Qabil Hüseynli: “Hazırda gedən islahatların fonunda bunun yaxşı rezonansı da olar”
Son vaxtlar ölkədə aparılan islahatlar bir sıra reallıqları üzə çıxarıb. Görünən budur ki, aparılan islahatlardan bəhrə görən xalq bunun hakimiyyətin bütün qollarında tətbiqinin tərəfdarıdır. Bu tendensiya sosial şəbəkələrdə ifadə olunan fikirlərdə, əhali ilə olan söhbətlərdə özünü göstərir. Əhalinin böyük hissəsi sosial paketlərdən yararlanmağı bacardı, təqaüd və əməkhaqlarında real artım qeydə alındı. Bunlarla paralel şəkildə struktur və kadr islahatları həyata keçirildi ki, bu da əhali tərəfindən böyük rəğbətlə qarşılandı.
Bunların fonunda alternativ düşərgənin reytinqinin aşağı düşdüyü müşahidə olunur. Söhbət radikal müxalifətdən gedir. Onların keçirməyə cəhd etdikləri etiraz aksiyaları uğursuz alınır. Çıxış yolu kimi sığınmaq istədikləri Qarabağ kartı da onlara dividend gətirmir. Çünki bu problemlə Azərbaycan dövləti dərindən məşğul olur. Radikal müxalifətin bu uğursuzluğu həm də onların sosial baza sarıdan tam tükəndiklərinə bir işarədir. Baş verənlər həm də ölkə başçısının reytinqinin çox yüksək olduğuna bir işarədir. Bütün bunlarla yanaşı, bir vacib sosial tələb də var. Bu da növbədənkənar parlament seçkilərinin keçirilməsidir. Erkən parlament seçkilərinin keçirilməsi üçün əsl zaman deyilmi?
- “...nəticədə biz daha çox gənclərdən ibarət yeni bir parlamenti formalaşdıra bilərik”
Politoloq Qabil Hüseynli qəzetimizə açıqlamasında bildirdi ki, növbədənkənar parlament seçkilərini keçirmək üçün bir sıra şərtlər olmalıdır: “Bunlardan birincisi mühüm dövlət orqanlarının öz funksiyalarını yerinə yetirə bilməməsi, hakimiyyət qolları arasında konfliktin olması və başqa amillər seçkiləri ertələməyə əsas verir. Bizdə belə hallar yaşanmır. Ancaq bunu başqa detallara əsaslanıb keçirmək olar. Məsələn, ölkədə həyata keçirilən sosial, kadr, struktur islahatların tam tamamlanması üçün belə addım atıla bilər. Çünki əhalinin gözünün önündə olan daha çox parlamentdir. Biz hiss edirik ki, sadə vətəndaşlar oradakı tərkibin də yenilənməsini istəyirlər. Düzü, bu ilin əvvəlindən belə fikirlər çox səslənirdi. Hətta məlumatlı adamlar deyirdilər ki, ilin sonunda baş tuta bilər. Mən də düşünürdüm ki, erkən seçkilərin keçirilməsi üçün ən uyğun vaxt bu ilin sonu idi. Yəni bələdiyyə seçkiləri ilə birlikdə bu seçkini keçirmək olardı. İki seçkinin bir yerdə keçirilməsi həm də büdcəyə qənaət olardı. Bilirsiniz ki, parlamentdə bir neçə deputat yeri də boşdur. Onlarla da bağlı seçki keçirilməyib. Bütün bunları ümumiləşdirib, növbədənkənar seçkilərin keçirilməsi yerinə düşərdi. Hazırda gedən islahatların fonunda bunun yaxşı rezonansı da olar. Əminəm ki, dəyişiklik istəyən xalq seçkilərdə çox aktiv iştirak edər və nəticədə biz daha çox gənclərdən ibarət yeni bir parlamenti formalaşdıra bilərik. Ümumi mənzərənin tamamlanması üçün buna zərurət görürəm. Gecikdirmək lazım deyil”.
Məhəmmədəli QƏRİBLİ
