Ermənistanda mövcud hakimiyyətin əsas dayağı sayılan Corc Sorosun maliyyələşdirdiyi Açıq Cəmiyyət Fonduna qarşı ölkədə yeni etiraz aksiyalarına start verilib. Bunun əsas səbəbi odur ki, Sorosun hakimiyyətə gəlməsi üçün vəsait sərf etdiyi Nikol Paşinyan cəmiyyətin ümidlərini doğrultmayıb. İndi Paşinyandan yaxa qurtarmaq istəyənlər Sorosun baş nazirə dəstəyini kəsməsi üçün hərəkətə keçiblər. Bu fonda Ermənistanın Milli Təhlükəsizlik Xidmətinin sabiq rəisi David Şahnazaryan qeyd edib ki, erməni xalqının bu yanaşması Nikol Paşinyanın hökuməti üçün təhlükəli həddə çatıb.
Erməni siyasətçi ölkə vətəndaşlarını beynəlxalq təşkilatların fəaliyyətini nəzarətdə saxlamağa çağırıb və onları maliyyələşdirən Corc Soros fondunun rəhbərinin bu ölkədə “məxməri inqilab”a kömək etdikləri barədə bəyanatını xatırladıb. O, hüquq-mühafizə orqanlarını da beynəlxalq təşkilatların ölkənin daxili işlərinə müdaxiləsi ilə bağlı tədbirlər görməyə, onların fəaliyyətini qadağan etməyə səsləyib. Bu arada İrəvanda Sorosun maliyyələşdirdiyi Açıq Cəmiyyət Fondunun binası qarşısında “VETO” erməni ictimai-siyasi hərəkatının üzvləri toplaşaraq həmin təşkilatın Ermənistanda bağlanmasını tələb ediblər. “VETO” hərəkatının rəhbəri Narek Malyan məsələ ilə bağlı bildirib: “Bu təşkilatın fəaliyyəti nəticəsində ölkəmizin milli təhlükəsizliyinə ziyan vurulduğunu dəfələrlə bildirmişik. Bu ofisdən ölkəmizə qarşı işləyənlərə maliyyə ayrılır, pozğunluğa rəvac verilir. Bizim qanunlar ölkəmizin təhlükəsizliyinə xələl gətirən hər hansı təşkilatın fəaliyyətinə yol vermir”. O, bir qrup hüquqşünası cəlb edərək, Sorosa bağlı təşkilatın qadağan olunması barədə məhkəmə iddiası qaldıracaqlarını bildirib
Narek Malyan bundan əvvəl də Soros və Paşinyan iqtidarı arasında əlaqələrə dair maraqlı açıqlamalar verib: “Nikol Paşinyan əsir götürülüb. Sorosçular onu əsir götürüblər. Onlar baş nazirə öz iradələrini diqtə edir və onu cəfəngiyyat danışmağa vadar edirlər”. Baş nazirin erməni transgender- ağırlıqqaldıran Mel Daluzyanla bağlı dediyi “o mənim şəxsi nəzarətim altındadır” sözlərinə münasibət bildirən Narek Malyan deyib: "Paşinyanın Daluzyanı kimdən qoruduğu sual doğurur, çünki heç kimin onunla problemi yoxdur. Bütün bunları nəzərə alaraq, Paşinyanın əsir götürüldüyü qənaətinə gəldik. Sorosçular əsir götürüblər. Öz iradələrini baş nazirə diqtə edir və onu cəfəngiyyat danışmağa məcbur edirlər. Məsələn, “Daluzyanı öz himayənə götür və məqsədəuyğun olmayan mənasız şeylər söylə”. Nikol Paşinyanı antimilli gündəliyin icra mərhələsinə girməyə məcbur edirlər. Aksiyamızla biz Paşinyanın sərbəst buraxılmasını tələb edirik. Çünki hesab edirik ki, baş naziri Sorosun, xarici kəşfiyyat şəbəkəsinin caynağından qurtarmaq lazımdır. Biz hesab edirik ki, ayıq, adekvat bir insan bu cür açıqlamalar verə bilməz. Sadəcə alnına silah dirəyir və deyirlər ki, axmaqla, o da danışır”.
