Neftçala rayonu, Kür-Xəzər sahilindən, Muğan bölgəsindən açıq məktub və yaxud ağsaqqalın, şair, yazıçı, publisist İmamverdi Ölməzin (Zeynalov) dərgi barəsində açıq məktubu, lirik-fəlsəfi düşüncələri...
Hörmətli Nəzakət xanım, xəyalım məni Azərbaycanda ən məşhur məcmuə olan “Molla Nəsrəddin”, 1906-cı ilin aprelin 7-də Tiflisdə “Qeyrət”mətbəəsində nəşrə başlayan uzaq illərə apardı. Zamanın ciddi və ağır sınaqlarından uğurlu yol keçdi, 25 il Yaxın və Orta Şərqdə məşhurlaşdı, bəşəriyyətə xidmət etdi. Milli mətbuatımızın banısı, yaradıcısı H.Zərdabi hələ xeyli əvvəl “Əkinci” qəzeti ilə millətin tərəqqisində misilsiz əhəmiyyət kəsb etmiş oldu. Burada millilik, azərbaycançılıq yarandı, meydana çıxdı. Həm də, Azərbaycan publisistikasının bünövrəsi müəyyən edildi. Vaxtı ilə Rusiyada çap edilən “Sovremennik” dərgisindən milli mətbuatımız yüksəkdə dayandı, yeni zirvələr fəth etdi.
Hörmətli Nəzakət xanım, nə yaxşı ki, bu klassık, milli mətbuat ənənəsi sizin rəhbərlik etdiyiniz, 2011-ci ildən nəşrə başlayan “Yada düşdü” dərgisində uğurla davam etdirilir, oxucular bu dərginin hər yeni nömrəsini intizarla gözləyir, həvəslə abunə yazılırlar. Burada çap olunan hər bir yazını maraqla oxuyur, ciddi maraqla müzakirə edirlər. Dərgi ətrafında görkəmli alimlər, peşəkar jurnalistlər fəaliyyət göstərirlər. Siz, hər kəsə düzgün istiqamət verib, bir insan kimi qayğı göstərirsiniz. Sizin fəaliyyətinizdə Mirzə Cəlil publisistikasının varisliyi, ardıcıllığı, tələbkarlığı, diqqəti, səmimiyyəti mövcuddur. Gülər, nurlu üzünüz, böyük səmimiyyətiniz, zərif, incə, lirik-fəlsəfi şeirləriniz oxucuların hiss və duyğularına təsir edir onu yaşamağa, xarüqələr yaratmağa ruhlandırır. Sizin Vətənə, yurda bəşəriyyətə pak sevginiz, məhəbbətiniz ülvidir, nəhayətsizdir, sönsuzdur...
Bütün bunlar yaradıcı klassiklərimizin təsiridir. Sizin fövqəladə xarakteriniz hər bir yaradıcı insanda pozitiv enerji yaradır, bütün redaksiya üzvləri bu müqəddəs amalla yaşayıb yaradırlar. Elə buna görə də “Yada düşdü” dərgisi Azərbaycan dilinin və ədəbiyyatının zənginləşməsi kimi müqəddəs bir amala xidmət edir. Dərgi ana dilimizin keşiyində həmişə ayıq-sayıq dayanmışdır. Burada ölkəmizin hərb tarixi, görkəmli insanların həyat və fəaliyyəti, incəsənət adamlarının zəngin, mürəkkəb ömür yolları barəsində müfəssəl məlumat görmək mümkündür. Dərgi daim ziyalılığı, böyük humanist ideyaları təbliğ edir, cahana sığmayan təlatümlər yaşadır, publisistikada yaradılan, təsvir edilən hər obraz oxucu qəlbinə nüfüz edir, onun beynində, zehnində əbədi yaddaşa çevrilir.
“Yada düşdü” dərgisi yaddaşı mühafizə edir, düşüncə tərzi, ali hisslərin nəcib duyğulara çevrilməsi, göyün-yerin nur təzahürü, parlaq jurnalistika istedadının misilsiz təzahür formasıdır. Bu riyazi amil Xm - 1=0 mücərrəd fəlsəfi dəyər forması, alilikdən nəcibliyə, sonsuz səmalara qədər gedən əbədi bir məslək yoludur.
