Bakıda 20 məktəbin istilik məsələsini kim həll edəcək?..

img

Bakıda fəaliyyət göstərən orta ümumtəhsil məktəblərinin heç də hamısı istiliklə təmin edilməyib. Artıq dekabr ayı olmasına baxmayaraq, hələ də 20 məktəbdə istilik yoxdur. Özü də qışın bu çağında, karonavirusun, soyuqdəymə və qripin tüğyan etdiyi bir vaxtda məktəblərdə istiliyin olmaması görün hansı nəticələrə gətirib çıxarar.

Təhsil naziri özü də etiraf edir ki, hələ bəzi məktəblərdə istilik problemi öz həllini tapmayıb. Emin Əmirullayev mətbuata bildirib ki, noyabrın 15-də istiliyin verilməsindən sonra 67 məktəbdə bununla bağlı problem var idi. “Hazırda bu rəqəm 20-yə qədər endirilib, proses davam edir”.
Onun sözlərinə görə, ölkə üzrə 60 faiz məktəb mərkəzləşdirilmiş istilik sistemi ilə təmin edilib: “Digər məktəblər odun yanacağı və digər vasitələrlə qızdırılır. Bakı şəhərindəki məktəblərin əksəriyyətində istiliklə bağlı problem aradan qaldırılıb. Hər hansı bir məktəbdə qəza ola bilir. Səbəblər müxtəlifdir. Bunlar hər zaman Təhsil Nazirliyinə aid olan səbəblər deyil, bəzi hallarda isə obyektiv səbəbdir. Ötən il tədrisinn fasilələrlə davam etməsi istilik sistemində problem yaradırdı. İstilik sisteminin söndürülüb-yandırılması televiziya pultu kimi deyil. Sistem hər dəfə yandırılıb-söndürüləndə müəyyən problemlər ortaya çıxır”.

Təhsil naziri deyir ki, baş verən problemlər hər zaman Təhsil Nazirliyindən asılı səbəbdən üz vermir.

Təhsil Nazirliyi məktəblərdə istilik probleminin olduğunu bu gün deyir, etiraf edir, onun həll yollarını axtarır, amma bu məsələyə məsul olan digər dövlət qurumlarının nə səsi eşidilir, nə də mövqeyi görsənir. Rayon icra hakimiyyətləri, BŞİH və başqa təşkilatlar problemin həllinə dair hər hansı bir addım atmır.

Bakıda 20 məktəbin istilik məsələsini kim həll edəcək?.. İstiliklə təmin olunmayan məktəblər hansılardır?

  • Rafiq Əliyev: “Bunlar “Azəristiliktəchizat” xidmət zonasına daxil olmayan məktəblərdir”

“Azəristiliktəchizat”ın mətbuat xidmətinin rəhbəri Rafiq Əliyevlə əlaqə saxladıq. R.Əliyev bildirdi ki, sözügedən 20 məktəb “Azəristiliktəchizat”ın mənbələrindən istifadə etməyən məktəblərdir. “Ölkə üzrə orta məktəblərin cəmi 281-i “Azəristiliktəchizat”ın mənbələrindən istiliklə təmin edilir. Bizim mənbələrimizdən istiliklə təmin edilən məktəblərin hamısına istilik verilib. “Azəristiliktəchizat”ın mənbələrindən istiliklə təmin olunan məktəblərin heç birində bu problem yoxdur. İstiliklə təmin olunmayan məktəblər fərdi qazanxanaları olan məktəblərdir. Onların qazanxanaları Bakı Şəhəri üzrə Təhsil İdarəsinin və rayon təhsil idarələrinin balasındadır. Bunlar “Azəristiliktəchizat” xidmət zonasına daxil olmayan məktəblərdir”.

R.Əliyev qeyd etdi ki,  “Azəristiliktəchizat”ın mənbəyindən istiliklə təmin olunan məktəblərin hamısına istilik verilib.

  • Cəsarət Valehov: “O məktəblərin siyahısı məndə yoxdur, amma istiliklə təmin olunmayan məktəblərin sayı get-gedə azalır”

Təhsil Nazirliyinin İctimaiyyətlə əlaqələr sektorunun müdiri Cəsarət Valehovla əlaqə saxladıq.

C.Valehov bildirdi ki, istiliklə təmin olunmayan məktəblərin onda siyahısı yoxdur, amma problem nəzarətdədir: “O məktəblərin siyahısı məndə yoxdur, amma istiliklə təmin olunmayan məktəblərin sayı get-gedə azalır. Bu baxımdan ki, problemlər həll edilir, onlar istiliklə təmin olunur, istiliklə bağlı bu və digər problemlər aradan qalkdırılır”.

İradə SARIYEVA

Son xəbərlər