Ölkə başçısı İlham Əliyev Bakı Dövlət Universitetinin 100 illiyi ilə bağlı keçirilən tədbirdə müxtəlif sahələri əhatə edən məzmunlu nitq söyləyib.
Prezident xüsusilə də xarici qüvvələrin ölkəmizdə həyata keçirmək istədiyi məkrli planların reallaşmadığını bildirib: “...Bax, dediyim sözlərə görə. Bizə inanırlar, bizi tanıyırlar, bilirlər ki, sözümüzlə əməlimiz birdir. Bilirlər ki, heç kimin qarşısında baş əymirik, lap ən ağır sınaqlarla, ən ağır təxribatlarla üz-üz qalsaq belə. Bu müddət ərzində belə təxribatlar az olmayıb. 2003-cü ili xatırlayaq. Prezident seçkilərindən sonra Azərbaycanda çevriliş cəhdi. Heç kimə sirr deyil ki, mən prezident seçkilərində təmiz qələbə qazanmışdım. Çünki insanlar Heydər Əliyev siyasətinə səs vermişdilər. İğtişaş törədildi. 2005-ci il. Azərbaycan artıq o inqilabların sırasında növbəti yer kimi göstərilirdi. Belə maykalar buraxılmışdı, üzərində yazılmışdı: “Gürcüstan, Ukrayna, Qırğızıstan, Azərbaycan”. Yəni dördüncü biz olmalı idik və bizdən sonra da başqaları olmalı idi. Biz dayandırdıq bu vəbanı, bu xəstəliyi, bu azarı. İndi bütün dünya görür ki, bu inqilablar o ölkələrə ancaq bədbəxtlik gətirib və indi öz problemləri ilə üz-üzədirlər, orada iğtişaşlar səngimir. Çünki oralara bu zəhərli inqilab toxumu səpilmişdi. Necə ki, bu zəhərli alaq otu kimi Xalq Cəbhəsi-Müsavat cütlüyü hakimiyyətdə bir il qaldı. O qədər zəhərlədilər ki, bu günə qədər də o zəhərin təsiri bəzi yerlərdə qalır. Ona görə növbəti məntəqə biz olmalı idik və narıncı maykaları da gətizdirmişdilər, sadəcə olaraq, özünü müxalifət adlandıran ünsürlər bir daha öz kütlüyünü göstərmişlər. Fikirləşmədilər ki, noyabr ayında parlament seçkiləri keçirilməli idi, noyabr ayı soyuq keçir. Ona görə o maykaları bilmirdilər necə geyinsinlər, bəziləri pencəyin üstündən maykalar geymişdilər. Yəni çox gülməli bir mənzərə idi. O da alınmadı. Nəyə görə?! Xalq istəmədi! Xalq dedi ki, yox, bəsdir, görmüşük sizi, necə ki, hakimiyyət uğrunda mübarizə naminə talamısınız, döymüsünüz, söymüsünüz, öldürmüsünüz, Gəncəni bombalamısınız, vətəndaş müharibəsini başlamısınız, Qarabağı satmısınız, Şuşanı satmısınız, Laçını satmısınız. Sonra da fərari kimi qaçmısınız, prezident Kələkiyə, dövlət katibi Kələkiyə, o birilər isə vəzifələrini dondurdular”.
Göründüyü kimi, ölkə başçısı xarici qüvvələrin əli ilə həyata keçirilən inqilabların Azərbaycanda qarşısının alındığını qeyd edir. Həmin proses Azərbaycanda niyə həyata keçmədi?
“Belə məsələlərdə hər bir fərd dövlətinin yanında olmalıdır”
Azərbaycan Sosialist Partiyasının sədri Elşən Həsənov “Bakı-Xəbər”ə bildirdi ki, Prezidentin səsləndirdiyi fikirlər konkret faktlara əsaslanır: “Mən ölkə başçısının çıxışına qulaq asdım. Sizin dediyiniz məqam xüsusilə yadımdadır. Bəli, 2005-ci ildən başlayaraq keçmiş postsovet ölkələri ilə bağlı bir hərəkat başladı. Bunun başqa adına isə Sorosun “rəngli inqilab”ları da deyirdilər. Ölkə başçısı doğru olaraq qeyd edir ki, bəzi keçmiş SSRİ respublikalarında həmin plan baş tutdu. Hərəsinə də bir rəngli ad verdilər. Azərbaycan üçün isə narıncı rəngi seçmişdilər. Həmin rənglər inqilabın simvolu sayılırdı. Fikir versəniz görərsiniz ki, həmin ölkələrin heç biri tərəqqi əldə edə bilmədi. Ukraynda tez-tez hakimiyyətlər dəyişdi, nəticədə ölkə ərazisinin böyük bir hissəsini itirdi. Gürcüstan da onun kimi. Bu ölkənin də separatizm problemi olduğu kimi qaldı. Bu günün özündə Gürcüstanda meydan mübarizəsi gedir. Qırğızıstan da onun kimi. Mən heç də o fikirdə deyiləm ki, hakimiyyət uğrunda mübarizə aparılmasın. Bu, hər bir partiyanın haqqıdır. Burada qeyri-adi, qanunsuz nəsə yoxdur. Ancaq bütün dünyada gedən proseslərdən məlumdur ki, inqilablar heç bir ölkəyə firəvanlıq bəxş etmir. Hakimiyyət uğrunda mübarizə, hakimiyyətin dəyişməsi sivil, qanuni yollarla həyata keçməlidir. Bu heç də o anlama gəlmir ki, Azərbaycana olan xarici təsirlər dayanıb. Müxtəlif üsullarla bizim dövlətçiliyimizi sarsıtmaq istəyirlər. Etnik separatizm, dini radikalizm kimi elementlərin aktivləşdirilməsi üçün bütün münbit şəraitləri ələk-vələk edirlər. Bundan yalnız hakimiyyət yox, bizim hamımız əziyyət çəkə bilərik. Belə məsələlərdə hər bir fərd dövlətinin yanında olmalıdır”.
Məhəmmədəli QƏRİBLİ
