COVİD-19 bütün dünyanı təhdid etməkdədir. Ölkə ərazisində də sərt karantin rejimi davam edir. Karantin rejimi nəticəsində gündəlik yoluxma hallarının sayında müəyyən qədər sabitləşmə müşahidə edilsə də, hələ də epidemioloji vəziyyəti qənaətbəxş hesab etmək olmaz. Azərbaycan dövləti koronavirus (COVID-19) infeksiyası ilə mübarizə sahəsində bütün zəruri tədbirləri həyata keçirir.
Məhz bunun nəticəsində ölkəmizdə pandemiya ilə əlaqədar məsələləri ciddi nəzarətdə saxlamaq, virusun geniş yayılmasının qarşısını almaq və insanların həyatını maksimum şəkildə qorumaq mümkün olub. Xüsusi karantin rejimi dövründə yoluxma hallarının sayı minimuma endirilib, xüsusi rejimli xəstəxanalarda müalicə olunaraq sağalanların sayı yeni yoluxma hallarının sayını üstələyibdir.
Məlumdur ki, hələ sərt karantin rejimi bitməyib. Lakin hələ də bəzi vətəndaşlar karantin qaydalarına əməl etməməkdə maraqlıdır. Təbii ki, karantin qaydalarına əməl etməyənlər qanunvericiliyin tələbinə uyğun olaraq cəzalandırılır. Daxili İşlər Nazirliyinin (DİN) Baş Dövlət Yol Polisi İdarəsi iyulun 21-də xüsusi karantin rejiminin pozulmasına görə inzibati məsuliyyətə cəlb edilmiş hərəkət iştirakçılarının sayı və görülən tədbirlər barədə məlumatı açıqlayıb. Məlumatda qeyd olunur ki, koronavirus (COVID-19) infeksiyasının yayılmasının qarşısının alınması məqsədilə Bakı, Cəlilabad, Gəncə, Masallı, Mingəçevir, Sumqayıt, Yevlax şəhərlərində və Abşeron, Bərdə, Xaçmaz, Goranboy, Göygöl, Siyəzən və Şəki rayonları ərazisində tətbiq edilmiş sərtləşdirilmiş xüsusi karantin rejiminin pozulmasına görə iyulun 21-i saat 00:00-dan iyulun 22-si saat 00:00-dək olan müddət ərzində nəqliyyat vasitələri ilə hərəkətdə olan 775 nəfər Azərbaycan Respublikası İnzibati Xətalar Məcəlləsinin 211.1-ci, sərnişindaşımada istifadə olunan taksi və avtobuslarda tənəffüs yollarını qoruyan fərdi vasitələrdən istifadə edilmədiyinə görə isə həmin Məcəllənin 211.2-ci maddəsi ilə 75 nəfər olmaqla ümumilikdə 850 hərəkət iştirakçısı inzibati məsuliyyətə cəlb edilib: “Ümumilikdə 310 nəqliyyat vasitəsi ilə müvafiq icazə olmadan postlardan keçmək cəhdinin qarşısı alınıb”.
Karantin rejiminə əməl etməyənlərin qanunvericiliyin tələbinə uyğun olaraq cəzalandırılması ekspertlər tərəfindən müsbət qarşılanır.
“Karantin dövründə kimisə hardansa məcburi çəkindirirlərsə, uzaqlaşdırırlarsa, heç kəs deməsin ki, bu, insan hüquqlarının pozulmasıdır, bu, birmənalı məsələdir”
Sosioloq Aytəkin Kamranqızı bildirdi ki, karantin qaydalarına məhəl qoymayanlar sərt şəkildə cəzalandırılmalıdır: “Xarici təcrübədə cərimələr, kimin qaydanı pozmasından asılı olmayaraq, güzəştsiz tətbiq olunurdu. İtaliyada karantinə əməl etməməklə bağlı böyük cərimə sistemi var. Çində karantin qaydalarına əməl etməyənlər üçün ölüm cəzasına qədər cəza tədbirləri mövcuddur. Cənubi Koreya koronavirus infeksiyası yayılandan dərhal sonra qanunvericiliyinə baxdı, cərimələri artırdı və bir ilə qədər həbs cəzasının tətbiqini, 8200 ABŞ dolları cəriməni müəyyənləşdirdi. Qonşu ölkə Rusiyada 80 min rubl və bir ilə qədər həbs cəzası nəzərdə tutulub. Ukraynada buna görə, yarım ildən 5 ilə qədər cəza müəyyənləşdirilib. Dünyada elə zamanlar olub ki, karantin tədbirlərinin yerinə yetirilməsi üçün silahlı qüvvələr prosesə cəlb edilib. Güc vasitəsi ilə insanları karantinə alıblar. Çünki karantin rejimi məqsədlərə xidmət etməlidir. Bu, milli təhlükəsizlik məsələsidir. Milli təhlükəsizlik məsələsində insan hüquqları, lazım gələrsə, ikinci plana keçir”.
Həmsöhbətimiz onu da əlavə etdi, karantin dövründə kimisə hardansa məcburi çəkindirirlərsə, uzaqlaşdırırlarsa, heç kəs deməsin ki, bu, insan hüquqlarının pozulmasıdır. Bu, birmənalı məsələdir. İnsanların bir hissəsi psixoloji pozuntular keçirir, dözümsüz yanaşır. Amma burada məsələ odur ki, insanların özünün və ya başqa birinin sağlamlıq hüququna təhdid varsa, birinin hərəkət azaldığı digərinin yaşamaq hüququna təhdid yaradırsa, o, məhdudlaşdırıla və cəzalandırıla bilər”.
Son olaraq bildirək ki, virusa yoluxmuş bir nəfər qəsdən insanları yoluxdurmaq üçün çölə çıxırsa ona cinayət işi başlanmalıdır. Bu məsuliyyətsizliyin ağır nəticələri var. Bəlkə o insana görə, neçə nəfər ölüm təhlükəsi ilə üz-üzə qalacaq. Belə şəxslərə qarşı tolerant olmaq düzgün deyil.
Günel CƏLİLOVA