Digər polittexnoloq Vigen Akopyan da bildirir ki, hakimiyyətə Klinton və Sorosun fondları tərəfindən maliyyələşdirilən tamamilə fərqli cərəyanlar, partiyalar və təşkilatlar daxil edilib: ”Bu səbəbdən fərqli qruplar arasında mübarizə başlayıb. Müxtəlif maliyyə sektorlarına diqqət güclənir və buna daha çox Soros Fondundan maliyyəşənlər diqqət yetirirlər”. Ermənistanın “İravunk” nəşri də vəziyyətin gərgin bir mərəhəlyə qədəm qoyduğunu yazır: “Bu vəziyyətdə degenerativ elementlər özünü o qədər yaxşı hiss edir ki, keçən ilin dövlət əleyhinə çevrilişindən sonra ardıcıl olaraq milli dəyərləri və adətləri ən alçaq və həyasız şəkildə inkar və məsxərə edirlər. Paşinyanın əsas elit dayağının məhz həmin degenerativ elementlərin olmasına heç bir sağlam düşüncəli insanın şübhəsi yoxdur. Bu degenerativ elementlərin hakimiyyətdə olmasını isə Soros Fondu təşkil edib və Paşinyan ondan asılı durumdadır. Bundan xilas olmayınca, Ermənistanın özünün xilası mümkün deyil”.
Erməni mediası onu da yazır ki, həyatı əsasən Rusiyanın hərbi-siyasi və iqtisadi dəstəyindən asılı olan Ermənistanın reallığı Paşinyan və ətrafını tezliklə Sorosun, yəni Qərbin nüfuz dairəsindən bir qədər uzaqlaşmağa vadar etməli idi. Amma görünən budur ki, Paşinyanın Soros qarşısında götürdüyü və açıqlanmayan öhdəliklər də var və onlar baş nazirə Sorosdan qurtulmağa imkan vermir. Sorosun maliyyələşdirdiyi qurumlar və şəxslər isə Açıq Cəmiyyət İnstitutuna qarşı çıxanlar, o cümlədən Rusiya əleyhinə indi daha fəal mübarizə aparır. Onlardan biri olan Ermənistanın Vətəndaşlar Birliyi proqramının koordinatoru Daniel İoannisyan məhz belə bir vaxtda Ermənistanın Rusiyadan uzaqlaşdırılmasının vacibliyini bəyan edib:
“Ermənistanda demokratik dəyərləri inkişaf etdirmək üçün imkan yaranıb. Bunun üçün Ermənistanın Rusiyadan maksimum müstəqillik əldə etməsinə kömək etmək lazımdır. Bu otaqda heç kimə sirr deyil ki, Rusiya qonşuluqdakı hər hansı bir demokratikləşmə prosesini bəyənmir.
Rusiyadan müstəqillik əldə etmək üçün alternativ enerji istehsalını və Ermənistanda infrastrukturun inkişafını stimullaşdırmaq lazımdır. Bu, Rusiya qazının tədarükündən asılılığı azaltmaqla yanaşı, həm də Kremldən Ermənistana təzyiq etmək üçün əlavə bir qol olan erməni əmək miqrantlarını qismən geri qaytarmağa kömək edəcək”. Bu fonda erməni mediası Soros Fondunun İrəvandakı şəbəkəsinin Ermənistanı Rusiyadan uzaqlaşdırmaq üçün hərəkətə keçdiyini iddia edib. Beləliklə, yaranan vəziyyət Soros amilinə görə Ermənistanda yeni qarşıdurma yarandığını üzə çıxarır. Belə ki, Rusiya və bir qrup erməni Sorosun Paşinyan üzərində təsirlərinin sona çatmasını istəyir. Amma Paşinyan və komandasında yer alan sorosçular buna aktiv müqavimət göstərir. Elə bu da Ermənistanda yeni qarşıdurma yaradır.
Nahid SALAYEV
