Pərvanə Mustafayeva: “Tibbi göstəriş yoxdursa, bu seçim ciddi məsləhətləşmələr və məlumatlandırma əsasında edilməlidir”
Məlum olduğu kimi, Türkiyədə qeysəriyyə əməliyyatına qadağa qoyulub. Mövzu ictimaiyyətdə geniş müzakirə doğurub. Prezident Rəcəb Tayyib Ərdoğan məsələyə münasibət bildirərək, "Normal doğuşa təşviq hörmətsizlik deyil, sağlam cəmiyyət üçün mühüm addımdır," deyib.
Qeyd edək ki, "Sağlam Türkiyə Əsri" proqramı çərçivəsində yenilənən əsasnaməyə əsasən, doğum şöbəsi yaratmaq istəyən özəl tibb mərkəzləri artıq əməliyyat otağına da sahib olmalıdır. Əks halda doğum xidmətləri göstərmələrinə icazə verilməyəcək.
Türkiyədə planlı qeysəriyyə əməliyyatlarının qadağan olunması son günlərdə geniş ictimai müzakirələrə səbəb olub.
Belə məhdudiyyətin ölkəmizdə də tətbiq olunması ictimaiyyət arasında müzakirə olunur. Danılmaz faktdır ki, bu gün ölkədə planlı qeysəriyyə əməliyyatları artmaqda davam edir. Hətta elə ailələr var ki, uşağın doğum tarixini öz istədikləri tarixə uyğun seçirlər. Son vaxtlar belə bir dəb yaranıb. Uşağın normal doğum gününə hələ vaxt olsa da, valideyn istəyir ki, övladı, məsələn, 05.05.2025 və ya 25.05.2025 tarixində dünyaya gəlsin. Onu da qeyd edək ki, bu cür günlərdə doğum evlərində çoxlu sayda qeysəriyyə əməliyyatı keçirilir. Belə olan halda, Azərbaycanda da belə bir məhdudiyyətin tətbiqinə ehtiyac varmı?
“Qeysəriyyə əməliyyatları qadağan oluna bilməz, çünki bu əməliyyatlar göstərişə əsaslanaraq həyata keçirilir”
Həkim Pərvanə Mustafayeva “Bakı-Xəbər”ə şərhində qeyd etdi ki, qeysəriyyə əməliyyatları qadağan oluna bilməz. Çünki bu əməliyyatlar göstərişə əsaslanaraq həyata keçirilir: “Ancaq bu əməliyyatların böyük əksəriyyəti, təxminən 90 faizi pasiyentlərin şəxsi təşəbbüsü ilə, yəni heç bir tibbi göstəriş olmadan həyata keçirilir. Tibbi göstəriş yoxdursa, bu seçim ciddi məsləhətləşmələr və məlumatlandırma əsasında verilməlidir. Əks halda, qadının və uşağın sağlamlığı risq altına düşə bilər. Bu gün ölkəmizdə qeysəriyyə əməliyyatı ilə dünyaya gələn uşaqların sayı artıb. Statistikanın artmasında valideynlərlə yanaşı, həkimlərin də rolu var. Valideynin səhhətində heç bir problem yoxdursa, doğuş üçün göstəricilər normaldırsa həkim onu qeysəriyyə əməliyyatı etməməlidir. Burda məsuliyyət həkimin üzərinə düşür. Nə olsun valideyn istəyir ki, övladı filan gündə deyil, filan gündə olsun? Valideyn vaxtından tez uşağın dünyaya gəlməsinin ziyanını bilməyə bilər, ancaq həkimin borcudur ki, bunu ona başa salsın və fikrindən yayındırsın. Dölün bətndaxili ürək döyüntüləri dəyişərsə, döl tərs gələrsə, hamilədə ürək çatışmazlığı varsa, ilk övlad qeysəriyyə yolu ilə doğulubsa, xəstədə təzyiq problemi yaşanarsa və s. hallarda qeysəriyyə əməliyyatına icazə verilir”.
Günel CƏLİLOVA
