Ramin Qafarov: “Bu gün bölgələrdə fəaliyyət göstərən restoranlarda qiymətlər olduqca bahadır”
Turizm qeyri-neft sektorunun ən çox gəlir gətirən sahəsi olduğundan, ölkəmizdə onun inkişafına çox investisiyalar yatırılıb, infrastruktur qurulub.
Bu gün yüksək xidmət səviyyəsinə malik mehmanxanaların, çoxlu turizm firmalarının, informasiya və reklam strukturlarının varlığı, kadrların hazırlığı buna sübutdur.
Lakin çatışmazlıqlar da çoxdur. Ölkənin turizm sektorunda idarəetmədə, qiymət siyasətində, istifadəsi məqsədəuyğun sayılan obyektlərin seçimində bir sıra məsələlər ciddi yanaşma tələb edir. Elə bu səbəbdəndir ki, Azərbaycanda turizm qonşu ölkələrlə müqayisədə geri qalır. Bunun bir səbəbi də turistik bölgələrdə qiymətin baha olmasıdır. Belə ki, turistik bölgələrdə xidmət göstərən restoranlarda qiymət paytaxt Bakı ilə müqayisədə qat-qat bahadır. Bu da həm yerli turistləri, həm də xariciləri narazı salır.
“Uzunmüddətli və davamlı turizm üçün bu məsələ ciddi şəkildə nəzarətə götürülməlidir”
Turizm üzrə ekspert Ramin Qafarov “Bakı-Xəbər”ə şərhində bildirdi ki, turizmdə əsas məsələ rəqabətli mühitin olması və onun qiymətləri tənzimləyəcək əsas faktora çevrilməsidir: “Ölkə ərazisində turizm infrastrukturunu genişləndirməklə daxili turizmi daha da inkişaf etdirmək olar. Bəzən bizdə hesab edirlər ki, turist xaricdən gəlirsə, demək, onun geniş imkanları var. Bu səhv konsepsiyadır. Xaricdən gələn turistlərin əksəriyyəti aşağı seqmentə daxildir. Biz xarici turistləri ölkədə qəbul etmək imkanları yaratmalıyıq. Onlar internet vasitəsilə maraqlanıb qiymətləri baha görəndə geri çəkilirlər. Bu istiqamətdə qiymət siyasəti düzgün qurulmalıdır. Hesab edirəm ki, sahibkarlar qiymətləri vətəndaşların tələblərinə uyğun tənzimləmədiyinə görə vətəndaşların bahalı obyektlərdən imtina etməsi onlara ən böyük cəza ola bilər. Bu gün bölgələrdə fəaliyyət göstərən restoranlarda qiymətlər olduqca bahadır. Bahalaşmanın əsas səbəbi həmin restoranların müştərilənin, əsasən, Bakıdan gələn şəxslər olmasıdır. Qiymətləri endirmək isə yalnız rəqabətlə mümkün ola bilər. Ümumiyyətlə, uzunmüddətli və davamlı turizm üçün bu məsələ ciddi şəkildə nəzarətə götürülməlidir. Əks halda turistlər bölgələri tərk edib alternativ ölkə və ya şəhərləri seçə bilər”.
Günel CƏLİLOVA
