Radikal müxalifət düşərgəsində ən çox çaxnaşmaların yaşandığı siyasi təşkilat Müsavat Partiyasıdır. Müşahidələr göstərir ki, sözügedən partiyada təbəddülatlar bitmək bilmir. Yaşananlar hər keçən gün partiyanın daha da zəifləməsi ilə müşahidə edilir.
Məsələ ondadır ki, partiyanın son qurultayından sonra narazılıq daha da artıb. Arif Hacılının yenidən başqan seçilməsi bu narazılığı bir az da gücləndirib. Zatən, 2014-cü ildə o, başqan olandan sonra partiya parçalanmışdı. Xeyli sayda tanınmış şəxs partiyadan getdi. Onun bir ay əvvəl yenidən başqa seçilməsi isə növbədi partiyadaxili ziddiyyətlərə rəvac verdi. Sabiq başqan müavini Yadigar Sadıqlının A.Hacılının ünvanına səsləndirdiyi ittihamlar bunu bir daha sübut etdi.
Bundan başqa, partiyanın adının saxta mühacir alverində hallanması çaxnaşmalara növbəti təkan oldu. Məlum olduğu kimi, Almaniyanın hüquq-mühafizə orqanları Azərbaycanda müxalifət partiyalarının keçmiş fəallarından ibarət cinayətkar şəbəkə üzvlərinin işini araşdırmaqda davam edir. Qeyd edək ki, Almaniya Polisinin apardığı araşdırma nəticəsində müxalifət partiyalarının 7 fəalı, xüsusən də Müsavat Partiyasından olan üzvlərin miqrant alveri məqsədilə vahid cinayət qrupu yaratdıqları məlum olub. Onlar Azərbaycandan miqrantların qanunsuz yollarla ölkəyə gəlməsini təşkil etməkdə ittiham olunurlar. Cinayətkarlar göstərdikləri xidmətə görə 3-10 min avroarası pul alıblar. Nəticədə Bavariyada yerli rəhbərlik siyasi təqiblərə görə sığınacaq almış çox sayda miqrantı Azərbaycana deportasiya etmək qərarına gəlib. Onların hamısı məhz Müsavat Partiyasının vəsiqələri əsasında sığınacaq alıblar.
Bütün bu yaşananlardan sonra partiya klassik müsavatçılıq ideologiyasını qoruya bilərmi? Bundan sonra müsavatçılıq irsinə sahib çıxması nə dərəcədə mümkün görünür? İndiki şəraitdə Müsavat Partiyasının bu ideologiyadan rəsmi şəkildə imtina etməsi ehtimalı nə dərəcədə var?
“...bu, Müsavatın sonu olacaq”
Məsələyə münasibət bildirən siyasi ekspert Məhərrəm Zülfüqarlının sözlərinə görə, yaşanan bu çaxnaşmalardan sonra partiyanın klassik müsavatçılıq ideologiyasına sahiblənə biləcəyi sual altındadır: “Çünki partiyadaxili ziddiyyətlərin dərinləşməsi, bir çoxlarının partiyadan getməsi Müsavat Partiyasını xeyli zəiflədib. Artıq neçə ildir partiyanın əvvəlki gücündən əsər-əlamət yoxdur. Bu tərəfdən də partiyanın adının saxta mühacir biznesində hallanması, təbii ki, Müsavatı sarsıdıb. Belə olan halda, partiyanın müsavatçılıq ideologiyasına sahiblənməsi mümkün deyil. Partiyanın bu ideologiyadan rəsmən imtina edəcəyini demək çətindir. Çünki həmin ideologiyadan imtina etsələr, bu, Müsavat Partiyasının sonu olacaq”.
Vidadi ORDAHALLI
