Son günlər Azərbaycan Milli Elmlər Akademiyasında (AMEA) baş verənlər cəmiyyət tərəfindən diqqətlə izlənilir. Bu qurumda bir-birinin ardınca elə hadisələr yaşanıb ki, insanlar bundan təəccüblərini gizlədə bilmirlər.
Xüsusən də, AMEA-nın Nəsimi adına Dilçilik İnstitutunda yaşananlar, orfoqrafiya lüğəti ilə bağlı mövcud olan qalmaqallar səngimək bilmir və bu barədə müzakirələr gedir. Bu qurumda dedi-qodu, söz-söhbət o qədər geniş miqyas alıb ki, əsl elm yaddan çıxıb. AMEA sistemində mövcud olan problemləri daim tənqid edib onların aradan qaldırılması üçün sağlam təkliflərlə çıxış edənlərin, AMEA-nın bir elm mərkəzi kimi inkişafını istəyənlərin isə təpkilərlə üzləşdiyi deyilir.
Mətbuatın yazdığına görə, AMEA Nəsimi adına Dilçilik İnstitutunun şöbə müdiri, professor İdris Abbasov AMEA-nın prezidenti, akademik Ramiz Mehdiyev tərəfindən təhdid olunub.
Mətbuat yazır ki, AMEA Nəsimi adına Dilçilik İnstitutunun təcili fövqəladə toplantı keçirilib və burada İ.Abbasova qarşı R. Mehdiyevin tələbi irəli sürülüb. “Bundan sonra hansısa yazı, məqalədə Ramiz Mehdiyevin adı çəkilsə, İdris Abbasov hətta Azadlıq meydanında edam oluna da bilər. Bu gün (yanvarın 21-də) Ramiz Mehdiyevin tapşırığı ilə AMEA Nəsimi adına Dilçilik İnstitutunun təcili fövqəladə toplantısı çağırılıb. Mətbuatda getmiş “Ramiz Mehdiyev əsl elm adamlarını cana-boğaza yığıb, getməlidir!” adlı açıqlamaya görə İdris Abbasova qarşı təzyiqlər və hədələr başlayıb. Professordan Ramiz Mehdiyevin adını çəkib tənqid etdiyinə görə, izahat tələb olunub” - deyə mətbuat məlumatlı mənbəyə əsasən bildirib.
Mənbə qeyd edib ki, İnstitut rəhbərliyi AMEA prezidenti Ramiz Mehdiyevin adlarını çəkməməsi üçün İdris Abbasovu söz verməyə məcbur ediblər. Mətbuatda qeyd edilənə görə, qərara alınıb ki, “əgər İdris Abbasov bir də Ramiz Mehdiyevin adını çəksə, Azadlıq meydanında asılacaq”.
Doğrudanmı Ramiz Mehdiyev professor İdris Abbasovu təhdid edib?
AMEA Nəsimi adına Dilçilik İnstitutunun şöbə müdiri, professor İdris Abbasovla əlaqə saxladıq. İ. Abbasov baki-xeber.com-a açıqlamasında mətbuatda əksini tapan məlumatları təsdiqlədi. “Mətbuatın yazdığı tamamilə həqiqəti əks etdirir və deyilənlər doğrudur. Dünən həqiqətən də mənə qarşı Ramiz Mehdiyevin adından belə bir təhdid olunub. Mən belə bir təhdidi heç ağlıma gətirə bilmirəm ki, hüquqi dövlətdə belə bir məsələ necə ola bilər. Mənə deyirlər, “yazında Ramiz Mehdiyevin adını çəkmisən, bu sənə asan başa gəlməyəcək, sənin haqqında gec tez ciddi tədbir görüləcək”. Demokratik, hüquqi dövlətdə belə bir təhdid necə edilə bilər? Bu mənim üçün ağlasığmazlıqdır, bu mənə həqiqətən çox pis təsir etdi. Mənim səhhətimdə problem var, hazırda müalicə olunuram. 17 yaşlı övladımın da beyin yarımkürəsində kista var, o da ondan müalicə alır. Bilirlər ki, vəziyyətim yaxşı deyil, sosial-məişət şəraitim də pisdir. Amma bunu qəsdən edirlər. Bunun başında isə Ramiz Mehdiyev dayanır. Əmri o verib, əmrin icraçıları da bu institutda və akademiyadadırlar. Mənim səhhətim çox pisləşib, heç keyfiyyətli müalicə ala da bilmirəm. Buna nə imkanım, nə də şəraitim yol vermir. Düşünürəm ki, bu məsələdə bu yolla Ramiz Mehdiyev məni fiziki cəhətdən də “məhv etmək” istəyir. Artıq neçə illərdir ki, mənə keçmiş direktor tərəfindən psixoloji işgəncələr verilib. Səbəb də orada olan haqsızlıqları, kitablar üçün ayrılan milyonların, Prezidentin dilçiliyin inkişafına görə ayırdığı 2 milyon manatın, sonradan yüz minlərlə ayrılan qrantların aidiyyatı üzrə xərclənməməsini ifşa etməyim olub. Bu vəsait dilçiliyin inkişafına xərclənməyib, mən də daxil olmaqla bir sıra ciddi alimlərin əsərləri bu vəsait hesabına nəşr olunmayıb. Yəni mən zaman-zaman bu məsələni qaldırmışam, onları ifşa etmişəm. İndi görünür bunlar mənim haqqımda “tədbir görmək” qərarına gəliblər. Ramiz Mehdiyev düyməni basıb… Məni o qədər təhdid ediblər ki… “Sən çox böyük günah işlətmisən, bu özü də çox bağışlanılmaz bir günahdır. Mənə deyirlər ki, “sən çox bağışlanılmaz günah işlədib Ramiz Mehdiyevin adını çəkmisən, onu tənqid etmisən. Söz ver ki, bir də Ramiz Mehdiyevin adını çəkməyəcəksən”. Məndən izahat tələb edirlər ki, niyə tənqidi yazılar yazırsan, yazmamalısan, biz bir olmalıyıq, bir şəbəkədə birləşməliyik… Ölkəni şəbəkələrə bölürlər. Sanki AMEA dövlətdən ayrı bir “dövlətdir”. Belə hərəkət edirlər” - deyə İ.Abbasov bildirdi.
İ.Abbasov deyir ki, Akademiyada baş verənləri ifşa etdiyi üçün qurum rəhbərliyi tərəfindən arzuolunmaz şəxs elan edilib. “Hazırda akademiyada arzuolunmaz şəxsəm. Bütün elmi şura üzvlərini mənə qarşı öyrədiblər. Onlar ora mənə qarşı hər an şər atmağa hazır olan qüvvələr toplayıblar. Artıq hədələməyə keçiblər ki, Ramiz Mehdiyevin adını çəkəcəyim təqdirdə mənə zərbə vursunlar….”
Təhdidlərə görə müvafiq qurumlara müraciət edib-etməməsinə gəlincə, İ.Abbasov dedi ki, yalnız ölkə başçısına və Birinci vitse-prezidentə müraciət etməyi düşünür: “Mən bu təhdidlərlə bağlı Prezident İlham Əliyevə və ölkəmizin Birinci vitse-prezidentinə müraciət etməyi planlaşdırıram. Onlara yazılı müraciət etmək istəyirəm”.
İ.Abbasov sonda qeyd etdi ki, akademiyada ona qarşı xoşagəlməz kampaniya formalaşdırılır və bunlarla təkbaşına mübarizə aparmaq üçün isə səhhəti yol vermir.
İradə SARIYEVA
