Bizi bəzən insan hüquqlarını kobud şəkildə pozanlar və dinc nümayişçiləri qəddarcasına dağıdanlar ittiham etməyə cəhd göstərirlər. Bunu Prezident İlham Əliyev Bolqarıstan Respublikasının Daxili İşlər naziri Mladen Marinovun başçılıq etdiyi nümayəndə heyətini qəbul edərkən deyib.
Dövlət başçısının sözlərinə görə, artıq uzun illər ərzində həm Bolqarıstanda, həm də Azərbaycanda ictimai-siyasi sabitliyin olduğunu nəzərə alaraq, polis orqanlarının işi sizin bəzi həmkarlarınızın işindən daha azdır: “Biz bir sıra inkişaf etmiş ölkələrin polis orqanlarının, demək olar ki, hər gün nümayişçilərlə necə davrandığını, onları döydüklərini, öldürdüklərini, xəsarət yetirdiklərini, qaz, su, dəyənəklə, itlərlə qovduqlarını və çox böyük qəddarlıq nümayiş etdirdiklərini televiziyada görürük. Həm də biz bu cür halları dünyanın müxtəlif ölkələrində, müxtəlif regionlarında, o cümlədən, ən inkişaf etmiş ölkələrdə görürük. Lakin Azərbaycanda bizi bir məsələ həmişə maraqlandırır, nə üçün insanların hüquqlarının təmininə cavabdeh olan beynəlxalq təşkilatlar bəzən dinc nümayişçilərin qəddarcasına, qeyri-insani dağıdılmasını görərkən susurlar?”.
Prezident onu da qeyd edib ki, Azərbaycanda hansısa kiçik epizod baş verdikdə isə hökuməti ittiham etməyə cəhd edirlər: “Məsələn, təxminən bir ay əvvəl qanunsuz aksiyanın qarşısının heç bir güc tətbiq etmədən alınmasından sonra beynəlxalq təşkilatlar, bəzi ölkələrin Azərbaycandakı səfirləri bəyanatlar verməyə başlayıblar və az qala hökumətimizi ittiham etməyə cəhd ediblər. Bu hal Avropada həm də qurbanlarla, qətllərlə, xəsarətlərlə, nümayişlərin dağıdılması ilə baş verdikdə isə hüquq-müdafiə təşkilatları və beynəlxalq strukturlar susurlar. Bu, ikili standartların təzahürüdür və bu ikili standartlar onları nümayiş etdirən həmin təşkilatları nüfuzdan salır. Kimisə hər hansı məsələdə ittiham etmək üçün, ilk növbədə, buna mənəvi haqqın olmalıdır”.
Həqiqətən də bu məsələdə beynəlxalq təşkilatların ikili yanaşması göz qabağındadır. Açıq-aşkar riyakar mövqe sərgiləyirlər.
“...bunu görməzdən gəlirlər”
Sözügedən məsələ ilə bağlı fikirlərini “Bakı-Xəbər”lə bölüşən ekspert Azər Həsrətin sözlərinə görə, uzun illərdir Azərbaycana münasibətdə belə ədalətsiz yanaşma sərgilənir: “Əvvəla Bolqarıstan Avropa İttifaqının nisbətən yeni üzvlərindən biridir, amma bununla belə, qurumun tamhüquqlu üzvüdür. Bolqarıstanın Azərbaycanla yaxın münasibətdə olması amili qurumda ölkəmiz üçün əlavə tribuna deməkdir. O baxımdan, cənab Prezident Bolqarıstandan olan nümayəndə heyətini qəbul edərkən Avropanın, dünyanın ikili standartları haqqında məsələləri təsadüfən onların diqqətinə çatdırmadı. Yəni, faktiki olaraq, Bolqarıstan nümayəndələrinə bu məsələləri danışmaqla, cənab Prezident, əslində, bunu Avropa Birliyinə danışmış oldu. Hesab edirəm ki, bu bizim üçün çox önəmli bir məqamdır. Ona görə ki, Bolqarıstan ölkəmizlə yaxın dostluq münasibətləri olan ölkədir. Bu ölkənin vasitəsilə biz Avropa Birliyinə sözümüzü çatdırmalıyıq. Digər tərəfdən, doğrudan da Azərbaycanda adi bir hadisə olan kimi, müxtəlif beynəlxalq təşkilatlar, bəzi dövlətlər üstümüzə gəlirlər. Halbuki, Avropa Birliyi ölkələrinin özündə aksiyalar çox amansızlıqla dağıdılır. Məsələn, Fransa, Almaniya, Belçikada aksiyalar atlar, itlər, ağır texnika ilə dağıdılır. Nəticədə insan ölümləri olur, nümayişdə iştirak edənlər yaralanır və s. Ancaq insan hüquqlarından danışan qurumlar buna münasibət bildirmir və bunu görməzdən gəlirlər. Ancaq Azərbaycanda ən xırda hadisəni şişirdir və bütün dünyaya car çəkirlər. Bu baxımdan hesab edirəm ki, bir sıra beynəlxalq qurumların ikili standartları göz qabağındadır”.
Vidadi ORDAHALLI
