Ceyranbatan 1 sayli məktəbin riyaziyyat müəlliməsi ilə şagirdin problemi nədir?..

img

Sosial şəbəkədə Ceyranbatan qəsəbəsi, bir nömrəli tam orta məktəbdə riyaziyyat müəllimi Aynurə Məmmədovanın 2019-cu ildən bugünə kimi dərs dediyi Elgün Abbasovu mütəmadi olaraq fiziki şiddətə məruz qoyduğu və bu səbəbdən şagirdin dərsə getmək istəmədiyi yazılıb. Onun valideyni iddia edir ki, bununla bağlı məktəb rəhbərliyinə məlumat verilsə də, problem həllini tapmayıb.

Baş vermis hadisə ilə bağlı Abşeron Rayon Təhsil Şöbəsindən bildirildi ki, Ceyranbatan qəsəbə 1 nömrəli tam orta məktəbin müəlliminin şagirdə şiddət göstərməsi ilə bağlı iddia araşdırılacaq.

  • Müəllimə - Aynurə Məmmədova: “Məktəb direktoru xəbər saytlarına həqiqəti əks etdirməyən məlumatlar ötürərək haqqımda yalan xəbərlər verilməsinə nail olub”

Adı şiddətdə hallanan müəllimə Aynurə Məmmədova bildirdi ki, məlumatın yayılmasında məktəb rəhbərliyi günahkardır: “Çünki biz ondan şikayət etmişik, etdiyi qanunsuzluqlar üzə çıxıb. Məktəbin direktoru Atayeva Çinarə, onun müavinləri Qarayeva Pərvanə və Vəliyeva İlhamənin saxtakarlıqları, qanunsuz əməlləri barədə Təhsil Nazirliyinə etdiyim şikayət nəticəsində məktəbdə qəflətən yoxlama keçirilib. Yoxlama 1 saylı Ərazi Maliyyə Hesablama Mərkəzində yaradılmış monitorinq qrupu tərəfindən həyata keçirilib. Yoxlama zamanı müəllimlik hüququ olmayan direktorun təsərrüfat üzrə müavini Vəliyeva İlhaməyə qanunsuz dərslərin verilməsi, həmin dərslərin başqa müəllimlərin adına rəsmiləşdirilməsi və həmin dərslərə görə verilən pul vəsaitlərinin mənimsənilməsi müəyyən edilib. Bundan başqa, qanunsuz pulların yığılması, məktəbdə mənəvi-psixoloji vəziyyətin pis olması, o cümlədən, müəllimlərin direktor tərəfindən hədələndikləri və təzyiqlərə məruz qaldıqları müəyyən edilib. Bütün bunların qarşılığında direktora Abşeron rayon Təhsil şöbəsində töhmət verilərək cinayət faktları ört-basdır edilib. Məktəb direktoru xəbər saytlarına həqiqəti əks etdirməyən məlumatlar ötürərək haqqımda yalan xəbərlər verilməsinə nail olub. Məndən qisas almaq məqsədilə direktor əvvəlcə məktəbin gözətçisi Rəhman adlı şəxsə, guya Rəhmanın məktəbdə “patı” satmağı barədə mənim şayiə yaydığımı deyib, daha sonra valideynin xəbəri olmadan onun adından müxtəlif internet xəbər saytlarına həqiqəti əks etdirməyən məlumatlar ötürərək mənim haqqımda yalan xəbərlər verilməsinə nail olub. Direktor həm məni, həm də onu yoxlayan şəxsləri şərləməklə, böhtan atmaqla məşğuldur. Direktor Atayeva Çinarənin qanunsuz əməlləri barədə internet saytlarında da kifayət qədər məlumat var. Haqqında yüzlərlə şikayət, onlarla məhkəmə prosesi olan direktor hələ də vəzifədə saxlanılır və günahsız şəxslərin şərəf və ləyaqətləri ləkələnir”.

  • Nizami Hüseynov: “Təhsildə aqressiya şagird-müəllim münasibətlərinə də mənfi təsir göstərir”

Təhsil eksperti Nizami Hüseynov bildirdi ki, təəssüf ki, son vaxtlar orta ümumtəhsil məktəblərində şagirdlərə qarşı fiziki zorakılıq halları artmaqdadır: “Azərbaycanın ciddi təhsil islahatına ehtiyacı var. Təhsildə aqressiya şagird-müəllim münasibətlərinə də mənfi təsir göstərir. Müəllimlərin düzgün tərbiyə metodundan çox şey asılıdır. Artıq məktəbdə böyüyən uşaqda aqressiya formalaşdıqdan sonra bu, sadəcə məktəb daxilində olmur. Yavaş-yavaş əhatə dairəsi genişlənir. Son dövrlərdə ali məktəblərə qəbul, buraxılış imtahanlarındakı uğursuzluqlar bilavasitə cəmiyyətin müəllimə, məktəbə, təhsilə münasibətini dəyişir. Müəllimlərin repetitor kimi pul yığması, bəzi məktəblərdə idarəetmədəki boşluqlar təhsil üçün ciddi problemlər yaradır. Ümumiyyətlə, daxili intizam qaydaları şagirdlərin həyat və sağlamlığının təminatına, tədris prosesinin təhlükəsizliyinin təminatına, məktəbdə hər bir şagirdin uğurlu təliminə köməklik edən normal iş şəraitinin yaradılmasına, şəxsiyyətə və onun hüquqlarına hörmətin tərbiyə edilməsinə, davranış mədəniyyətinin və ünsiyyət bacarıqlarının inkişafına istiqamətlənib. Əgər normal tədris mühiti pozulursa, buna görə mütləq cəzalar olmalıdır. Mövcud fakt məktəbdə idarəetmənin normal olmadığını, şagirdlərlə işin düzgün qurulmadığını göstərir”.

Günel CƏLİLOVA

Peşə etikası

Son xəbərlər