“...Mənə dəymiş maddi-mənəvi zərər ödənilməklə qanun çərçivəsində bu məsələyə hüquqi qiymət verilsin”
Bakı şəhəri, Binəqədi rayonu, Sulutəpə qəsəbəsi, R.Allahverdi küçəsi 140 A-240A ünvanının sakini, vaxtilə qəzetimizlə əməkdaşlıq edən jurnalist, Azərbaycan Rəssamlar İttifaqının, “Azərbaycan Karikaturaçılar Birliyi”nin üzvü Vəlicanov Qamət Səmət oğlu “Bakı-Xəbər”ə yenidən müraciət edib.
Q.Vəlicanovun bildirdiyinə görə, qonşuluqda ev tikintisi zamanı onun qanuni evinə məxsus olan və 21 ildir istifadə etdikləri kanalizasiya xətti qonşusu tərəfindən bağlanılıb. Q.Vəlicanov yazır ki, dəfələrlə kanalizasiya xəttini bərpa etməli olduqlarını onlara bildirsə də, heç bir nəticə olmayıb və bundan sonra əlaqədar quruma - Binəqədi rayon Xocasən İcra Nümayəndəliyinə üz tutub, bu qurumun da məsələnin həllinə əncam çəkmədiyini gördükdə isə şikayətini “Bakı-Xəbər” vasitəsilə ictimailəşdirib. Q.Vəlicanov yazır ki, qanuni evinə məxsus olan kanalizasiya xəttininin qonşusu tərəfindən bərpa edilməməsi və Xocasən İcra Nümayəndəliyinin də bu məsələyə ciddi yanaşmaması nəticəsində problem problem olaraq qalır. Q.Vəlicanov deyir ki, yazı “Bakı-Xəbər”də işıqlandırılandan sonra Xocasən İcra Nümayəndəliyi onunla əlaqə saxlayıb, lakin hadisə yerinə gəlib baxış keçirməyib. Nümayəndəliyin onun növbəti müraciətinə məktubla cavab verdiyini deyən Q.Vəlicanovun sözlərinə görə, rəsmi qurumun məktubunda verdiyi cavab da, qonşusunun tərpəniş göstərməməsi də onu qane etmir. Q.Vəlicanov deyir ki, qonşusu kanalizasiyani düzəltmir, şikayəti ilə bağlı Xocasən İcra Nümayəndəliyinin göndərdiyi cavabsa qənaətbəxş deyil, bu səbəbdən də məsələyə hüquq müstəvisində baxılmasını istəyir. Məsələ ilə bağlı Daxili İşlər Nazirliyinin 102 xidmətinə zəng edəcəyini deyən Q.Vəlicanov hesab edir ki, məsələyə hüquq-mühafizə orqanları səviyyəsində münasibət bildirilməsinə ehtiyac var. O qeyd edir ki, qarşı tərəf və rəsmi qurum polisə muraciətdən başqa ona yol qoymayıb. “Mənim artıq məsələyə hüquqi müstəvidə münasibət bildirilməsindən başqa yolum qalmayıb. Daxili İşlər Nazirliyinin 102 xidmətinə zəng vuracağam və şikayətimi bildirəcəyəm. Polisə də müracət etməyimin səbəbi aşağıdakılardır.
Birincisi, mənim kupçalı, qanuni evimin yanında qanunsuz ev tikən Rizvan adlı şəxs iki aydır ki, artıq mənimlə telefon əlaqəsi də saxlamır. Mən zəng vuranda ya telefonu götürmür, ya da ki, bağlayır. Beləliklə, mənimlə əlaqə saxlamaqdan yayınır. Hətta mən Binəqədi rayon Xocasən İcra nümayəndəsinin müavini Ramiz Həsənzadəyə müraciət edəndə o götürüb Rizvan adlı şəxsə zəng vururdu, onun da telefonu ya bağlı olurdu, ya da götürmürdü. Heç kimlə əlaqə saxlamır. Heç cür onunla əlaqə saxlamaq mümkün olmur. İlk növbədə o adam tapılmalıdır. Polis bu adamı tapmalıdır ki, bu qeyri-qanuni evi tikən heç Rizvan deyil, başqa bir şəxsdir. Yəni bu müəyyənləşdirilməlidir ki, sabah məhkəmə olarsa bütün məlumatlar məhkəmə üçün hazır olmalıdır ki, evin sahibinin kim olduğu aydın olsun. İkincisi, mən hüquqşünas deyiləm. Amma onu bilirəm ki, istənilən bir vətəndaşın mülkiyyətində olan kommunal xətlərə, obyektlərə məhkəmə qərarı olmadan dövlət özü belə toxuna bilməz. Buna müdaxilə edə bilməz. Halbuki, mənim evimin kanalizasiya xətti qeyri-qanunu tikinti aparılan zaman qanunsuz olaraq dağıdılıb (20 mertlik məsafədə). Bu azmış kimi, bir az da irəli gedərək onun həyətinə heç bir aidiyyəti olmayan ərazidə, yəni küçədə bizim kanalizasiya xəttinə aid olan “lük”ü də dağıdıb üstünü torpaqlayıb, bərkidib. O “lük”ə də mən nə qədər əziyyət çəkmişdim. Üçüncüsü, antisanitariya vəziyyəti yaratmağın özü də bir cinayətdir. İndi mən bu antisanitariyanın əlindən və üzləşdiyim qanunsuzluqların ucbatından bu ay 5 aydır ki, kirayəyə çıxmışam, hər ay 350 manat kirayə haqqı ödəyirəm. Nə qədər zərərə gedirəm. Öz qanuni evimdən ona görə çıxdım ki, nəticədə çox pis antisanitariya vəziyyəti yaranmışdı. Maşın gətirib, fəhlə tutub o antisanitariyanı təmizlətmək üçün nə qədər vəsait xərclədim ki, bura təmizlənsin mən çıxıb kirayəyə gedim. Bunu da etmişəm. Amma indi hər şey belə vəziyyətdə qalıb. Polisə də müraciətim belə olacaq ki, mənə dəymiş maddi-mənəvi zərər ödənilməklə qanun çərçivəsində bu məsələyə hüquqi qiymət verilsin. Bunu istəyirəm” - deyə Q.Vəlicanov bildirdi.
İradə SARIYEVA