Dərgidə Azərbaycanın əbədi, ayrılmaz hissəsi olan Qarabağın, qərib Vətən-Cənubi Azərbaycan, Təbriz, Ərdəbil, Dərbənd digər yurd tarixi barəsində zəngin, elmi məlumatlar əldə etmək mümkündür.Təfəkkür publisistikada vahid vəhdət təşkil edir. Burada dərc olunan hər bir yazıda dilçilik elmi ilə yanaşı, tənqid, ədəbi tənqid, ədəbiyyat nəzəriyyəsi, tarixi oçerklər, zəngin peysanajlar birləşir, zəngin bir mənəvi kompleks yaranmış olur. Ilk növbədə oxucularda ictima-siyasi fikir formalaşır, xüsusi münasibət əhəmiyyət kəsb etmiş olur. Rəhbərliyinizlə 10 -ilə yaxın bir müddətdə nəşr olunan “Yada düşdü” dərgisi, onun hər bir nömrəsi ciddi, uzunömürlü publisistikanın nadir, təkrarolunmaz nümunəsidir. Kəskin, cəsarətli yazılar çap olunur, təbliğ edilir. Bu dərginin qardaş Türkiyədə, İraqda, habelə Orta Asiyada, Rusiya ərazisində özünə külli sayda oxucu tapa bilmişdir. Inşallah ki, Nəzakət xanım, yaxın günlərdə “Yada düşdü” dərgisi rus və ingilis dillərində də çap olunub daha geniş ölkələr və ərazilər əhatə edər.
Hərb tariximiz barəsində görkəmli tədqiqatçı, zəhmətsevər alim Ş.Nəzərlinin hər bir yazısı uğurlu, dəyərli sənət əsəridir. Bu qəbildən olan yazılar müasir gəncliyə mənəvi ruh verir. Onları hərbçi olmağa həvəsləndirir, işğal olunmuş Qarabağ torpaqlarını azad etmək, külli müqəddəs amala səsləyir və deyir: “Əskər ol, döyüşçü ol, sərkərdə ol, Vətəni qoru , sev, keşiyində dayan”!
Dahi yunan filosofu Aristotel “Politika” əsərində poeziyanı, sənəti, sözün qüdrətini yüksək qiymətləndirmişdir. Bəli, dahi filosofun bu qeyri-adi fikirləri sizin dərginizin hər bir nömrəsində, söz mülkü üzərində bərqərar olmuş, dərc olunmuş hər bir publisist yazını zəngin, mənəvi billur saraya bənzəyir, günəş olub ürəklərə nüfuz edir, Şərqdən-Qərbə, Cənubdan - Şimala işıq saçır, bu ürəklərin səmimi duyğusu və hərarətidir. Nəzakət xanım, bu odun, hərarətin başlanğıcı, mənbəyi, mənsəbi sizsiniz!
Bir qədər bu günkü mətbuat aləminə qiyabi də olsa səyahət edək. Hal-hazırda regionlarda, mərkəzdə yüzlərlə qəzet, dərgi nəşr olunur. O cümlədən Azərbaycan Yazıçılar Birliyinin nəzdində! Qəzet və dərgiləri vərəqləyirik. Bəzən sönük bədii yazılar, məqalələr, mənbəsiz, köksüz, bünövrəsiz sözlərin rabitəsizliyi, bəzən hətta hərfi səhvlər... Çünki, baş redaktorlar yerində deyildir. Təsadüfi adamlardır. Hətta belələri televiziya verlişlərinə çıxır, səs-küy salır, tarixi keçmişimizdən, müasirlikdən xəbər verirlər. Təəssüf, cox təəssüf... Xalq şairimiz Qabil demişkən səhv düşəndə yerimiz...Çünki baş redaktor yerində deyildir. Ümumiyyətlə, belə qəzet və dərgilərdə tənqid, ədəbi-tənqid məhv edilib gedir. Səviyyəsiz təriflər, ümumi şüar mövcuddur ki, bu da mövcud ədəbiyyatımızın ümumi inkişafına ciddi zərbə vurur. Yeni ədəbiyyat, yeni prosses adı altında nəşr olunan bu yazılar nə Şərqin, nə də Qərbindir. Yalnız və yalnız orijinal fəaliyyət yaradanların yurddan uzaq çürümüş təfəkkürünün məhsuludur. Sizin dərgi bunlardan tamam uzaqdır, klassizmə istinad edir, dünya miqyasına çıxmağa, yeni söz deməyə meyl göstərir və ona da nail olur. “Yada düşdü” dərgisi orijinaldır, həmişə axtarışdadr, rubrikalara nəzər salaq, səyahət edək.
“Alim sözü” bir ürəyin səssiz-səmirsiz duyğu və ifadəsidir.
“Həyat eşqi” kim yaşamaq, mənalı həyat sürmək istəmir ki”? Oxucu burada onu narahat edən bütün sualların cavabını tapır. Səmimi söhbət, xarakterik insan taleyi, vuruş, döyüş, real həyat.
“Sənətkar ömrü” rübrikasında təbii, bəzən həyatı tərk etmiş insanlar yada düşür, anılır, qınanılır ki, bəzən bu sənətkarların həyatda heç kimi qalmayıbdır. Nəzakət xanım, təmannasız, minnətsiz siz onları arayıb tapırsınız, xalqımıza, müasir gəncliyə təqdim edirsiniz. Axı, bu bizim tariximizdir, bu günümüz, gələcəyimizdir.
