İstehsal edilən qida məhsullarında palma yağından istifadə edilməsi mütəxəssisləri ciddi şəkildə narahat edir. Bu gün çox az məhsullar tapıla bilər ki, tərkibində palma yağı olmasın. Palma yağı insan orqanizmində problemlər yaradır ki, mütəxəssislər buna qarşı çıxır və palma yağının qida sənayesindən yığışdırılmasını tələb edirlər.
Ekspertlər deyir ki, palma yağının insan orqanizminə vurduğu ziyan nəinki mütəxəssisləri, həmçinin sıradan insanları ciddi narahat etməlidir. Belə iddialar var ki, gənclərin çoxunun evlənmək istəməməsinin kökündə onların orqanizmində palma yagının yaratdığı böyük problem durur. Palma yağından istifadənin gənclərdə bir sıra problemlər, o cümlədən də cinsi zəiflik yaratdığı haqda fikirlər çoxdur. Gündəlik qida rasionumuzda yer tutan palma yağının mənşəyi haqqında çox şübhəli fikirlər var. Buna baxmayaraq, Azərbaycana da palma yağı gətirənlər var. Yerli qida sənayesində də palma yağından geniş istifadə edildiyi məlumdur.
“… oğlanların çoxu bu səbəbdən evlənə bilmir”
Tibb elmləri doktoru, dosent Rəşid Mahmudov “Bakı-Xəbər”ə bildirdi ki, gənclərimizin sağlamlığını, gələcəyimizin düzənli olmasını, genefondumuzun zədələnməməsini istəyiriksə palma yağından imtina etməliyik. “Etiraf etməliyik ki, gənclərin çoxunda zəiflik var. Səbəb ondan ibarətdir ki, bizim qidamızda palma yağı var. Azərbaycana ildə 50 tondan çox palma yağı gətirilir. Dünyada isə palma yağı qida kimi qəbul olunmur. Palma yağından istifadə həm qadınların, həm də kişilərin cinsi vəziyyətinə mənfi təsir göstərir.
R.Mahmudov qeyd etdi ki, palma yağı oğlanlarda kütləvi olaraq cinsi zəiflik yaratdığı üçün onlar evlənməyə, ailə qurmağa can atmırlar, bu səbəbdən də cəmiyyətimizdə saysız yaşı 40-ı ötmüş oğlanlar var. Dünya təbabətinin palma yağının qida rasionunda olmasına qarşı mübarizə apardığı bir vaxtda bizim palma yağından geniş istifadə etməyimiz ciddi narahatlıq doğurur. “Başqa ölkələrdə palma yağından texniki məsələlərdə istifadə edilsə də, bizdə birbaşa qidada istifadə olunur. Palma yağları insan orqanizminə birmənalı olaraq pis təsir edir. Bu, insanların sağlamlığı üçün böyük təhükədir. İnsanların cinsiyyət orqanlarını sıradan çıxarır, çox insanlarda cinsi zəiflik, sonsuzluq yaradır. Evlənməyən oğlanların çoxu bu səbəbdən evlənə bilmir, qadınların da çoxunun uşağı buna görə olmur. Onların hamısının kökündə palma yağından istifadə etmək dayanır. Elə qida yoxdur ki, ona palma yağı qatmasınlar. Qatılaşdırılmış süddət tutmuş makarona, vermişelə qədər hamısına palma yağı qatırlar. İnsanlarda nə üçün vitamin D çatmır? D vitamini çatışmazlığının səbəbi palma yağıdır. İnsanların immunitetinin aşağı olmasının da səbəbi budur. Dünya təbabəti palma yağının qida sənayesində istifadəsinə qarşıdır”.
“Bəs onda bizim iş adamları niyə ölkəmizə palma yağı gətirib gənclərimizə, insanlarımıza qarşı terror edirlər” sualımıza cavabında R.Mahmudov bildirdi ki, o bunun səbəbini bilmir: “Mən bunu bilmirəm. Siz gedin bu sualı o işbazlara verin. Buna onlar cavab verməlidir ki, niyə bu yağı gətirirlər. Mən bir mütəxəssis kimi palma yağının insan orqanizmində yaratdığı böyük fəsadlardan danışdım”.
R.Mahmudov bildirdi ki, insanlar mümkün qədər palma yağını qida rasionundan çıxarmalıdır və kəndlərdə hazırlanan təmiz yağlar yeməlidir.
İradə SARIYEVA
