Son zamanlar məktəblərdə şagirdlərin özbaşınalığı məsələsi müzakirə obyektinə çevrilib. Müəllimlərin belə öhdəsindən gələ bilmədiyi uşaqların olduğu danılmaz faktdır. Dekabrın 6-da 282 saylı məktəbə bıçaq gətirib hamını hədələyən, müəllimləri söyən şagirdlə bağlı məlumat yayıldı.
Qeyd edilir ki, məktəbin 7-ci sinfində təhsil alan şagird sinifdə şalvarını çıxarır, qızları küçə söyüşləri ilə təhqir edir, müəllimləri söyür, məktəbə bıçaq gətirib hamını hədələyir. Valideynlər polisə müraciət etsələr də, anası məktəbə hücum çəkir, polisi də söyüb təhqir edir.
Paytaxtın Suraxanı rayonu 282 saylı orta məktəbində nizam-intizam qaydalarının kobud şəkildə pozulması ilə bağlı Bakı Şəhəri üzrə Təhsil İdarəsi (BŞTİ) açıqlama yayıb.
Qurumdan bildirilib ki, 282 nömrəli tam orta məktəbin şagirdi ilə bağlı Bakı Şəhəri üzrə Təhsil İdarəsi tərəfindən müvafiq araşdırma aparılır: “Qeyd edək ki, təhsil müəssisələrində tədrisin normal təşkili, uşaqların təhlükəsizliyinin təmin olunması, həmçinin müəllim-şagird münasibətləri hər zaman diqqət mərkəzində saxlanılır. Uşaqların psixoloji dayanıqlığının artırılması və məktəb-valideyn əməkdaşlığının inkişafı məqsədilə müvafiq tədbirlər həyata keçirilir, davamlı olaraq zəruri maarifləndirmə işləri görülür”.
Qeyd edək ki, məktəblərdə şagirdlərin davranış qaydaları ilə bağlı şikayətlər artıb. Buna səbəb kimi məktəblərdə psixoloq sayının az olması göstərilir. Məktəbdə 2000-ə yaxın şagird təhsil alır. Və həmin tədris müəssisəsində 1 psixoloq olur. Belə olan halda məktəblərdə psixoloji xidmət lazımi səviyyədə təşkil edilmir.
Nizami Hüseynov: “Məktəblərdə psixoloji xidmət genişləndirilməlidir”
Təhsil eksperti Nizami Hüseynov bildirdi ki, müəllim-şagird münasibəti, tədris prosesinin gedişi, məktəbə rəhbərlik və valideynlər münasibətlərini təhlil edən zaman görürük ki, çoxlu psixoloji boşluqlar var: “Məktəblərdə psixoloji xidmət genişləndirilməlidir. Düzdür, məktəblərimizdə yaxşı psixoloqlar var. Amma onların sayı çoxaldılmalıdır. Mən düşünürəm ki, müəllim ilk növbədə öz işinin vurğunu olmalıdır. Əgər hər bir şəxs öz işini və peşəsini sevsə daha böyük uğurlar əldə etmək mümkündür. Həmçinin məktəblərdə psixoloqların rəyinə qiymət verilməlidir. İnsana dəyər veriləndə, onun işi də güclü olur. Əgər bütün bunlar nəzərə alınarsa, məktəblərdə psixoloji xidmət ən avanqard mövqedə olan xidmət sahələrində biri kimi başa düşülər”.
Könül İsmayılova: “Məktəblərdə fəaliyyət göstərən psixoloqlar mütləq şəkildə bu ixtisası bitirməlidirlər”
Psixoloq Könül İsmayılova bildirdi ki, məktəblərdə hər pillə üzrə psixoloqların fəaliyyəti vacibdir: “Elə məktəblər var ki, orada kontingentin sayı 3 min nəfəri keçib. 3 min uşağa 1 psixoloq, təbii ki, kifayət deyil. Belə olan halda hər məktəbdə azı 3 psixoloq olmalıdır. İki bölməli məktəblərdə rus və Azərbaycan dilli psixoloqların fəaliyyəti də vacibdir. Məlumdur ki, hazırkı dövrdə uşaqların sosial şəbəkələrə, internetə meyllənməsi bir sıra neqativ hallara gətirib çıxa bilir. Belə hallarda onları başa düşən ilk şəxs psixoloq olur. Sinif müəllimləri də uşaqlara dəstək göstərə bilir. Lakin onlarla necə işləməyi bilmədikləri üçün belə uşaqlara yadım edə bilmirlər. Hər bir uşağa fərdi yanaşma tərzi göstərilməlidir. Məktəblərdə fəaliyyət göstərən psixoloqlar mütləq şəkildə bu ixtisası bitirməlidirlər”.
Günel CƏLİLOVA
