlamaq düzgün deyil”
Son günlər mediada "Azərbaycan Dəmir Yolları" Qapalı Səhmdar Cəmiyyətinin bir çox rayonlarında bilet satışı ilə məşğul olan kassaların ləğv edilməsi haqqında məlumat yayılıb. Bakı və Gəncə istisna olmaqla, bütün rayonların dəmiryol vağzallarında kassalar bağlanıb və kassirlər işdən kənarlaşdırılıb.
Rəhbərlik isə qərarı sərnişinlərin bileti onlayn almaları ilə əsaslandırıb. Ancaq qeyd edək ki, "Azərbaycan Dəmir Yolları" internet səhifəsindən onlayn bilet almaq olduqca çətindir və bir çox hallarda mümkün olmur. Sistemdə davamlı yaranan problemlər, donmalar haqqında dəfələrlə şikayətlər olunub.
Onu da bildirək ki, onlayn bilet almağı hər kəs bacara bilmir. Nəzərə almaq lazımdır ki, bölgələrdə yaşayan yaşlı nəslin nümayəndələri onlayn bilet ala bilmir, yeni qaydaları bilmir.
Maraqlıdır, onlayn bilet sistemi tətbiq olunduğu üçün kassirləri ixtisara salmaq nə dərəcədə doğrudur?
“Bölgələrdə bilet satışı ilə məşğul olan kassirlərin işdən azad olunması düzgün deyil, bu, əmək hüquqlarının pozulması deməkdir”
Sosial sahə üzrə ekspert İlqar Hüseynli “Bakı-Xəbər”ə açıqlamasında qeyd etdi ki, onlayn bilet satışı insanların rahatlığı üçün yaradılıb: “Digər nəqliyyat növlərində olduğu kimi, dəmir yolunda da biletin onlayn satılması yaxşı haldır. Ancaq bəzi məqamlar da nəzərə alınmalıdır. Bölgələrdə bilet satışı ilə məşğul olan kassirlərin işdən azad olunması düzgün deyil, bu, əmək hüquqlarının pozulması deməkdir. İşdən çıxarılan vətəndaşlara kompensasiya ödənilməlidir. Bununla yanaşı, həmin şəxslərə alternativ iş təklif olunmalıdır”.
Həmsöhbətimiz onu da əlavə etdi ki, insanlar yeni qaydaya uyğunlaşana qədər aidiyyəti qurum hibrid formada bilet satışını təşkil edə bilərdi: “Nəzərə almaq lazımdır ki, rayon yerlərində yaşayan yaşlı nəslin bir qismi elektron resurslardan tam şəkildə istifadə edə bilmir. Kassaları bağlamazdan öncə insanları yeniliyə alışdırmalı idi. Danılmaz faktdır ki, onlayn bilet satışı ilə məşğul olan portallarda tez-tez yüklənmələr, donmalar olur. Elektron sistem tam qaydasında olmadığı üçün bilet satışı ilə məşğul olan kassaları bağlamaq düzgün deyil”.
Leyla QARAXANLI
