Sabiq səhiyyə naziri Əli İnsanovun partiya yaradıcılığında maraqlı proseslər yaşanır. 15 nəfərlik təşkilat komitəsi elan olunandan sonra artıq həmin siyahıda adları yazılmış iki şəxs onların prosesdən xəbərlərinin olmadığını bildirib. Şəhid Milli Qəhrəman anası Qalibə Budaqova adının siyahıya salınmasına ilk etiraz edənlərdən oldu.
O, mediaya açıqlamasında bildirdi ki, xəstədir, heç nədən xəbəri yoxdur və hər hansı bir prosesdə iştirak etməyib. Sonra isə rayonlardan birində məhkəmə sədri işləmiş şəxs etirazını bildirdi. Dedi ki, heç bir partiya quruculuğunda iştirak etmədiyi halda, onun adını siyahıya təşkilat komitəsinin üzvü kimi qeyd ediblər.
Elə bütün bu proseslər göstərir ki, Ə.İnsanovun yaratdığı partiyanın adı ilə mahiyyəti üst-üstə düşmür. Ad demişkən, etibarlı mənbənin bizə verdiyi məlumata görə, Ə.İnsanov partiyanın adının da halallığını almayıb. Mənbənin sözlərinə görə, Ə.İnsanov həbsə düşəndən sonra onun alovlu müdafiəçisi olan Rizvan Talıbov adlı ictimai fəal bu adda qurum yaradıb. Hətta bildirilir ki, 2006-cı ilin sonunda Qərbi Azərbaycana Qayıdış Birliyinin rəhbəri R.Talıbov “Haqq və Ədalət” Partiyasının təsis qurultayının keçirilməsinin təşkili üçün 21 nəfərdən ibarət təşkilat komitəsi qurub və elan edib. R.Talıbovun eyniadlı qəzet buraxdığı da bildirilir. Mənbənin dediyinə görə, onun yolunda sonsuz məhrumiyyətlərə düçar olmağına baxmayaraq, Ə.İnsanov həbsdən çıxandan sonra R.Talıbovdan nə partiyanın adının halallığını alıb, nə də heç onu yeni yaradılan qurumda görmək istədiyini bildirib. R.Talıbov, nədənsə, bu məsələlər ətrafında danışmaq istəmir. Çox güman ki, onun verəcəyi açıqlamalardan sonra Ə.İnsanovun onsuz da zədəli olan reputasiyası tamamilə məhv olacaq. Hələlik isə ortada olan faktlar bunlardır. Ə.İnsanov ona mal-mülk oğrusu deyənlərlə razılaşmasa da, əməlləri ilə bunu sübuta yetirir. Həm də saxtakarlığa yol verməkdən belə çəkinməyərək, siyasi ambisiyalarını reallaşdırmağa çalışır. Ortada iki, bəlkə də sayı artacaq dərəcədə insanı aldadaraq prosesə cəlb etmək faktı var. Bütün bunlar isə adı oğurlanan və başqasına məxsus olan “Haqq və Ədalət” brendi altında edilir. Yəqin Ə.İnsanov nazir olan zaman etdiyi qanunsuzluqlarla siyasi arenada edilən qanusuzluqların yerini səhv salıb. Düşünür ki, nazir olduğu dönəmdəki kimi, hamı ona “amin” deyəcək. Ancaq nə dərəcədə yanıldığı və necə biabır olduğu ortadadır. Siyasi perspektivin olmaması bir tərəfə, Ə.İnsanov yaratdığı qurumda elementar halallıq prinsiplərini də qorumur. Bünövrəsi fırıldaq, haramla qurulan işdən isə kimsə xeyir görə bilməz.
Məhəmmədəli QƏRİBLİ