“Unudulmazlar” heç vaxt unudulmur. Dahi şairimiz Mikayıl Müşfiq demişkən “Vətən ücün yaşayan, Vətən ücün ölən, Səmimi bir insan nə bəxtiyardır”. Belə bəxtiyarların sizin redaksiya heyəti, fəal publisistlər oxuculara təqdim edir, yeni bir tarix yazırlar.
“Alın yazısı”- bu rubrika insan ömrünün parlaq xatirəsi, nadir simvoludur. Xalq şairimiz Səməd Vurğun demişkən, “Bizdən ayrı düşənlərə borcumuzdur ehtiram”!
“Hər şey gəldi-gedərdi, qalan xatirələrdi...” Bəi, biz gəldi gedərik, sən yaşa dünya. Dünyaya ömür bəxş edənlərdən biri də sizsiniz, Nəzakət xanım. Bu rubrika da sizin xeyirxahlığınızın simvoludur, həyat ifadəsidir.
“Poeziya” bölməsində uğurlu insanlar dərc olunur ki, bu da bir çox qəzet və jurnallarda çap olunan, yüksək fəaliyyət göstərənlərdir. Çünki sizin dərgidə poeziyanı, şeri dərindən bilən yaradıcı heyət fəaliyyət göstərir.
“Tarixin izi ilə”-yaddaşımız cavanlaşır, müasirləşir, zənginləşir.
“İstedadlar”rubrikası - insanlıq aləmi hər zaman axtarışdadır. Dərgi yeni-yeni istedadlar kəşf edir, üzə çıxarır, səmimiyyətlə təqdim edir.
“Mədəni irsimiz” çoxşaxəli, zəngin bir rubrikadır. İnkişafımızın müxəlif dövrləri təqdim olunur, aşkarlanır.
“Könül ki, var şüşədir”-bəşəri simfoniya, ali hisslərin tükənməz simvolik təsvir, əksi, surəti...
“Yubiley təbriki” rubrikası. İlahi, belə şad, büsatlı ad günləri hər kəsə nəsib olsun. Nəhayət, ən yeni rubrika -“Körpü”.
“Körpü”-əbədi-əzəli yurdumuz-Təbriz, Ərdəbil, Cənubi Azərbaycan, həsrət Azərbaycan. Şəhriyar dünyası, Sülyman Rüstəm fəryadı. Həmişə görüşməyə can atan Ulu Şəhriyarla dahi Süleyman Rüstəm görüşdülər. Bu körpü əbədi olacaqdır. İnanırıq ki, bu körpü heç vaxt dağılmayacaqdır! Burada şimal-cənub birləşir, var olsun bütöv, qüdrətli Azərbaycan!
Nəzakət xanım! Bu nə qədər alicənab, müdrik, cəsarətli bir addımdır. Axı, cənublular doğma dillərinə həsrətdirlər. İnsanların bu dərgiyə ciddi mənəvi ehtiyacı vardır. Bu işdə sizə böyük uğurlar arzu edirəm!
Hörmətli Nəzakət xanım! Siz fidan, körpə balaları da unutmamısınız. Hər dərgidə “Uşaqlar, ay uşaqlar”səhifəsi də maraqla oxunur, ürəklərə yol tapır. Uşaqlar gülür, dünya gülür. Dahi Viktor Hüqo demişdir: “Dünyada ən saf gülüş uşaq təbəssümüdür”. Siz bu gülüşü insanlara təqdim edə bilmisiniz. Çox sağ olun.
Dərgidə yüksək poliqrafiya sənəti də nümayış etdirilir, şəkillər rəngarəng, səhifələr personajlar hər biri oxucu üçün ürəkaçan, doğmadır. Dərgini inanın ki, əlindən yerə qoymaq istəmir, oxuduqca bir də oxumaq istəyirsən. Dərginin səhifələrində sizin həmişə gülər, nurlu təbəssümünüz həkk olunubdur. Dərgi sizin daxili, zahiri görünüşünüzün məhsulu, qələminizin təcəssümüdür. Siz təkrarolunmaz baş redaktor, təsisçisiniz. Sizdə mətbuata Həsən bəy Zərdabi sevgisi, Mirzə Cəlil qüdrəti vardır. Bilmirəm, bütün ürək sözlərimi qələmə ala bildimmi? Sizə bütün yaradıcı kollektivinizlə birlikdə can sağlığı, yeni-yeni uğurlar arzu edirəm.
Hörmətlə: İmamverdi ÖLMƏZ(Zeynalov) AYB –nin üzvü, Prezident təqaüdçüsü, 20 Yanvar Əlili, şair, yazıçı, publisist.
