20 Yanvar faciəsinin 32-ci ildönümü ilə əlaqədar Əmək və Əhalinin Sosial Müdafiəsi Nazirliyi (ƏƏSMN) tərəfindən 20 Yanvar şəhidlərinin ailələrinə və 20 Yanvar əlillərinə birdəfəlik maddi yardım edilib.
ƏƏSMN-nin yaydığı məlumatda qeyd edilir ki, bu kateqoriyalara aid ümumilikdə 333 nəfərin hər birinin bank hesabına 200 manat məbləğində birdəfəlik maddi yardım köçürülüb.
Bakı şəhərində qeydiyyatda olanlar Beynəlxalq Bankın Bakı şəhərindəki istənilən filialına, digər şəhər və rayonlarda qeydiyyatda olanlar isə Beynəlxalq Bankın həmin ərazilər üzrə filiallarına şəxsiyyət vəsiqəsi ilə müraciət edərək birdəfəlik maddi yardımı almaq üçün bank kartlarını götürə bilərlər.
20 Yanvar şəhidlərinin ailələrinə birdəfəlik yardım edilməsinin əhəmiyyəti haqqında danışan Əsgər Ailələrinə Dəstək İctimai Birliyinin sədri Mətanət Əsgərqızı “Bakı-Xəbər”ə bildirdi ki, Azərbaycanın ərazi bütövlüyü uğrunda döyüşlərdə həlak olmuş şəxslərin ailələri və bu döyüşlərdə sağlamlığını itirmiş vətəndaşlar prezidentin tapşırığına uyğun olaraq hərtərəfli sosial təminat sistemi ilə əhatə olunublar: “Bu yardım bir daha göstərdi ki, cənab Prezident bu qəbildən olan insanları unutmur. 20 Yanvarda şəhid olanlar, onların ailələri, əlillər ilk həssas qruplarımızdandırlar. Amma görünən odur ki, onlara məmurlar tərəfindən soyuq münasibət mövcuddur. Məlumat üçün bildirim ki, onların əslində hələ də statusları müəyyənləşməyib. Belə ki, 20 Yanvar əlillərinə olanlara peşə əlili yazılıb, onların əlilikləri təyin olunmayıb. İllərdir insanlar Əli Əhmədovdan cənab Prezident tərəfindən verilən bir göstərişin icrasını gözləyirlər. O sənədləri toz basıb, lakin icra etmirlər ki, bu insanlar digərləri kimi 11 min yardım alanlar sırasında olsunlar”.
Birlik sədri onu da əlavə etdi ki, ulu öndər Heydər Əliyev də 20 Yanvar şəhid ailələrinə və əlillərinə böyük qayğılar göstərdi: “Bu ənənə cənab Prezident tərəfindən davam etdirilir. Birdəfəlik yardımlar da bunun davamıdır”.
Günel CƏLİLOVA
