Erməni mətbuatı Azərbaycan Prezidentinin Hitlerin əlaltısı olan, faşizmə xidmət edən Qaregin Njdenin Ermənitan hökuməti tərəfindən İrəvanda heykəlinin qoyulmasını pisləməsi, bununla da Ermənistanın faşizmə açıq dəstək verdiyini ifşa etməsi əməlli-başlı ermənilərin kürkünə birə salıb. Ermənilərin Q.Njdenin heykəli ilə bağlı Azərbaycan Prezidenti İlham Əliyevin səsləndirdiyi fikirlərdən ciddi narahatlıq keçirdiklərini yazan düşmən ölkənin mediası Njdenin “əfsanələşdirilməsinin” səbəblərinə öz aləmində bəraət qazandırmaq istəyib.
Erməni KİV-i yazır ki, Azərbaycanda Njdenin heykəlinin götürülməsi ilə bağlı təbliğat güclənib. Onlar iddia edirlər ki, guya Azərbaycan təbliğatı Njdenin heykəli ilə bağlı məsələni tam kontekstdən çıxarır, onun heykəlinin İrəvanda ucaldılması heç də faşizmə xidmət etməsi, faşistlərlə müttəfiq olaraq SSRİ-yə qarşı döyüşməsi səbəbilə bağlı deyil. Erməni mediası iddia edir ki, Njdenin heykəlinin qoyulmasına səbəb onun Sünik və Mehri vilayətlərinin Ermənistanın tərkibində saxlanmasında xüsusi fəallığının olması olub. “Belə olmasaydı, həmin ərazilər Azərbaycan tərəfdən blokada şəraitində saxlanacaqdı. Bu gün Q.Njdenin köməkliyi ilə Ermənistanın tərkibində saxlanan həmin vilayətlərin əhəmiyyətini yəqin ki, çoxları unudur. Faktiki olaraq, Rusiya ilə Ermənistan arasında hava dəhlizi yoxdur. Azərbaycan və Gürcüstan bu dəhlizi bağlayıb. Ona görə də Ermənistanda olan Rusiya hərbi bazalarına yüklərin daşınması üçün Rusiya təyyarələri Xəzər dənizi üzərindən İrana keçir və İrandan da Sünik və Mehri üzərindən Ermənistana daxil olurlar” - deyə erməni mediası yazır.
“Ermənilər bu dəhlizin vaxtilə faşist Njdenin “mübarizəsi” nəticəsində əldə edildiyini Rusiyaya eşitdirmək istəyir, amma Zəngəzura Sovet hökumətinin dəstəyilə sahibləndiklərini unudurlar”
Azərbaycan Milli Elmlər Akademiyasının Albanşünaslıq İnstitutunun ermənişünaslıq şöbəsinin müdiri, professor Qasım Hacıyev bizimlə söhbətində bildirdi ki, ermənilər əli türk qanına batan daşnakların hamısını qəhrəmanlaşdıraraq onlara heykəllər qoyublar. Q.Hacıyevin sözlərinə görə, Azərbaycan Prezidentinin faşist Njdenin heykəli ilə bağlı Aşqabaddakı çıxışından sonra artıq dünyanın müxtəlif yerlərində antierməni dalğası güclənməkdədir. Rusiyanın bəzi vilayətlərindən Njdenin barelyefinin, büstünün götürüldüyünü xatırladan Q.Hacıyevin bildirdiyinə görə, hazırda Rusiyanın özündə çox böyük anti-Njde kampaniyası həyata keçirilir. “Faşizmdən əziyyət çəkən dünya Njdenin saysız cinayətindən xəbərdardır. Onun dünya üçün hələ tam açılmamış cinayətlərindən biri də əsrin əvvəllərində türklərə qarşı qətliamlar törətməsidir ki, bunu da ermənilər özləri etiraf edirlər. Yəni Njde İkinci Dünya Müharibəsinə bir cinayətkar olaraq, əli yüzlərlə türkün qanına batmış bir daşnak kimi getmişdi. Oradakı əməllərindən də hər kəsin xəbəri var. Ermənilər özləri etiraf edirlər ki, Sünik və Mehri Ermənistana sonradan verilib. Bilirsiniz ki, onlar Zəngəzur mahalına Sünik deyirlər və Zəngəzurun da ermənilərin əlinə hansı yollarla keçməsi tarixdən məlumdur. Onu da deyim ki, həm Sünik, həm Zəngəzur, həm də Mehri tamamilə türk mənşəli adlardır və onların ermənilərlə heç bir əlaqəsi yoxdur. Tarixi Azərbaycan ərazisi olan Zəngəzur torpaqlarına ermənilər dəfələrlə iddia irəli sürüblər, buna görə də Zəngəzuru ələ keçirmək üçün hücumlar ediblər, dinc türklərə divan tutublar. Zəngəzurun işğalında Njde də fəal iştirak edib və onunla bərabər Andranik, Amazaps, eləcə də digər daşnaklar bizə qarşı zülmlər ediblər, ağır tarixi cinayətlər törədiblər. Zəngəzurun Ermənistanın tərkibinə verilməsi birbaşa Lenin və Stalinin göstərişi ilə olub. Bu sirr deyil.
Zəngəzurun Ermənistanın tərkibinə verilməsində böyük rol oynayan SSRİ rəhbərliyi bununla ermənilərin Azərbaycan torpaqlarını hissə-hissə mənimsəməsinə şərait yaratdı. Zəngəzurun ermənilərə verilməsi böyük tarixi cinayətdir. Bu cinayətlərin də iştirakçılarından biri Njdedir. Njde bir xaindir, cinayətkardır, türk qanı axıtmış, dünya insanlarına qarşı cinayətlər törətmiş birisidir.
Ermənistanın Sünik və Mehri dəhlizinin Rusiya üçün yeganə hava dəhlizi olduğunu qabartmaqla Rusiyaya qarşı təzyiq göstərmək istəyirlər. Sünik və Mehri dəhlizinin Rusiya üçün oynadığı rol Rusiyanı şantaj etmək məqsədilə irəli sürülür. Guya ki, bu dəhliz olmasa, Rusiya Ermənistandakı hərbi bazaları ilə əlaqəni tamam itirə bilər.
Bu gün Rusiyada böyük anti-Njde hərəkatı başlayıb, sadə vətəndaşlardan tutmuş, dövlət rəsmilərinə qədər hər kəs İrəvanda Njdeyə heykəl qoyulmasına qarşı çıxış edir, onun qəhrəman yox, faşist əlaltısı olduğunu qeyd edirlər. Rusiyada başlayan anti-Njde hərəkatının dayandırılması üçün Ermənistan müxtəlif şantaj yollarına, təzyiq vasitələrinə əl atır, bunlardan biri də Sünik və Mehri hava dəhlizidir. Ermənilər bu dəhlizin vaxtilə faşist Njdenin “mübarizəsi” nəticəsində əldə edildiyini Rusiyaya eşitdirmək istəyir, amma Zəngəzura Sovet hökumətinin dəstəyilə sahibləndiklərini unudurlar. Yəni guya vaxtilə Njde olmasaydı, Zəngəzur mahalı Ermənistanın olmayacaqdı. Əslində isə ermənilər Zəngəzura, İrəvana, eləcə də digər türk torpaqlarına rusların dəstəyi, köməyilə sahib olduqlarını unutmamalıdırlar” - deyə Q.Hacıyev vurğuladı.
İradə SARIYEVA
