Pandemiya dövründə ölkə vətəndaşlarının sosial-maddi dayanıqlığının təmin edilməsi üçün dövlət tərəfindən çoxsaylı proqram, paketlər həyata keçirilir. Burada işsizlər və sosial cəhətdən zəif olan aztəminatlı ailələrə xüsusi diqqət yetirilir.
Əmək və əhalinin sosial müdafiəsi naziri Sahil Babayev media nümayəndələrinə açıqlamasında qeyd edib ki, 190 manat birdəfəlik ödəmə ala bilməyən vətəndaşlara alternativ təkliflər edilir:“Birinci dəfə işsizlər və karantin rejiminə görə işini itirən, qeyri-formal işləyən şəxslərdən ibarət aztəminatlı vətəndaşlar üçün birdəfəlik ödəmə (190 manat) ala bilməyən vətəndaşlar nazirliyə müraciət edə bilər. Müraciət edən şəxslər ictimai iş yerləri ilə təmin edilə bilər”.
Lakin vətəndaşlar ictimai işlərə deyil, birdəfəlik ödəmə olan 190 manatı almağa üstünlük verir.
Operativ Qərargahın ötən brifinqində çıxış edən Prezidentin köməkçisi Şahmar Mövsümov deyib ki, bu gün əlavə ictimai iş yerləri mövcuddur:"İctimai işlərə cəlb olunmaq isyətən şəxslər üçün 20 mindən çox iş yeri mövcuddur. Təəssüf ki, bunun üçün müraciət edilmir. Onun əvəzinə 190 manat birdəfəlik ödəmə ilə kifayətlənilir".
Maraqlıdır, ictimai işlərə niyə maraq azdır? Ekspertlər bunun səbəbini nə ilə izah edir?
“Koronavirusla əlaqədar evdə işsiz oturmaqdansa, müvəqqəti olaraq bu işdə işləmək daha məqsədəuyğundur”
Sosial sahə üzrə ekspert İlqar Hüseynli qeyd etdi ki, ödənişli ictimai işlərə marağın az olmasının kökündə müxtəlif səbəblər dayanır:“İctimai işlərdə minimum əməkhaqqı həcmində, yəni 250 manat məvacib verilir. Bir çoxu bunun az olmasını əsas gətirərək işləmək istəmir. Halbuki, sözügedən vəsait az olsa da, hazırkı şərtlər üçün münasibdir. O mənada ki, koronavirusla əlaqədar evdə işsiz oturmaqdansa, müvəqqəti olaraq bu işdə işləmək daha məqsədəuyğundur. Təəssüflər olsun ki, bir çoxu bununla razılaşmır. Başqa bir tərəfdən, elələri var ki, ayda 190 manat hökumətdən yardım almağı ödənişli ictimai işdə işləyib 250 manat almaqdan üstün tutur. İstəyirlər ki, davamlı olaraq hökumət onlara yardım etsin. Bunun başqa bir səbəbi onunla əlaqədardır ki, muzdla işləyənlərin bir çoxu real gəlirlərini gizlədir. Yəni həmin gəlirlər leqallaşdırılmır. Belədə onlar işsiz kimi görünsələr də, əslində işsiz deyillər. Ona görə də bu və digər səbəblərdən ödənişli ictimai işlərə maraq azdır”.
Həmsöhbətimiz onu da əlavə etdi ki, ictimai iş sektorunun inkişafı, dövlətlə yanaşı, vətəndaşlar üçün də faydalıdır:“Bu ictimai işlər uzunmüddətli olacaq və insanların daimi işlə təmin olunması, yaxud gələcəkdə daha yüksək maaş müqabilində başqa bir iş tapması üçün əhəmiyyətlidir. İnsanlar 250 manatlıq maaşla ictimai işlərdə çalışmaqla sonradan özlərinə daha yüksək maaşlı işlər tapa bilər. İctimai işlərə cəlb olunmaqla həm də ailələrinin minimum ehtiyaclarını ödəyə biləcəklər. Hesab edirəm ki, vətəndaşlar ictimai işlərə maraq göstərməlidirlər”.
Bildirək ki, bəzi vətəndaşlar evdə oturub asan qazanc əldə etmək istəyirlər. Yaxşı olar ki, həmin vətəndaşlar ictimai işlərə maraq göstərsin. Belə olarsa onların daimi iş yeri olar.
Günel CƏLİLOVA
