Azərbaycandakı məktəblərin birində şagirdlərin iştirakı ilə 12 imama həsr olunan klip çəkilib. Klipdə ilahiyyatçı-mərsiyəxan Seyid Peyman Boradigahi müəllim rolunda çıxış edib. Aşağı sinif şagirdləri hərəsi bir imamın adını çəkib. Onların adı yazılan kağızları göstəriblər. Videoda ifaçının azyaşlı oğlu Seyyid Hüseyn də iştirak edib.
Klipi sosial şəbəkə istifadəçiləri birmənalı qarşılamayıb. Təhsil müəssisəsində şagirdlər elm öyrənməli olduqları halda dini musiqi səsləndirilməsi müzakirə obyektinə çevrilib. Azyaşlıların dini təbliğat üçün istifadə olunması qınanılıb. Valideynlər Azərbaycanın dünyəvi dövlət olduğunu və şagirdlərin təhsil müəssisəsində dini klipə çəkilməsi, dini təbliğata alət olmasının yolverilməzliyini qeyd ediblər.
Maraqlıdır, bu klip hansı məktəbdə çəkilib və tədris müəssisəsi belə bir hadisəyə necə razılıq verib?
Seyid Peyman Boradigah: “Çəkiliş orta məktəbdə baş tutmayıb”
İlahiyyatçı-mərsiyəxan Seyid Peyman Boradigah bildirdi ki, çəkiliş orta məktəbdə baş tutmayıb: “Heç bir məktəb icazə vermədi ki, belə bir şey çəkək. Yaşadığım ev tərəfdə bir yer tutmuşuq. Oranı sinif halına gətirdik və kurslardan bəzi ləvazimatları götürdük. Özümüz uşaqları məktəb formasında geyindirdik ki, maraqlı olsun. Bizi tanıyanlar bilir ki, Allahdan, Peyğəmbərdən, Əhli-beytdən oxumuşuq. Bu dəfə də uşaqlarla birlikdə bir klip hazırladıq. Niyyətimiz uşaqlara imamları öyrətmək idi. Sonra səhifələrdə paylaşıldı, gördüm ki, tənqid edirlər. Amma bildirmək istəyirəm ki, çəkiliş məktəbdə olmayıb”.
Qeyd etdiyimiz kimi, şagirdlərin iştirakı ilə 12 imam haqqında çəkilən klip narazılığa səbəb olub.
Fatimə Hacıbəyli: “Keçmiş zamanda yaşamırıq ki, təhsili “eyzəbər ə, beyzəbər bə, teyzəbər tə”yə qaytaraq, dini təbliğ etmək lazım deyil”
“Vəfa” Sosial İctimai Birliyinin sədri Fatimə Hacıbəyli qeyd etdi ki, təhsil müəssisəsində dini klip çəkilməsi, şagirdlərdən bu məsələdə istifadə olunması düzgün deyil: “Klipə baxarkən aydın olur ki, orda olan uşaqlar aşağı sinif şagirdləridir. Bu yaşda olan uşaqlara dini bilgi vermək, onlara imamları tanıtmaq yanlışdır. Zamanı çatanda onlar imamları da tanıyacaq, lazımi dini məlumatları da öyrənəcəklər. Nəzərə almaq lazımdır ki, dini dövlətdə yaşamırıq. Azərbaycan dünyəvi dövlət olduğundan, şagirdlərin bu cür klipə çəkilməsi yolveriməzdir. Biz uşaqlarımıza inkişaf etmək, müasir dövrün tələbi olan texnologiyanın, biliyin, elmin öyrənilməsini aşılayırıq. Keçmiş zamanda yaşamırıq ki, təhsili “eyzəbər ə, beyzəbər bə, teyzəbər tə”yə qaytaraq. Dini təbliğ etmək lazım deyil. Sadəcə tarixi, hüquqi sosial aspektləri barədə məlumat vermək lazımdır ki, gələcəkdə uşaq öz seçimini edə bilsin”.
Günel CƏLİLOVA
