09/12/2019 21:56
728 x 90

Bakıdan pulları Moskvaya daşıyıb böyük biznes quran Rəhim Qazıyev imiş – 27 il əvvəlki fakta görə cinayət işi açmaq olarmı…

Əliməmməd Nuriyev: “AXC hakimiyyəti dövründə Azərbaycanın pullarını Moskvaya şəxsi mənafeyi üçün aparan Rəhim Qazıyev məsuliyyətə cəlb oluna bilər”

img

“Bakıda yığdıqları pulları Moskvaya daşıyırdı. Orada özü üçün böyük biznes qurmuşdu. Lazım olarsa, bu barədə də məlumat veriləcək”. Bu sözləri Azərbaycan Respublikasının Prezidenti İlham Əliyev noyabrın 21-də Sumqayıt Dövlət Dram Teatrında şəhərin 70 illiyinə həsr olunmuş tədbirdə çıxışı zamanı keçmiş müdafiə naziri Rəhim Qazıyevin fəaliyyətinə toxunarkən deyib.

Prezident qeyd edib ki, R.Qazıyev savadsızın biri, demaqoq, küçə adamı olub. “Nə ilə yadda qaldı? Şuşanı ermənilərə satdı. O, Şuşanı birinci tərk etdi. Özü demişdi ki, - o kadrlar var, tarix hər şeyi saxlayır, arxivlər var, - Şuşa əldən getsə, başıma güllə vuracağam. Yenə də meydanlarda sülənir, özünü elə aparır ki, guya heç kim bilmir, bunun keçmişi nədir. Bax, belə bir adam müdafiə naziri ola bilərdimi? Belə bir adam bizim ərazi bütövlüyümüzü qoruya bilərdimi?”.

Prezident çıxışı zamanı AXC hakimiyyəti dövründə vəzifədə olan heç bir şəxsin adını çəkmədi. Ancaq söhbətin kimlərdən getdiyi ictimaiyyətə məlumdur .

O dövrdə Azərbaycandan daşınaraq Moskvaya aparılan pullar sayəsində biznes qurulub. Təbii ki, bu faktda cinayət tərkibi var. Maraqlıdır, 1992-1993-cu illərdə qeydə alınmış məlum hadisəyə görə cinayət işi qaldırmaq olarmı?

  • “…o hər zaman fərdi oyunlar aparmış şəxs olub”

 “Konstitusiya Araşdırmalar Mərkəzi”nin rəhbəri, hüquqşünas Əliməmməd Nuriyev “Bakı-Xəbər”ə açıqlamasında qeyd etdi ki, AXC hakimiyyəti dövründə bu kimi cinayətlərə görə 14 il azadlıqdan məhrumetmə nəzərdə tutulur. Hüquqi baxımdan müddətin keçmə məsələsi var: “Ancaq bu ağır cinayətdir. Ölkənin ağır günlərində Azərbaycanın vəsaitlərinin Moskvaya aparılması vətənə xəyanət sayılır. Prezident çıxışı zamanı AXC hakimiyyəti dövründə ölkənin vəsaitlərinin Moskvaya aparılıb orada şəxsi biznes qurulması məsələsinə toxunub. Bu fakt cinayət xarakterlidir. Prezident ad çəkməsə belə, söhbətin R.Qazıyevdən getdiyi bəllidir. R.Qazıyevin Azərbaycan dövlətinə nə cür ziyanlar vurduğunun fərqindəyik. O hər zaman fərdi oyunlar aparmış şəxs olub. Müddət keçsə də, insanlar baş vermiş hadisələri unutmamalıdırlar. Kimin nə etdiyi, hansı fəaliyyətlə məşğul olduğu Azərbaycan xalqının tarixi yaddaşındadır. Etibarlı müdafiə sisteminin yaradılmaması torpaqların itirilməsinə səbəb oldu. Sonrakı müddət ərzində onun necə fəaliyyət göstərdiyi göz qabağındadır. Onu da bildirim ki, Sürət Hüseynovun qiyam qaldırması prosesində R.Qazıyevin də rolu danılmazdır. Bununla bağlı adıçəkilən şəxs adını təmizə çıxarsa da, tarix bunun tam əksini sübut edir.

Həmçinin, Şuşanın əldən getməsində R.Qazıyevin xüsusi rolu olub. Bir çoxları düşünür ki, müəyyən zaman keçəndən sonra Azərbaycan dövlətinə xəyanət edənlərin hərəkətlər unudulur. Ancaq bu belə deyil. Azərbaycan torpaqlarının itirilməsində müstəsna xidmətləri olan bir çox şəxs var. Onlardan biri də R.Qazıyevdir”.

Həmsöhbətimiz onu da əlavə etdi ki, AXC hakimiyyəti dövründə Azərbaycanın pullarını Moskvaya şəxsi mənafeyi üçün aparan R.Qazıyev məsuliyyətə cəlb oluna bilər.

Günel CƏLİLOVA

Son xəbərlər