44 günlük Vətən savaşında şücətlə, qəhrəmanlıqla döyüşüb qanını ata torpağa halal edənlərdən biri də Zeynalovlar ocağının yegənə oğul payı şəhid Zeynalov Nurlan Rəfail oğludur. Bakının Binəqədi rayonunda yaşayan və bir qız övladı atası olan şəhid Nurlanın xatirəsini ailəsi ilə yanaşı hər kəs əziz tutur.
İkinci Qarabağ müharibəsində şəhid olan Zeynalov Nurlan Rəfail oğlunun adının əbədiləşdirilməsi üçün Binəqədi rayonu Əcəmi Naxçıvanı küçəsi 4B binasının sakinləri yaddaqalan iş görüb. Zeynalov Nurlan Rəfail oğlunun xatirəsini əbədiləşdirmək məqsədilə şəhidin adına bulaq tikdiriblər və bu günlərdə həmin bulağın açılışı oldu. Bulağın açılışında şəhidimiz Nurlan Zeynalovun ailə üzvləri, bina sakinləri, döyüş yoldaşları, qazilər də iştirak edirdilər. Açılışda ilk olaraq Azərbaycanın dövlət himni səsləndirildi, daha sonra bütün şəhidlərimizi bir dəqiqəlik sükutla yad edildi.
Onu da qeyd edək ki, şəhid Nurlanın atası Rəfail Zeynalov Birinci Qarabağ Müharibəsində iştirak edib və müharibə veteranıdır. Şəhid oğlunun adını daşıyan bulağın açılışında çıxış edən R.Zeynalov oğlunun qəhrəmanlıqla şəhid olduğundan qürur duyduğunu bildirdi. O, qeyd etdi ki, yeganə oğlunu itirmək çox ağırdır, amma onun vətənimizin ərazibütövlüyü uğurunda şəhid olması bir təsəllidir. Açılış mərasimində şəhidin döyüş yoldaşları, dostları, qonşular onun haqqında xoş xatirələrini dilə gətirdilər. Tədbir uşaqların şeirləri və Şəhidimizin adına açılmış ehsan süfrəsi ilə yekunlaşdı.
Şəhid Zeynalov Nurlan Rəfail oğlu haqqında qısa xatırlatma təqdim etmək istəyirəm. N. Zeynalov 1989-cu il noyabrın 25-də Sabirabad şəhərində anadan olub. Evin tək oğlu idi. 1996-ci ildə M.Ə.Sabir adına 1 saylı şəhər tam orta məktəbinə getmiş və 2007-ci ildə məktəbi əla qiymətlərlə başa vurub Azərbaycan Memarlıq və İnşaat Universitetinə daxil olmuşdur. 2011-ci ildə Universiteti bitirmiş və oktyabr ayında həqiqi hərbi xidmətə çağırılmışdır. Gəncə şəhərində yerləşən “N” saylı hərbi hissədə, Quru Qoşunlarında xidmət etməyə başladıqdan az sonra Müdafiə Nazirliyinin Təlim-Tədris Mərkəzində 4, 5 ay müddətində xüsusi təlimlərdə iştirak etmək üçün göndərilmişdir. Bu təlimləri uğurla başa vuran Nurlan Zeynalova leytenant rütbəsi verilmiş və o yenidən xidmət etdiyi hərbi hissəyə dönmüşdür. Burada iki il müddətində Vətənə qüsursuz xidmət edən leytenant Nurlan 2013-cü ildə Ordu sıralarından tərxis olunaraq yaşadığı Sabirabad rayonuna qayıtmışdır. 2014-2017-cü illərdə regional "ASAN" xidmət mərkəzində Natoriat kontorunda aparıcı mütəxəssis kimi işə başlamışdır. 2017-ci ilin may ayından 2019-cu ilədək isə özəl şirkətlərin birində Kadrlar şöbəsinin rəisi vəzifəsində çalışaraq bacarıqlı işçi olduğu üçün yalnız müsbət keyfiyyətləri ilə diqqət çəkmişdir. 2019-cu ilin iyun ayında Azərbaycan Müdafiə Sənayesi Nazirliyinin Milli Aerokosmik Agentliyinin Ekologiya İnstitutunda Kadrlar şöbəsinin rəisi kimi işə başlamışdır. 2020-ci il sentyabrın 27-də başlanan 2-ci Vətən müharibəsi zamanı könüllü olaraq cəbhəyə yollanır. Əsgərlərin bölgüsü aparılan zaman inadla “Həmlə” taborunda xidmət etmək istədiyini bildirir. İstəyi nəzərə alınaraq Nurlan da Xüsusi Təyinatlı Qoşunların əsgər və zabitlərindən ibarət olan bu taborun tərkibində döyüşlərə qatılır. Döyüş yolu Murov dağ ətrafından başlayaraq Füzuli, Zəngilan, Xocavənd ərazilərindən keşmiş, bölük komandiri kimi ağır və çətin döyüş planlarının yerinə yetirilməsində iştirak etmişdir.
İlk günlərdə yaralanmasına baxmayaraq yaralı halda da geri çəkilməyərək döyüşlərə davam etmişdir. Nurlan Zeynalov noyabrın 9-da (30 yaşında) Xocavənd döyüşləri zamanı snayperdən açılan atəş nəticəsində Şəhidlik zirvəsinə ucalıb. Uzun axtarışlardan sonra şəhid olduğu təsdiqləndi. 2020-ci il dekabrın 17-də doğulduğu torpaqda Sabirabad şəhərində Şəhidlər Xiyabanında dəfn edildi. Ailəli idi. Həyat yoldaşı Kübra xanımlada iş yerində tanış olaraq ailə həyatı qurmuşlar. Nuray adında bir qız övladı Vətənə və bizlərə əmanətdir. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamına əsasən Nurlan Zeynalov ölümündən sonra "Vətən uğrunda" medalı, "İgidliyə görə" medalı, "Xocavəndin azad olunmasına görə" medalı, "Füzulinin azad olunmasına görə" medalı və "Rəşadət Ordeni" ilə təltif edilib.
Vətənimizin dar günündə ailəsini, körpəsini qoyub Vətən üçün şirin canını fəda edən Nurlan kimi İgid Vətən oğulları hər zaman qəlbimizdə yaşayacaq. Etdikləri fədakarlıqları, qəhrəmanlıqları gələcək nəsillərə ötürərək nə unutmayacağıq nə də unutdurmayacağıq. Allah Nurlanın simasında bütün Qəhrəman Şəhidlərimizə rəhmət eləsin, ruhları şad olsun! Amin...
Ülviyyə GÜLBABAQIZI
