Rusiyanın aparıcı KİV-i həmin ölkənin Ermənistanla münasibətlərinin gərginləşməsinə dair materiallar dərc edir. Həmin məlumatlarda qeyd edilir ki, buna səbəb Ermənistanın “milli qəhrəman” kimi elan etdiyi, əslində isə qatı faşist olan və Hitlerin silahdaşı kimi SSRİ-yə qarşı vuruşmuş Qaregin Njdenin şəxsiyyətinə rəsmi İrəvanın verdiyi aşırı yüksək qiymət olub.
Qeyd edək ki, bu mövzu faşizm üzərində qələbənin 75 illiyi ilə bağlı MDB ölkə başçılarının Aşqabadda keçirilən görüşündə İlham Əliyev tərəfindən gündəmə gətiriləndən sonra daha da aktivləşməyə başlayıb. Həmin vaxt İlham Əliyev bildirmişdi ki, Ermənistan rəhbərliyi bir tərəfdən faşizm üzərində qələbəni qeyd edir, digər tərəfdən isə mahiyyət etibarilə faşist olan Njdeyə heykəl ucaldır. Ölkə başçısı həmin heykəlin götürülməsi ilə bağlı konkret tələb qoymuşdu. Bunun ardınca Rusiyanın Armavir şəhərində də Njdenin xatirəsinin əbədiləşdirildiyi faktı ortaya çıxdı. Bu mövzuda gedən müzakirələrin təsirinə düşən yerli deputatlardan biri Njdenin xatirəsinin əbədiləşdirildiyi löhvənin üzərinə boya tökdü.
Artıq vəziyyət o yerə çatıb ki, Ermənistanın təbliğat maşını Njdenin faşist mahiyyətindən imtina etməyin yollarını düşünür. Paşinyan hakimiyyəti fikirləşir ki, Njdenin heykəlinin götürülməsi daxili auditoriyada böyük narazılığa səbəb ola bilər. Bu səbəbdən də dövriyyəyə belə bir məlumat buraxırlar ki, guya Njde faşist yox, Ermənistanı blokadadan çıxaran şəxs olub. Qeyd edirlər ki, məhz Njde Ermənistanın Sunik və Mehri kimi ərazilərini Ermənistanın tərkibində saxlamağa kömək edib. Ancaq görünən budur ki, belə faktlarla Rusiya mətbuatını yayındırmaq mümkün olmayıb. Rusiya KİV-i konkret məlumatlara əsaslanaraq Njdenin faşist fəaliyyətindən ətraflı bəhs edir. Artıq Rusiyanın rəsmi dairələrində və hətta rəhbərliyində bu mövzuya həssas yanaşma ortaya qoyulur.
İki gün əvvəl Çexiyanın paytaxtı Praqanın Rjeporıye rayonunda Böyük Vətən Müharibəsi zamanı faşistlərin tərəfinə keçmiş və sovet ordusunun əsir düşmüş döyüşçülərindən ibarət Rusiya Azadlıq Ordusu (RAO) yaradan general Andrey Vlasovun döyüşçülərinə abidə qoyulmasına hazırlıq görülməsi Rusiya Prezidenti Vladimir Putin tərəfindən tənqid edilib.
Həmin rayonun başçısı Pavel Novotnı isə Rusiyanın Praqadakı səfirliyi vasitəsilə ona cavab məktubu göndərib. Rayon başçısı məktubunda bildirir ki, abidənin tikilməsi məsələsini Moskva ilə müzakirə etmək niyyətində deyil.
Bütün bu proseslər göstərir ki, İlham Əliyevin başlatdığı etiraz öz bəhrəsini verir və Ermənistan rəhbərliyini dilemma qarşısında qoyub. Mövzunun Rusiya mətbuatı tərəfindən də aktiv işıqlandırılması məsələyə Rusiya ictimai rəyinin də həssas yanaşmasından xəbər verir. Çünki faşizm üzərində qələbədə daha çox insan itkisinə məhz Rusiya məruz qalıb. Bu baxımdan da Rusiya ilə dostluq edən bir ölkənin həm də rəsmi səviyyədə faşizmə rəğbət bəsləməsi yolverilməz sayılır. Artıq Rusiya ilə Ermənistan arasında ciddi fikir ayrılığına səbəb olan bu məsələdən görünür ki, Ermənistan rəhbərliyinin güzəştə getməkdən başqa çarəsi qalmır.
Məhəmmədəli QƏRİBLİ
