Əkrəm Həsənov: “Adnan Əhmədzadə ilə yanaşı digər şəxslərin də məsuliyyət məsələsi həll edilməlidir”
Xəbər verdiyimiz kimi, SOCAR-ın İnvestisiya departamentinin sabiq rəhbər müavini, “Caspian Logistics Solutions” şirkətinin rəhbəri Adnan Əhmədzadə Dövlət Təhlükəsizliyi Xidmətinin əməkdaşları tərəfindən saxlanılıb və onun barəsində məhkəmənin qərarı ilə 4 aylıq həbs qərarı verilib. Adnan Əhmədzadənin həbsindən sonra onunla bağlı müxtəlif iddialar səsləndirilməkdədir.
Xatırladaq ki, A.Əhmədzadə Azərbaycanın enerji təhlükəsizliyini təhdid edən əməllərdə, Bakı neftinə kənar maddələr qatılması təxribatında və bir sıra mənimsəmə faktlarında ittiham olunur. Bu iddiaların bir çoxu artıq məhkəmə qərarları ilə təsdiqlənib. Onun barəsində 4 aylıq həbs-qətimkan tədbiri seçilib. Əhmədzadənin həbsi ölkə qanunlarını kobud şəkildə pozaraq "Azeri Light" markalı nefti digər xam neft məhsulları ilə qarışdırmaqda ittiham olunması ilə bağlıdır. Qeyd edək ki, bu əməl Azərbaycanın neft sənayesinin etibarlılığına və bazar şəffaflığına ciddi zərbə kimi qiymətləndirilir. Xatırladaq ki, adıçəkilən şəxs 2005-2019-cu illərdə SOCAR-da bir sıra məsul vəzifələr tutub. Belə olan halda bəzi suallar yaranır. Maraqlıdır, Əhmədzadənin qanunsuz əməllərinə, talançılığına görə SOCAR-ın həmin dövrlərdəki rəhbərliyi məsuliyyət daşıyırmı?
“Neft satışına kimlər nəzarət edib, kimlərin imzası varsa, onlar da məsuliyyətə cəlb olunmalıdır”
Hüquqşünas Əkrəm Həsənov “Bakı-Xəbər”ə açıqlamasında qeyd etdi ki, Azərbaycanda dövlət məmurları və vəzifəli şəxslərin böyük əksəriyyəti korrupsiya ilə məşğuldur. Lakin bu hallarda əsas məsələ korrupsiyanın miqdarıdır. Burada söhbət adi kiçik mənimsəmələrdən yox, çox böyük məbləğlərdən gedir: “Azərbaycanın imicindən danışırıq, dünyaya əsasən neft satırıq və bu sahədə nüfuzumuz var. Əhmədzadəyə qarşı irəli sürülən ittihamlar neft satışı ilə bağlıdır. Hər kəsə məlumdur ki, Azərbaycanda neft satışı ilə Dövlət Neft Şirkəti məşğuldur. Bu qurumda məlum proseslərə ən azı nəzarət etməli idi. Ümumiyyətlə, neft satışına kimlər nəzarət edib, kimlərin imzası varsa, onlar da məsuliyyətə cəlb olunmalıdır. Əhmədzadənin ittiham olunduğu maddədən bəlli olur ki, o bu işləri tək görməyib. SOCAR və digər qurumların icazəsi olmadan məlum işlər görülə bilməzdi. Məlum hadisə ilə bağlı SOCAR-ın əvvəlki heyəti də məsuliyyət daşıyır. Əhmədzadə ilə iş birliyində olmuş digər şəxslər də məsuliyyət daşıyır. Bu işdə əli olanlar cəzalandırılmayacaqsa, o zaman bizi vaxtaşırı belə cinayətlər gözləyir. Çünki cəzasızlıq özbaşınalıq yaradır. Xatırladım ki, Beynəlxalq Bankın sabiq rəhbəri Cahangir Hacıyev də sıradan bir hadisəyə görə həbs edilmədi, ancaq Hacıyev məsuliyyətə tək cəlb olundu. Onun fəaliyyətinə bərbad nəzarət etmiş Mərkəzi Bankın ovaxtki sədri Elman Rüstəmov və maliyyə naziri Samir Şərifov vəzifəsində qaldı. Bu hadisədə də analoji hal gözlənilir. Dediyim kimi, baş vermiş cinayət 1 nəfərin əməli deyil, böyük bir cinayətkar dəstənin əməlidir. Adnan Əhmədzadə ilə yanaşı digər şəxslərin də məsuliyyət məsələsi həll edilməlidir. Azərbaycan neftinə xlorid və ya digər maddə qatılsın və bunu aşağılarda kimsə özbaşına etsin? Burada mütəşəkkil qaydada törədilən cinayətin əlamətləri var. İstintaq yəqin ki, mütəşəkkil dəstənin bütün üzvlərini müəyyən edəcək”.
Günel CƏLİLOVA
