Prezident İlham Əliyev Bakı Dövlət Universitetinin 100 illiyi ilə bağlı tədbirdə Azərbaycanın yalnız özünə güvənməli olduğuna dair fikir səsləndirib.
Ölkə başçısı qeyd edib ki, bizi bizdən çox sevən yoxdur: “AXC-Müsavat cütlüyü dövründə prezidentin kabinetinin qapısını xarici səfirlər ayaqları ilə açırdılar, ona göstərişlər verirdilər. O da məzlum bir adam kimi o göstərişləri yerinə yetirirdi. Ona görə belə günə düşdü. Məgər bizi bizdən çox sevən, istəyən varmı? Bu gün bəzi hallarda bəzi xarici dairələrdən eşidirik ki, biz Azərbaycana kömək etmək istəyirik, biz Azərbaycanı belə inkişaf etmiş ölkə kimi görmək istəyirik. Hamısı yalandır. Mən tam səmimiyyətlə deyirəm. Bizim ən ağır günlərimizdə xəzinə boş idi, Xalq Cəbhəsi-Müsavat cütlüyü talamışdı, ləl-cavahirat fondunu talamışdı. İnsanlar öz axırıncı qızıl əşyalarını aparırdılar ki, ordumuza kömək etsinlər. O vaxt prezident, dövlət katibi, baş nazir o ləl-cavahirat fondunu talan etmişlər. İndi onun izi-tozu da qalmayıb. O vaxt xəzinə boş olanda, biz kreditlər üçün müraciət edəndə heç kim bizə kredit vermirdi. Yaxşı, əgər siz Azərbaycanı bu qədər sevirsinizsə, nə üçün o vaxt bizə kömək etməmisiniz?! Nə üçün ağır vəziyyətdə olan ölkəyə kömək etməmisiniz?! İndi sıra ilə düzülüblər bizə kredit vermək istəyənlər. Biz almırıq. Biz özümüz kredit veririk. Bizim xarici dövlət borcumuz ümumdaxili məhsulun 17 faizini təşkil edir. Bu göstəriciyə görə biz dünyada doqquzuncu yerdəyik. İndi istənilən məbləğdə – bax, sabah 10 milyard dollar lazım olsa, alarıq. Almırıq, qoymuram. Borcu yenə də endirirəm. Ona görə kimsə deyəndə ki, biz Azərbaycanın yaxşılığını istəyirik, inanmayın, gənclər də inanmasınlar. Bizdən çox bizi istəyən heç vaxt olmayıb və olmayacaq”.
Göründüyü kimi, Prezident bizim xalq olaraq yalnız özümüzə güvənməyimizin lazım olduğuna diqqət çəkir. Ancaq onun bu fikirlərini fərqli aspektdə yozanlar da var. Məsələn, bəzi radikal dairələr deyirlər ki, bu fikirlərin inkişafı bizi bütün dünya ilə üz-üzə qoya bilər. Hər halda, Prezident bütün bunları nəzərə alıb belə fikirlər söyləyib. Prezidentin bu bəyanatının Azərbaycan üçün nə kimi əhəmiyyəti var?
“Bu həm də Azərbaycanın yaxın tarixinin gənclərə düzgün aşılanması baxımından əhəmiyyətlidir ki, gənclərimiz dostlarını və düşmənlərini yaxşı tanısınlar”
Politoloq Qabil Hüseynli qəzetimizə bildirdi ki, ölkə başçısı heç vaxt ölkəni çətin vəziyyətə sala biləcək fikirlər işlətməz: “Hər ölkə başçısında da belə cəsarət olmur. Açığını deyim ki, bəzi məsələlərdə İlham Əliyev xalqı ilə çox səmimi və açıq mətnlə danışır. Yəni başqa ölkə başçıları kimi fikirlərini diplomatik tərzdə pərdələyərək demir. Elə dildə danışır ki, xalq onu anlasın. Bu məsələdə də Prezident fikirlərini açıq ifadə edib. Xüsusilə də fikir versəniz görərsiniz ki, bunları Azərbaycan gəncliyinə xitabən deyir. Bu gün müstəqillikdən sonra anadan olan vətəndaşımızın artıq 28 yaşı var. İstəyir ki, onlar da əsl həqiqətlərin nə olduğunu dövlət başçısının dilindən eşitsinlər. Doğru olaraq qeyd edir ki, müstəqilliyin ilk illərində biz çox çətinliklər çəkdik. Azərbaycana əsl dost əlini o vaxt uzatmaq lazımıydı. Təbii ki, biz dost ölkələri də tanıyırıq. Amma, ən başlıcası, bizim özümüzə güvənməyimizin vacibliyinə işarə edilir. Bunun Azərbaycan xalqına bilirsiniz nə kimi xeyri var? Ölkə başçısı xalqına bir-birini sevməyi, daha mehriban olmağın vacibliyini təlqin edir. Onlara deyir ki, artıq sizin arxanızda qüdrətli bir Azərbaycan dövləti var. Bu fikirlər ölkənin imicini artırır, bizim heç kimdən asılı olmadığımızı göstərir. Ən başlıcası isə vətəndaş həmrəyliyinin daha möhkəm olmasına bir stimul verir. Belə bir deyim var: “dost dar gündə tanınar”. Prezident doğru olaraq qeyd edir ki, indiki Azərbaycana əl uzatmaq istəyənlər çoxdur. Bunu vaxtında etmək lazım idi. Bu həm də Azərbaycanın yaxın tarixinin gənclərə düzgün aşılanması baxımından əhəmiyyətlidir ki, gənclərimiz dostlarını və düşmənlərini yaxşı tanısınlar”.
Məhəmmədəli QƏRİBLİ
