Məşhur “Razin tolkuçkasının” sahibkarları etiraza qalxıb - dünən 500, bu gün 600 manat icarə?..

img

Sabunçu rayonunda “Razin tolkuçkası” kimi tanınan “Bakıxanov” Ticarət Mərkəzində sahibkarlar etiraz əlaməti olaraq dükanlarını bağlayıb.

Onlar bildiriblər ki, dükanlara görə ödədikləri aylıq ödənişin qiyməti 500 manatdan 600 manata qaldırılıb.

Dükan sahibləri Ticarət Mərkəzinin rəhbərliyinin bu addımına etiraz etsələr də, müraciətlərinə məhəl qoyulmayıb. Belə olan halda, satıcılar çıxış yolunu dükanları bağlamaq və işə çıxmamaqda görüblər.

Satıcılar və dükan sahibləri bildirir ki, ölkədə bahalaşma var: “Demək olar ki, alıcı yoxdur, alver ölüb. Biz həmin 500 manatı güclə verirdik. İndi birdən-birə qiymət 600 manata qalxıb. Bunu ödəyə bilməyəcəyimizi demişik. Amma bizi eşidən yoxdur. Ona görə də dükanları bağlamağı və işləməməyi qərara aldıq”.

  • Satıcılar: “500-ü ödəyə bilməyən 600 manatı necə ödəsin? Çarəsizlikdən dükanı bağlamaq qərarına gəlmişik”

Satıcılar bildirir ki, ötən illərdən fərqli olaraq alıcı azalıb: “Pandemiya həm alıcıların, həm də biz satıcıların maddi vəziyyətinə mənfi təsir edib. Bununla bağlı biz satıcılara hər hansı bir güzəşt edilmədi. Bazar rəhbərliyi indi dükana görə aylıq ödənişi 500 manatdan 600 manata qaldırıb. Son aylar 500 manatı normal şəkildə ödəyə bilmirdik. 500-ü ödəyə bilməyən 600 manatı necə ödəsin? Çarəsizlikdən dükanı bağlamaq qərarına gəlmişik”.

  • Mayis Əliyev: “Bazar sahibinin nə vaxt istədi icarə haqqını qaldırmasının heç bir qanuni əsası yoxdur”

Sosial sahə üzrə ekspert Mayis Əliyev qeyd etdi ki, bazar sahibinin nə vaxt istədi icarə haqqını qaldırmasının heç bir qanuni əsası yoxdur. Bazardan yeri icarəyə götürənlərlə rəhbərlik arasında bağlanan müqavilədə bütün detallar göstərilməlidir: “Müqavilədə qüvvəyə minmiş şərtlərin hansı dövrü əhatə etdiyi də qeyd olunmalıdır. İnsanları bu qədər sıxmaq olmaz.

Gündə bir tələb qoymaq, müxtəlif adlarla pul yığmaq da qanunsuzluqdur. Bazarda çalışan ticarətçilər sivil qaydada öz haqlarını tələb etməlidir. Özü də fərdi qaydada deyil, cəm şəkildə. Çünki bu problemlər hamı üçün yaradılır. Bazarda işləyənlər qarşı tərəflə bütün yuridik normalara uyğun şəkildə hazırlanmış müqavilənin imzalanmasını tələb etməlidir”.

Günel CƏLİLOVA

Peşə etikası

Son xəbərlər