07/04/2020 14:28
728 x 90

Yeni parlamentin tərkibinə uyğun MSK-da da dəyişikliklər olacaq

img

Hər dəfə ölkədə yeni seçkilər keçiriləndə bütün diqqətlər Mərkəzi Seçki Komissiyasına tuşlanır. Parlament seçkiləri tam başa çatıb, nəticələr Konstitusiya Məhkəməsi tərəfindən təsdiqlənəndən sonra MSK-nın yeni tərkibinin kimlərdən ibarət olacağı müzakirə mövzusuna çevrilir.

Qanunvericiliyə görə, parlament seçkilərindən sonra Mərkəzi Seçki Komissiyası da yenidən formalaşmalıdır. Seçki Məcəlləsinə əsasən, MSK-nın səlahiyyət müddəti 5 ildir.

Qanunvericiliyə görə, Mərkəzi Seçki Komissiyasının yeni tərkibi yeni seçilmiş Milli Məclis fəaliyyətə başlayandan sonra onlar tərəfindən təsdiqlənməlidir.

Qeyd edək ki, qanunvericiliyə uyğun olaraq, MSK-nın 6 üzvü deputatları Milli Məclisdə çoxluq təşkil edən və onların namizədliklərini təqdim edən siyasi partiyanı, digər 6 üzvü heç bir siyasi partiyaya mənsub olmayan (müstəqil) və onların namizədliklərini təqdim edən deputatları, yerdə qalan 6 üzvü isə deputatları Milli Məclisdə azlıq təşkil edən və onların namizədliklərini təqdim edən siyasi partiyaları təmsil edir. Bu baxımdan seçkilərdən sonra seçilməyən partiyalar MSK-dan çıxırlar. Çıxanlar isə yeni gələn partiyalarla əvəz olunur.

MSK-nın yeni tərkibinin formalaşması ilə bağlı ekspertlərin fikri necədir?

  • Rəfail Becanov: “Dairə seçki komissiyaları da MSK-dakı say tərkibinə uyğun şəkildə olan nisbətdə formalaşır”

Siyasi şərhçi Rəfail Becanov “Bakı-Xəbər”ə açıqlamasında bildirdi ki, MSK-nın tərkibi qanunvericiliyin tələbinə uyğun şəkildə formalaşır: “MSK-nın tərkibində təyinat olmur. Parlamentdə təmsil olunan siyasi qüvvələr və bitərəf namizədlərin sayına uyğun təşkil olunur. MSK-da parlamentdə təmsilçilik qazanmış siyasi partiyaların və bitərəflərin namizədləri də yer alırlar. Hesab edirəm ki, formalaşmada qanunun tələbləri tam nəzərə alınacaq. Əsas məsələ budur ki, MSK öz üzərinə düşən funksiyanı lazımi şəkildə yerinə yetirsin. Seçkilərin keçirilməsini təşkil edə bilsin. MSK-nın işinin diqqət mərkəzində olması təbiidir. Çünki namizəd çoxdur, cavabdeh qurum isə birdir. Bütün namizədlər deputat olmaq istəyir. Bəzən baş verən neqativ hallar, bəzən isə rəqiblərə qalib gələ bilməməkla bağlı vəziyyət bütün ittihamların mərkəzinə MSK-nı gətirmiş olur. Biz bütün seçkilərdə analoji vəziyyəti görürük. Sizi inandırım ki, MSK-nın tərkibində kimlərin olmasında asılı olmayaraq, biz növbəti seçkilərdə də analoji ittihamları eşidəcəyik. Dairə seçki komissiyaları da MSK-dakı say tərkibinə uyğun şəkildə olan nisbətdə formalaşır. Bütün bunlar Seçki Məcəlləsində konkret öz əksini tapıb”.

  • Mehman Muradlı: “Qanunverici hakimiyyətdə təmsil olunan tərkibə uyğun da MSK formalaşacaq”

Hüquqşünas Mehman Muradlı da qəzetimizə bildirdi ki, MSK-nın formalaşmasında qanunun tələblərindən kənara çıxılması mümkün deyil: “Parlament seçkilərindən sonra qanunverici hakimiyyətdə təmsil olunan tərkibə uyğun da MSK formalaşacaq. MSK-nın 6 üzvü deputatları Milli Məclisdə çoxluq təşkil edən siyasi partiyanın, digər 6 üzvü heç bir siyasi partiyaya mənsub olmayan bitərəflərin, qalan 6 üzvü isə deputatları azlıq təşkil edən siyasi partiyaların nümayəndəsi olacaq”.

Məhəmmədəli QƏRİBLİ

Son xəbərlər