Cənab Prezident son vaxtlar etdiyi çıxışlarda radikal müxalifəti təmsil edən şəxslərlə bağlı konkret faktlara söykənən fikirlər bildirir. Sumqayıt şəhərinin 70 illiyinə həsr olunmuş tədbirdə İlham Əliyev yenidən bu mövzuya toxundu.
Maraqlıdır ki, Prezident müxalifətin keçirməyə cəhd etdiyi 19 oktyabr aksiyasından sonra həmin tədbirin təşkilatçıları ilə bağlı qorxaq sözünü bir neçə dəfə işlədib. Sumqayıtdakı çıxışında isə həmin fikri detallı açıqladı: “...Yaxud da ki, dövlət katibi. İstəyirdi komsomolda öz karyerasını artırsın, sonra partiya işinə keçsin və karyerist kimi hansısa bir vəzifəyə sahib olsun. Belələrinə siyasi dönük, flüger deyirlər. Onun bütün tarixi satqınlıq tarixidir. Komsomolçuları satıb, öz partiya himayədarlarını satıb, ondan sonra qoşulub Xalq Cəbhəsinə, orada da Əbülfəz Elçibəyi satıb. Bunu cəbhəçilər yaxşı bilirlər. Əbülfəz Elçibəy xəstələnəndə ən çox sevinən elə o idi. Mən bunu dəqiq bilirəm, bu məlumat var. Sevinirdi ki, xəstələnib öləcəkdir, bu da keçəcəkdir onun yerinə.
İndi son hadisələr də göstərdi ki, o, hansı hünərə sahibdir. Yəni bu isterika, bu paranoya, bu qorxaqlıq, - özünü lider sayan hansı adam özünə rəva bilər ki, bunu nümayiş etdirsin və ondan sonra bütün millətə bəyan etsin ki, mənə qarşı zor tətbiq ediblər. Bu, yalandır. Özünə hörmət edən, ləyaqəti üstün tutan hansı adam belə söz deyər? Bax, bu adam prezidentlik iddiasında olub və bu gün vaxtilə xalq hərəkatı tərəfindən yaradılmış Xalq Cəbhəsinə rəhbərlik etməyə çalışır”.
Bəllidir ki, burada söhbət Əli Kərimlidən gedir. AXCP sədrinin portret cizgilərinə qorxaqlıq, isterika, paranoya kimi məfhumlar niyə əlavə olunur? Onun hansı hərəkətləri buna səbəb olub?
Rəfail Becanov: “İlkin reaksiyada biz gördük ki, Əli Kərimli çox qorxur, hansısa prosesin önündə getməyi belə bacarmır”
Uzun müddət Ə.Kərimli ilə eyni partiyada təmsil olunmuş və onu yaxından tanıyan “Cəbhə.info” saytının və “Cümhurriyət” qəzetinin baş redaktoru Rəfail Becanov qəzetimizə açıqlamasında bildirdi ki, əslində, deyilən personanın davranışları hər zaman belə olub: “Ə.Kərimlini yaxından tanımayanlar bu məsələdə mübahisə edə bilərlər. Yaxından tanıyanlar üçün isə burada təəccüblü nəsə yoxdur. Ə.Kərimli eyni davranışları hətta hərəkat zamanı da nümayiş etdirib. Qüdrət Həsənquliyev onun 20 Yanvarda vəsiqəsini necə atması barədə müsahibə də verib. Hələ həmin vaxt Ə.Kərimli daha gənc idi. Məntiqlə daha cəsarətli, əqidəsi uğrunda hər məhrumiyyətə hazır olmalıydı. Biz də həmin zaman gənc olmuşuq və proseslərdə necə ürəklə iştirakımız yadımızdadır. Bütün bunlar göstərir ki, Ə.Kərimli bu yolda gəncliyindən səmimi olmayıb. Bu gün baş verənlər isə həmin keyfiyyətləri bir daha üzə çıxarır və deyilənləri təsdiq edir. Prezident isterikanın olduğunu dedi. Bu tam təsdiqini tapır. Aksiya zamanı biz bunu gördük. Termin olaraq bilirik ki, burada söhbət şəxsiyyətin ikiləşməsindən gedir. Ə.Kərimli həm özü qorxub, həm də kimlərisə qorxutmağa çalışıb. Kadrlarda gördüyümüz mənzərə doğrudan da bir siyasi liderin cizgilərinə uyğun gələn mənzərə deyildi. Siyasi lider istənilən təzyiqə də, təqibə də məruz qala bilər. Cəmiyyətə verilən mesaj mübarizəyə adekvat olmalıdır. Bu adekvatlıqda liderin şəxsi keyfiyyətləri böyük rol oynayır. Ə.Kərimlinin davranışları göstərir ki, atdığı addımlar apardığı mübarizə ilə həmahəng deyil. Onda bunun bir adı var - imitasiya. Bu fikirlərin ən yüksək səviyyədə də təsdiqlənməsi bir daha göstərir ki, adam çiyninə siyasi yük götürməyə qadir deyil”.
Rəfail Becanov hesab edir ki, insanın təbii halı onun ilkin reaksiyasında özünü göstərir: “İlkin reaksiyada biz gördük ki, Ə.Kərimli çox qorxur, hansısa prosesin önündə getməyi belə bacarmır. Hətta özünü cəmiyyətdə bir yazıq obrazında göstərdi. Belə adam cəmiyyəti hara apara bilər? Bu baxımdan da Ə.Kərimlinin portreti ilə bağlı gəlinən nəticəni doğru sayıram”.
Məhəmmədəli QƏRİBLİ
